1 ፔቴ ዓጊኒኮ ጊንፃ ዓሞኦኔ ዓጮ ካኣቲ፥ ናዖሴ ጌሌዓዴይዳ ዓኣ ያቤሼ ካታሞ ዖሊ ዓርቃኒ ዖልዚ ዓሲና ማንጌኔ፤ ዬያሮ ያቤሼ ዓሳ ናዖሴ ኮራ፦ «ኑ ኔኤና ዎላ ጊኢጊ ናንጋኒ ጫኣቃንዳኔ፤ ኑኡኒ ኔኤኮ ዓይሌ ማዓንዳኔ» ጌዔኔ።

2 ናዖሴ ማሃዖ፦ «ታ ዒንሢና ዎላ ጫኣቃኒ ዳንዳዓሢ ፔቴ ባኣዚ ዒንሢ ዔኤዔቴኬ፤ ዬና ዓይጎዳይ ጌዔቴ ዒንሢ ፔቴ ፔቴሢኮ ሚዛቆ ዓኣፖ ታኣኒ ዋቂ ኬሲ ዒስራዔኤሌ ዓሶ ጋፒንሢ ቦርሲሳንዳኔ» ጌዔኔ።

3 ዒማና ያቤሼ ዓጮ ሱኡጋ፦ «ዒስራዔኤሌ ዓጮ ጉቤ ኪኢታ ዓሲ ኑ ዳካንዳጉዲ ላንካይ ኬሊ ኑም ዒንጌ፤ ኑና ዓውሳንዳ ዓሲ ባይቄቴ ኔኤም ኑ ኩጮ ዒንጋንዳኔ» ጌዔኔ።

4 ዔያታ ዳኬ ኪኢቶ ዓሶንሢ ሳኣዖኦሌ ዓኣ ቤዞ፥ ጊቢዓ ሙካዖ ሃይሶ ኬኤዛዛ ዴራ ቢያ ካራ ባይዚ ዒላቲና ዬኤፒ ዓርቄኔ። 5 ሳኣዖኦሌ ዒማና ዋኣፃ ጌማይ ዒሺ ፔኤኮ ጎዣፓ ማዒ ሙካኔ፤ ዒዚ ዬያ ዋይዛዖ፦ «ሃይ ዓይጎዳይ? ዓሳ ቢያ ዓይጎሮ ዬኤካይ?» ጌይ ዖኦጫዛ፥ ያቤሼፓ ሙኬ ዓሳ ጌዔ ባኮ ዒዛም ዓሳ ኬኤዜኔ። 6 ሳኣዖኦሌ ዬያ ዋይዛዛ ፆኦሲኮ ዓያና ዎልቄና ዒዛይዳ ኬዴኔ፤ ሃሣ ሚርጌና ዒ ዻጋዼኔ። 7 ዬካፓ ዋኣፆ ጌማቶንሢ ሹኪ ዓሽኮ ዺቢ ቤሲ ቲቂ ቲቂ ፓቄኔ፤ ዬያ ዓሽኮ ዔኪ፦ «ሳኣዖኦሌና ሳሙዔኤሌና ጊንፆ ዖልዚሮ ኬስኩዋ ዓሲ ዓኣቴ ዬኖ ዓሶኮ ጌማታ ሃማዺ ቲቂንታንዳሢ ዔሩዋቴ!» ጌይ ኪኢታ ዓሲ ዒስራዔኤሌ ዓጮ ቢያ ዳኬኔ።

ዬያሮ ዒስራዔኤሌ ዓሳ ቢያ ናንጊና ናንጋ ጎዳሢ ዒጊጪ ፔቴ ዓሲያ ዓቱዋዖ ቢያ ኬስኬኔ። 8 ሳኣዖኦሌ ዔያቶ ቤዜቄ ጌይንታ ቤዛ ቡኩሳዛ ዔያቶኮ ፓይዳ፦ ዒስራዔኤሌፓ ሙኬ ዓሶኮ ሃይሦ ፄኤታ ሺያ፤ ዪሁዳይዳፓ ሙኬ ዓሳ ሃይሢታሚ ሺያኬ። 9 ዬካፓ ዔያታ ያቤሼፓ ሙኬ ኪኢቶ ዓሶም፦ «ዚሮ ዓባ ሳዛ ሄላንዳሢኮ ቤርታ ኑ ሙኪ ዔያቶ ዓውሳንዳሢ ዒንሢኮ ዴሮም ኬኤዙዋቴ» ጌዔኔ። ዬንሢ ኪኢቶ ዓሶንሢ ዴንዲ ያቤሼ ዴሮም ኬኤዛዛ ዔያታ ሚርጌና ዎዛዼኔ። 10 ዬያሮ ያቤሼ ዓሳ ዓሞኦኔ ዓሶም፦ «ዚሮ ኩጮ ኑ ዒንሢም ዒንጋንዳኔ፤ ዒንሢ ኑጊዳ ኮዔ ባኣዚ ማዹዋቴ» ጌዔኔ።

11 ዚሮ ጉቴሎ ዓማ ሳኣዖኦሌ ዔቂ ፖኦሊሶ ሃይሦ ቤሲ ፓቄኔ፤ ዬያይዴስካፓ ዴንዲ ዓሞኦኔ ዓሶ ጉርዶ ጌሊ ዖልዚ ዓርቄኔ፥ ዓባ ዴንዲ ሳዛ ሄላንዳኣና ዓሞኦኔ ዓሶፓ ሚርጌ ዓሲ ዎዼኔ፤ ሃይባፓ ቶሌ ዓሳ ላምዖ ዓሲታዎ ዎላ ማዓኒ ዳንዳዑዋ ጎይሢ ጳሽኪ ፑኒ ፑኒ ዴንዴኔ።

12 ዒማና ዒስራዔኤሌ ዓሳ ሳሙዔኤሌ ኮይላ፦ « ‹ሳኣዖኦሌ ኑ ዑፃ ካኣታዾፓ› ጌዔ ዓሳ ዖናንሢዳይ? ዔያቶ ኑም ዓኣሢ ዒንጌ ኑ ዎዻንዳኔ!» ጌዔኔ።

13 ሳኣዖኦሌ ጋዓንቴ፦ «ናንጊና ናንጋ ጎዳ ዒስራዔኤሌ ዓሶ ሃናኣ ኬሎይዳ ዓውሴሢሮ ዓይጎ ዓሲያ ዎዺንታንዳያ ኮይሱዋሴ» ጌዔኔ። 14 ዬካፓ ሳሙዔኤሌ ዴሮም፦ «ቢያሢ ኑ ጌልጌላ ዓኣዺ ሳኣዖኦሌ ኑኡኮ ካኣቲ ማዔሢ ላሚ ሃሣ ፔጋሲ ኑ ዔርዞም» ጌዔኔ።

15 ዬያሮ ቢያሢ ጌልጌላ ዴንዲ ዒኢካ ናንጊና ናንጋ ጎዳም ዱማዼ ቤዞይዳ ሳኣዖኦሌ ካኣቲ ማዔሢ ዔርዜኔ፤ ዒኢካ ናንጊና ናንጋ ጎዳም ፔቱሞና ዒንጎ ባኣዚ ሺኢሼኔ፤ ሳኣዖኦሌንታ ዒስራዔኤሌ ዴሮ ቢያሢንታ ዬኖ ቦንቾ ኬሎ ዼኤፒ ዎዛና ቦንቼኔ።