1 ዴሮ ታኣኮ ሄርቂ ዎይሣ፥ ፒዜ ማዒባኣ ዎጎ ኬሳ ዓሳ ዒንሢና ባዴዔቴ! 2 ማንቆ ዓሳ ቶኦኪ ባይቃንዳጉዲና ጌኤዞና ዓሳ ፒዜ ዎጌ ዴንቁዋጉዲ ዒንሢ ማዻ ጎይፃ ዬያኬ፤ ዒንሢኮ ዬያ ማዾና ላኣሎ ዜኤሮ ዒንዶንሢና ዲቻ ዓሳባኣ ዜኤሮ ናኣቶኮ ቆሎ ዒንሢ ቡራኔ። 3 ዒንሢኮ ዬያ ቢያ ጌኖ ማዾሮ ፆኦሲ ዒንሢ ሜታሳ ዎዶና ዒንሢ ዎይታንዳይ? ዒንሢ ዑፃ ሄላንዳ ባይሲንታ ሃኬ ዓጫፓ ሙካ ዎዶና ዓይጌ ዒንሢም ኮሽካንዳይ? ዒማና ማኣዶ ዒንሢ ዴንቃኒ ዖ ባንሢ ዓኣዻንዳይ? ሃሣ ቆሎ ዒንሢኮ ዒንሢ ዓንካ ዓኣቻንዳይ? 4 ዲዒንቲሢና ሃይቢናይዳፓ ዎይቲ ዒንሢ ቶላንዳይ? ዬይ ቢያ ማዔንቴ ናንጊና ናንጋ ጎዳኮ ዻጋ ሃጋ ማዒባኣ ጎይሣኬ፤ ዒንሢ ሜታሳኒ ዒዛኮ ዔቄ ኩጫኣ ማዒባኣሴ።

5 ናንጊና ናንጋ ጎዳ፦ «ታኣኮ ዻጎ ኮኦሎ፥ ሃሣ ዣኣጮ ማዔ ዓሶኦሬ ኔና ባዴዔ! 10፡5 ዒሲ. 14፡24-27፤ ናሆ. 1፡1-3፤ ሶፖ. 2፡13-15። 6 ቆሎ ዔያቶኮ ቡራንዳጉዲ፥ ዲዒ ዔካ ባኮዋ ጋኣዛንዳጉዲ፥ ጎይሢዳ ዓኣ ዾቃሌጉዲ ዒ ዔያቶ ሄርቃንዳጉዲ፥ ፆኦሲ ካኣሽኩዋ ዴሮ ማዔ ታና ዻጋሳ ዓሶ ዖላንዳጉዲ ታ ዳካንዳኔ።»

7 ዒዛ ማሊፃ ጋዓንቴ ዬያቱዋሴ፤ ዬይ ባካ ዒዛ ማሊፆይዳ ባኣሴ፤ ዒዛ ማሊፃ ዛላ ዻኮንሢ ሌሊቱዋንቴ ሚርጌ ዴሮ ባይዛኒኬ። 8 ዬይ ካኣታሢ፦ «ታኣኮ ዖሎ ዓሶ ዓይሣ ዓሳ ቢያ ካኣቶቱዋዓዳ? 9 ታኣኒ ካሊኖኔ፥ ካርካሚሼ፥ ሃማቴንታ ዓርፓዴ ካታሞዋ ባሼኔ፤ ሃሣ ሳማሪያንታ ዴማስቆንታ ታ ዴማ ታኣኒ ማሄኔ። 10 ሃያኮ ቤርታ ታኣኒ ዬሩሳላሜና ሳማሪያናይዳፓ ባሼ ካኣሽኮ ሜሌ ፆኦዛ ኩሜ ካኣቶ ባሼኔ። 11 ሳማሪያ ዓጮና ዒዞኮ ካኣሽኮ ሜሌ ፆኦዞ ታኣኒ ማዼሢጉዲ ዬሩሳላሜና ዒኢካ ዚጎ ማላቶ ዑፃ ታኣኒ ማዺንዱዋዓዳ!» ጌዒ ሄርሺንቴኔ።

12 ጋዓንቴ ናንጊና ናንጋ ጎዳ፦ «ዬሩሳላሜና ፂዮኔ ዹኮይዳ ታኣኒ ማዻንዳ ባኮ ቢያ ማዺ ኩንሤስካፓ ዒዛኮ ሄርሺንቶና ዖቶርሙሞ ቢያ ዛሎሮ ዓሶኦሬ ካኣቲ ታ ሜታሳንዳኔ» ጌዔኔ። 13 ዓሶኦሬ ካኣቲ ሄርሺንቶና ኬኤዛዖ፦ «ሃያ ቢያ ታኣኒ ማዼሢ ታኣኒ ታኣሮኬ፤ ታኣኒ ዶዲ፥ ጊንሣ ዔራና ጪንጫኬ፤ ካኣቶ ዓጮኮ ባኣካ ዓኣ ዛጶ ታኣኒ ሺኢሼኔ፥ ዔያታ ቡኩሴ ቆሎ ቢያ ታኣኒ ዔኬኔ፤ ዬንሢ ዓጮንሢዳ ናንጋ ዴሮ ቢያ ታኣኮ ዎልቆና ታ ዔያቶ ዻውሲሴኔ። 14 ዓጮ ካኣታ ቢያ ታ ቤርታ ካፒ ማኣሪጉዲ ማዔኔ፤ ሜታ ባኣያ ጱኡላ ቡኩሲንታሢጉዲ ቆሎ ታ ቢያ ዔያቶኮ ቡኩሲ ዔኬኔ፤ ዬያ ታኣኒ ማዼ ዎዶና ካፒ ፔ ጱኡሎ ላኣጋኒ ባራኒ ሺራሢጉዲ፤ ጊንሣ ሙሱሮና ቆንቃኒ ጋዓሢጉዲታዖ ዓጊፄይ ባኣሴ» ጌዔኔ።

15 ናንጊና ናንጋ ጎዳ ሂዚ ጋዓኔ፦ «ሄርጋ ሚሢ ቆፃ ዎዶና ቆፃ ዓሢዳ ዔቃኒ ዳንዳዓ? ጊንሣ ማጋኣዜ ጌይንታ ዓንጋ ሚፆ ፑኡሳ ዓሢዳ ዔቃኒ ዳንዳዓ? ዬያጉዲ ኮኦሎኮዋ ዔኪ ሃንታ ዓሢ ዑፃ ዎልቄ ባኣሴ።»

16 ዬያሮ ቢያ ባኮ ዎይሣ ጎዳሢ ዎልቆና ዓኣ ዖላ ዓሶይዳ ዖኦፒሳ ሃርጌ ዳካንዳኔ፤ ዑፆ ጋራ ታሚጉዲ ሚቻ ቆሢያ ዔኤሣንዳኔ። 17 ዒስራዔኤሌ ዓሶኮ ፖዖ ማዔ ፆኦዛሢ ፔኤሮ ዬያ ዓሶም ታሚ ማዓንዳኔ፤ ዒስራዔኤሌ ዓሶኮ ዱማዼ ፆኦዛሢ ፔኤሮ ፔቴ ኬሊና ጋውዶና ሃንጎ ዓንጊፆዋ ዓይሱዋዖ ቢያ ሚቺ ጋፒሳ ታሚ ሎስቶጉዲ ማዓንዳኔ፤ 18 ዎዻ ዶርዓ ዓሲ ዖኦፒሲ ዎዻሢጉዲ፥ ዲም ጌዔ ዴኤሎ ካዮና ማሎ ጎዣኣ ጋፒ ባይቃንዳኔ። 19 ዴኤሎ ካዮይዳ ዓታ ሚፃ ፓይዶና ዻካንዳሢሮ ዻካ ናይታዖ ፓይዳኒ ዳንዳዓኔ።

20 ዒማና ዒስራዔኤሌኮ ፒኢጫዺ ዓቴ፥ ያይቆኦቤኮ ባይሲንታፓ ዓቴ ዴራ ዔያቶ ሜታሢ ሄሊሴ ዓሶኦሬ ዓሶ ጉሙርቂንዱዋሴ፤ ዬያ ዓሶ ጉሙርቆ ሃሺ ዒስራዔኤሌኮ ዱማዼ ፆኦዛሢ ጎኔና ዔያታ ጉሙርቃንዳኔ። 21 ያይቆኦቤኮ ፒኢጫዺ ዓቴዞንሢ ዎልቆና ዓኣ ፆኦዛሢ ባንሢ ጎኑሞና ማዓንዳኔ። 22 ዎዚ ዒስራዔኤሌ ዓሶኮ ሚርጉማ ባዞ ማኣሻሎጉዲ ማዔያታቴያ ዔያቶ ባኣካፓ ዻቃንዳዞንሢ ዻኮንሢ ሌሊኬ፤ ዴሮ ባይዛኒ ኮይሳያ ማዔ ጎኑሞ ዎጌያ ጊኢጊንቴኔ። 23 ሂዮ! ቢያ ባኮ ዎይሣ ጎዳ ማዔ ፆኦዛሢ ዓጬሎይዳ ቢያ ዓጋንዳኔ ጌዒ ማሌ ባይሲንቶ ዔኪ ሙካንዳኔ። 10፡23 ሮሜ 9፡27።

24 ቢያ ባኮ ዎይሣ ጎዳ ማዔ ፆኦዛሢ ፂዮኔይዳ ናንጋ ዴሮም፦ «ዎዚ ሃያኮ ቤርታ ጊብፄ ዓጫ ዒንሢ ሄርቂ ዎይሤሢጉዲ ዔያታ ዒንሢ ሄርቂ ዎይሣያ ማዔቴያ ዓሶኦሬ ዓሶ ዒጊጪፖቴ። 25 ዻካ ኬሊኮ ጊንፃፓ ዒንሢዳ ታ ዻጋዻ ዻጋ ጋፓንዳኔ፤ ዬካፓ ጊንሣ ሺሪ ዔያቶ ታ ባይዛንዳኔ። 26 ታኣኒ ቢያ ባኮ ዎይሣ ጎዳ ማዔ ፆኦዛሢ ዖሬቤ ላሎ ዓጮይዳ ሚኢዲያሜ ዓሶ ጳርቄሢጉዲ ዓሶኦሬ ዓሶዋ ዢኢራፖና ታ ጳርቃንዳኔ፤ ጊብፄይዳ ታ ማዼ ጎይፆ ታኣኮ ኮኦሎ ታኣኒ ዔፒራፂሴ ዎሮይዳኣ ዔቂሳንዳኔ። 27 ዬኖ ዎዶና ታኣኒ ዒንሢ ዓሶኦሬ ዓሳ ሄርቂ ዎይሣሢዳፓ ኬሳንዳኔ፤ ዬካፓ ዔያቶኮ ሄርቂ ዎይሦ ቃንባራ ዒንሢኮ ዓንዱርሙሞይዳፓ ዔቄያና ሜሜቃንዳፓዓቴም ባቃኖይዳ ዋኣፂንቴ ጎይሣ ዴዓዓኬ» ጋዓኔ።

28 ዬይ ዖሎ ዓሳ ዓያቴ ጌይንታ ካታሞ ጌሌኔ፤ ዬካፓ ሚጊሮኔ ጊዴና ጌይ ዓኣዻኣና ዔያታ ፔኤኮ ዓርቄ ባኮ ሚክማሴይዳ ጌሤኔ። 29 ዒኢና ዓኣዻ ጎይፆና ቲቂ ዓኣዺ ዓዳኣሬ ጌይንታ ቤዛ ዔያታ ዎርቃዛ፥ ራኣሜ ካታሞይዳ ናንጋ ዓሳ ቢያ ዲቃቴኔ፤ ካኣቲ፥ ሳዖኦሌ ካታሞ ጊቢዓይዳ ናንጋ ዓሳ ቢያ ዓኣሺንቴኔ። 30 ዔኤዛታ ጋኣሊሜ ዴሬዮቴ! ዉውይ ጎዑዋቴ! ሃሣ ላዪሻሜ ዴሬዮቴ! ዋይዙዋቴ! ዓናቶቴ ዓሲዮቴ! ማሂ ኬኤዙዋቴ! 31 ማዲሜናሄና ጌቢሜ ዴራ ፔኤኮ ሼምፓሢ ዓይሳኒ ጳሽኪ ጳሽኪኬ። 32 ሞርካ ሃኖ ኖኦቤ ካታሞይዳ ዓኣዖ ዬሩሳላሜ ካታሞ ማዔ ፂዮኔ ጌሜሮ ዒጊቺሢሮ ኩጮ ዓጊሢ ዓጊሢኬ።

33 ቢያ ባኮ ዎይሣ ጎዳሢ ሚሢዳፓ ቲቂንቴ ካኣፒጉዲ ሜንሢ ሜንሢ ዔያቶ ኬይሳንዳኔ፤ ጊንሣ ዔያቶ ባኣካፓ ዖቶርቃያ ማዔሢና ኮሺ ዼጊ ጌዒ ዖቶርቃሢ ዻውሲንታንዳኔ። 34 ዴኤሊ ካይዚዳ ዓኣ ሚሢ ሄርጋና ቆፂንቲ ዶዓሢጉዲ ናንጊና ናንጋ ጎዳ ዔያቶዋ ቆፃንዳኔ፤ ዶኦሪንቴያ ማዔ ሊባኖኦሴ ሚፃ ቆፂንቲ ዶዓሢጉዲ ዔያታ ዎልቆ ፆኦዛሢ ዔያቶ ቆፄም ዶዓንዳኔ።