1 ዓይጎ ዓሲያ ፔኤኮ ባኣቶይዳፓ ፔቱሞና ፆኦሲም ዒንጊንታ ዒንጊፆ ዒንጋ ዎዶና ዔኤቢ ቦሂሳ ባኣዚባኣ፥ ፔቴ ጌማይታቴያ ዒንዴ ባይ ዶኦሪ ዔኪ ሙኮንጎ። 2 ዬይ ዒንጋ ዓሢ ፆኦሲም ዒንጎ ባኣዚ ማሂ ዒንጋ ባኮኮ ቶኦኮይዳ ፔ ኩጮ ጌሢ ዓፒሎና ማዢንቴ፥ ፆኦሲ ዴሮና ካኣማ ማኣሮኮ ካሮይዳ ሹኮንጎ፤ ዬካፓ ዓኣሮኔ ዜርፆ ማዔ፥ ቄኤሳ ሱጉፆ ዔኪ ሚቺ ዒንጎ ቤዞኮ ጎኦቦ ዛሎ ቢያ ፑጮንጎ። 3 ዬያ ዓሽኮኮ ሃካፓ ሊካ ፓይዲንታ ቤዞንሢ ሙኡዚ ዒንጊሢ ማሂ ናንጊና ናንጋ ጎዳም ዒንጊንቶንጎ፤ ዬንሢያ፦ ጎጶ ባኮ ካንቄ ሃኣቦንታ ዒኢካ ዓኣ ማሎ ጉቤ፥ 4 ጳላሢና ዒኢካ ዓኣ ማሎ፤ ዬያጉዲ ሃሣ ማዮኮ ሻኣዣዻ ቤዞዋ ዔኪ ሺኢኮንጎ። 5 ዬካፓ ቄኤሳ ዬያ ቢያ ሚቺ ዒንጎ ባኮና ዎላ ማሂ ሚቺ ዒንጎ ቤዞይዳ ሚቾንጎ፤ ዬያ ዒንጎ ባኮኮ ሳዋ ናንጊና ናንጋ ጎዳ ዎዛሳያ ማዓኔ።

6 ፔቱሞና ፆኦሲም ዒንጎ ዒንጊሢ ማዒ ዒንጊንታ ባካ ማራይ ሃሣ ዋኣሪ ማዔቴ፦ ቦሂሳ ባኣዚባኣ ዓዴ ማራይ፥ ኮላይ፤ ጊንሣ ሃሣ ዒንዴ ማራይታቴያ ዋኣሪ ዒማዺ ማዖንጎ። 7 ፔቴ ዓሲ ፆኦሲም ዒንጎ ባኣዚ ማሂ ዒንጋ ባካ ማራናይ ማዔቴያ ናንጊና ናንጋ ጎዳ ቤርቶ ዔኪ ሙኮንጎ። 8 ዬካፓ ኩጮ ማራናዖኮ ቶኦካ ጌሢ ዓፒሎና ማዢንቴ፥ ፆኦሲ ዴሮና ካኣማ ማኣሮኮ ጌሎ ካራ፥ ቤርቶ ዛላ ሹኮንጎ፤ ቄኤሳ ዬያኮ ሱጉፆ ዔኪ፥ ሚቺ ዒንጎ ቤዞኮ ጎኦቦ ዛሎ ቢያ ፑጮንጎ። 9 ዬያይዴስካፓ ዓሽኮኮ ሃካፓ ሊካ ፓይዲንታ ቤዞንሢ ሙኡዚ ዒንጊሢ ማሂ ናንጊና ናንጋ ጎዳም ዒንጎንጎ፤ ዬንሢያ፦ ማሎንታ ጉይኖ ሜጌፆ ሄሊሲ ቲቂንቴ ዑንኮ ማላኣ፥ ጎጶ ባኮኮ ዑፃ ዓኣ ሃኣቦንታ ዒኢካ ዓኣ ማሎ ቢያ፥ 10 ጳላሢንታ ዒኢካ ዓኣ ማሎ፤ ዬያጉዲ ሃሣ ማዮኮ ሻኣዣዻ ቤዞ ዔኪ ሺኢሾንጎ። 11 ዬካፓ ቄኤሳሢ ዬያ ቢያ ናንጊና ናንጋ ጎዳም ሙኡዚ ዒንጊሢ ማሂ ዒንጊ፥ ሚቺ ዒንጎ ቤዛ ሚቾንጎ።

12 ፔቴ ዓሲ ፆኦሲም ዒንጎ ባኣዚ ማሂ ዒንጋሢ ዋኣሪ ማዔቴያ ናንጊና ናንጋ ጎዳ ቤርቶ ዔኪ ሙኮንጎ። 13 ዬካፓ ዒዚ ፔኤኮ ኩጮ ዋኣራሢ ቶኦካ ጌሢጋፓ ዓፒሎና ማዢንቴ፥ ፆኦሲ ዴሮና ካኣማ ማኣሮኮ ቤርቶ ዛላ ሹኮንጎ፤ ቄኤሳ ዬያ ሱጉፆ ዔኪ ሚቺ ዒንጎ ቤዞኮ ጎኦቦ ዛሎ ቢያ ፑጮንጎ። 14 ዬያ ዓሽኮኮ ሃካፓ ሊካ ፓይዲንታ ቤዞንሢ ሙኡዚ ዒንጊሢ ማሂ ፆኦሲም ዔኪ ሺኢሾንጎ፤ ዬንሢያ፦ ጎጶ ባኮ ካንቄ ሃኣቦንታ ዒኢካ ዓኣ ማሎ ጉቤ፥ 15 ጳላሢንታ ዔያቶ ካንቂ ዓኣ ማሎ ቢያ፤ ዬያጉዲ ሃሣ ማዮኮ ሻኣዣዻ ቤዞዋ ዔኪ ሺኢሾንጎ። 16 ዬካፓ ቄኤሳሢ ዬያኮ ሳዋ ናንጊና ናንጋ ጎዳሢ ዎዛሳ ዒንጊሢ ማዓንዳጉዲ ሚቺ ዒንጎ ቤዛ ሚቾንጎ፤ ማሊ ቢያ ናንጊና ናንጋ ጎዳም ዱማዼያ ማዖንጎ። 17 ዒስራዔኤሌ ዜርሢ ማዔ ዓሳ ጉቤ ማሊ ማዔ ዓሽኪ፤ ሃሣ ሱጉሢያ ሙዖፓ፤ ዬይ ዒስራዔኤሌ ዓሳ ናንጋ ቤዞና ናንጋ ዎዶይዳኣ ቢያ ናንጊና ካፒ ናንጋ ዎጌ ማዖም።