ፒዜና ናንጋ ማንቆ ዓሲ ባሼኬ።

ሩኡሪ ጳሽካ ዓሲ ጎይፆ ዻዻባኔ።

ዒዚ ጋዓንቴ ናንጊና ናንጋ ጎዳ ዑፃ ዻጋዻኔ።

ማንቆ ዓሶኮ ጋዓንቴ ዔያቶኮ ዓኣ ዻኮ ላጎንሢታዖ ዔያቶይዳፓ ሃካኔ።

ሉኡዙሞ ጌስታ ዓሲ ሜቶፓ ቶላዓኬ።

ዔኤቢ ዒንጋ ዓሲም ቢያሢ ዒዛኮ ላጌኬ።

ዒዛኮ ላጋኣ ዒዛ ባሼና ሃኪሲ ዱማሳኔ፤

ዔያቶኮ ዒዚ ጊንፆ ሃንቲ ሺኢቂንቴቴያ ላጌ ዒዛኮ ባኣያ ማዓኔ።

ዔራቶ ኮሺ ዶዲሺ ዓርቃሢ ዖርጎጫኔ።

ሉኡዙሞ ጌስታሢያ ባይሲንታ ሄላኔ።

ዓይሌ ማዔ ዓሳ ዔያቶ ዎይሣ ዓሶ ሺሪ ዎይሣያ ማዒፃ ዎዚ ፑርታይ?

ዻቤ ዓሲም ዓቶም ጌይሢያ ዒኔና ዓኣ ዓሲ ማዒሢኬ።

ካኣቶ ቤርታ ዓሲ ማዒ ጴዺፃ ጋዓንቴ

ማኣቲ ዓኣዒሳ ዖልኬጉዲኬ።

ጎሪንቲ ሺራ ማቻ ፆዻ ማኣሪጉዲኬ።

ማሊ ጶቂሣ ማቾ ዒንጋሢ ጋዓንቴ ናንጊና ናንጋ ጎዳ ሌሊኬ።

ዬያሮ ቤልፃ ዓሲ ናናይዺንታኔ።

ዒዛኮ ቃኣሎ ቶኦቻሢ ጋዓንቴ ባይቃኔ።

ናንጊና ናንጋ ጎዳኣ ዒ ማዼ ኮዦ ማዾ ዛሎ ጪጋኔ።

ኔ ሻርሺባኣቶ ጋዓንቴ ባይሲንታም ኔ ዔያቶ ዓኣሢ ዒንጌያ ማዓኔ።

ፔቴና ሜታሢዳፓ ኬሳኒ ኔ ዒዛ ማሌያታቴ

ሜሌ ዎዴናኣ ዒማይዲፃ ኔኤኮ ዓታዓኬ።

ናንጊቤቃ ዔራቶ ዴንቂሢ ኔ ዓታዓኬ።

ማዺንቲ ኩማሢ ጋዓንቴ ናንጊና ናንጋ ጎዳ «ማዖንጎ» ጋዓዛኬ።

ሉኡዚ ዓሲ ማዒሢዳፓ ማንቆ ዓሲ ማዒሢ ባሼኬ።

ሜታ ኔና ሄሊባኣንቴ ዎዛዺ ኮሹሞና ኔኤኒ ናንጋንዳኔ።

ሜሌዓቴም ዔያታ ዓንዳ ኩጮ ዳኬሢ

ማሂ ዔኪ ካሦ ኩኡሊፃ ዔያቶ ባባሻኔ።

ማሊ ጶቂሣ ዓሲ ጎሪ ኔ ዞሬቴ ባሼ ዔራቶ ቃሳኔ።

ፔኤኮ ዒንዶዋ ማኣራፓ ዳውሳኔ።

ኔ ዔራ ዔራቶታዖ ዑኬና ዋሊ ኔ ዻቢንታንዳኔ።

ሉኡዙሞና ማርካዻ ዓሲ ዓኣቶ

ፒዜ ዎጌ ባይቃኔ።

ዋይዚ ዒፃ ዓሳኣ ፑርቱሞ ማዾ ሚርጊሻኔ።

ዔኤዮ ዓሶማኣ ዢራፓና ጳዺ ጊኢጊንቴኔ።