35
ዳውቴ ዓይኑሞ
ሜታዼ ዓሲ ሺኢቄ ሺኢጲሢ
1 ናንጊና ናንጋ ጎዳሢዮ! ታና ዒፂ ማካ ዓሶ ኔ ማኬ፤
ታና ዖላ ዓሶዋ ኔኤኒ ዖሌ።
2 ኔኤኮ ዖሎ ዓንጋሞንታ ጊቲሞንታ ዓርቄ፤
ሙኪያ ታና ማኣዴ።
3 ዒፂ ታና ዳውሳ ዓሶም
ኔኤኮ ዎርፆንታ ጬንቾ ዓፓሮንታ ቱጊ
«ታኣኒ ኔና ዓውሳሢኬ» ጌዒ ጎናሲ ኬኤዜ።
4 ታና ዎዻኒ ኮዓዞንሢም ቢያ
ቦርሲንቲና ዻውሲንቲና ማዖንጎ!
ታኣም ፑርታ ማዻኒ ዎሊና ዞርታዞንሢ ቢያ
ዻውሲንቲ ጊንሢም ማዖንጎ!
5 ናንጊና ናንጋ ጎዳኮ ኪኢታንቻ ዔያቶ ዳውሳኣና
ዢባሬ ፒፂ ዔኪ ዓኣዻ ዱባጉዲ ዔያታ ማዖንጎ!
6 ናንጊና ናንጋ ጎዳኮ ኪኢታንቻ ዔያቶ ዳውሳኣና
ጎይፃ ዔያቶሲ ዹሜያና ሃሊፃያና ማዖንጎ!
7 ታኣኒ ዔኤቢ ፑርቲሴ ባኣዚ ባኣንቴ
ፒሮ ዔያታ ታኣም ዓኣቺ ፒሬኔ፤
ታና ሎንሣኒ ዔቴያ ቦኦኬኔ።
8 ዔያታ ማሊባኣ ባይሲንታ ዔያቶ ሄሎም፤
ዔያታ ዓኣቼ ፒራሢ ዔያቶ ዓርቆም፤
ዔያታ ቦኦኬ ዔቶይዳ ፔኤሮ ሎኦሞንጎ!
9 ሼምፔላ ታኣኮ ናንጊና ናንጋ ጎዳሢና ዎዛዻኔ፤
ዒዚ ዓውሴሢሮ ሚርጌና ዎዛዻኔ።
10 ናንጊና ናንጋ ጎዳሢዮ! ኔኤኒ ማዤ ታኣኮ ዑፃ፦
«ሄርቂንቲ ዎርቃ ዓሶ ሄርቃ ዓሶይዳፓ ዓውሳያ
ማንቆ ዓሶንታ ሜታዻ ዓሶንታ ቡራ ዓሶይዳፓ ካፓያ
ኔጉዴያ ዖኦኒ ዓኣይ?» ጋዓኔ።
11 ፑርቶ ዓሳ
ታኣኒ ማዺባኣ ዻቢንቲሮ ዎጌና ታና ዓይሢሴኔ፤
ታኣኒ ዔሩዋ ባኣዚ ሉኡዙሞና ታ ዑፃ ማርካዼኔ።
12 ታኣኒ ኮሺ ማዼሢ ዛሎ ፑርታ ታኣም ዔያታ ማሄኔ፤
ታና ታኣሮ ሌሊ ማሂ ዔያታ ሃሼኔ።
13 ታኣኒ ጋዓንቴ ዔያታ ሃርጊንቴ ዎዶና ሲዬ ፓቲሌ ማይንቴኔ፤
ታኣኮ ዑፆዋ ሙዖ ሃሾ ዳምቦና ታ ዖኦፒሴኔ፤
ታኣኒ ሺኢቄ ሺኢጲፃ ዋይዚንቱዋያ ማዒ ዓቴኔ።
14 ታኣኒ ዖዬ ዖዪፃ
ታኣኮ ላጌም ጊንሣ ሃሣ ጌርሲም ዖያያጉዲኬ፤
ዒንዳ ሃይቄ ዓሲ ዖያሢጉዲ
ታኣኒ ሱሊ ዴዒ ዬኤኬኔ።
15 ታኣኒ ዹቂንቴ ዎዶና ዔያታ ዎዛና ቡኬኔ፤
ታኣኒ ዔሩዋ ጌኔ ማዻ ዓሲ ሙኪ
ታና ሚኢጫዖ ጋፒ ዒፄኔ።
16 ፑርቶ ማዻ ዓሳ ማዻ ጎይፆ
ፑርቱሞና ታና ሚኢጪ
ሃኣሚያ ታኣም ዔያታ ዻዔኔ።
17 ናንጊና ናንጋ ጎዳሢዮ!
ዎማ ሄላንዳኣና ዚቲዮ ጌይ ኔ ታና ዛጋይ?
ዔያቶኮ ፑርቶ ማዻፓ ታና ዓውሴ፤
ሃንሢ ዞቦጉዲ ቂኢሮንሢዳፓ ኔ ታና ካፔ!
18 ሚርጌ ቡኬ ኔ ዴሮ ባኣካ ታኣኒ ኔና ጋላታንዳኔ፤
ዬያ ቡኬ ዓሶ ቤርታ ታ ኔና ቦንቻንዳኔ።
19 ዔኤቢ ማዺንቴ ባኣዚ ባኣንቴ ታና ዒፃ ታ ሞርካ
ታ ሜቶ ዛጊ ዎዛዻንዳጉዲ ማሂፖ፤
ዔያታ ታና ዓኣፒ ዎዺ ዓማሊ ሺራንዳጉዲ ሃሺፖ። 35፡19 ዓይኑ. 69፡4፤ ዮሃ. 15፡25።
20 ዔያታ ጌስታ ጌኤዛ ሞርኬ ጌስታንዳ ጌኤሲኬ፤
ኮሺ ዓሲ ዑስካ ጌኔ ማሊሢ ማሊ ዔያታ ቱካኔ።
21 «ሂዮ! ቃራ!
ኑኡኒ ኑ ቶኦኪና ኔ ማዼሢ ዛጌኔ!»
ጌዒ ጌዒ ዒላቲና ቶኦኪ ዔያታ ታኣኮ ባይዜኔ።
22 ናንጊና ናንጋ ጎዳሢዮ!
ኔኤኒ ዬያ ዛጌኔ፤
ዬያሮ ናንጊና ናንጋ ጎዳሢዮ!
ኔኤኒ ዚቲዮ ጌዒፖ! ታ ኮራፓኣ ሃኪፖ!
23 ታኣኮ ናንጊና ናንጋ ጎዳ ማዔ ፆኦዛሢዮ!
ታ ዛሎ ኔኤኒ ሞኦቲንቴ፤
ዎጊያ ታኣም ዎጌ።
24 ናንጊና ናንጋ ጎዳ ማዔ ታ ፆኦዛሢዮ!
ኔኤኮ ፂሉሞጉዴያ
ጎኑሞና ታኣም ዎጌ፤
ታ ሞርካ ታ ሜቶና ዎዛዻንዳጉዲ ማሂፖ።
25 «ሂዮ! ቃራ! ኑ ማሊፆጉዲ ማዔኔ!» ጌዒ ዔያታ ማላንዳጉዲ
ጊንሣ ሃሣ «ኑኡኒ ዒዛ ባሼያንቴ!» ኔኤኒ ዔያቶ ጌይሲፖ።
26 ታና ሄሌ ሜታሢና ዎዛዺ ቶኦቺሢና ዛጋ ዓሳ ቢያ
ቦርሲንቶንጎ፥ ዔርቶ ዒፂ ካራ ዔያቶም ባይቆንጎ፤
ታ ዑፃ ፔና ዼግ ዼጊዳዞንሢ ቢያ
ቦርሲንቲ ዻውሲንቶንጎ።
27 ታኣኮ ባሺፃ ዎዛሳ ዓሳ ቢያ ዎዛዾንጎ፤
«ናንጊና ናንጋ ጎዳ ዼኤፒኬ!
ዒዛም ማዻ ዓይላሢም ዔባ ቢያ ጊኢጋዛ
ናንጊና ናንጋ ጎዳኣ ዎዎዛሳኔ!» ጎዖንጎ።
28 ታኣኮ ዻንጋ ሮኦሮ ጉቤ
ኔኤኮ ፂሉሞና ጋላቶና ዛላ ኬኤዛኔ።