96
ፆኦሲ ቢያሢኮ ዑፃ ማዔሢ
(1ፆኦሲ. ዓሃኬ 16፡23-33)
1 ናንጊና ናንጋ ጎዳም ዓኪ ዓይኑሞ ዓይናዹዋቴ!
ዓጫ ቢያ ናንጊና ናንጋ ጎዳም ዓይናዹዋቴ!
2 ናንጊና ናንጋ ጎዳም ዓይናዹዋቴ፥ ዒዛኮ ሱንፆ ዓንጁዋቴ፤
ዒዛኮ ዓውሲፆ ጉቴ ጉቴ ኬኤዙዋቴ።
3 ቦንቾ ዒዛኮ ዴሮ ባኣካ
ዲቃሢ ሄርሺሳ ማዾዋ ዓሲ ቢያ ቤርታ ኬኤዙዋቴ!
4 ናንጊና ናንጋ ጎዳ ዼኤፒኬ፤
ዒዛ ሄርሻኒያ ኮይሳያኬ፤
ሜሌ ካኣሽኮ ፆኦዛፓ ቢያ ዑሣ
ዒዚ ዒጊጪንታንዳያ ኮይሳኔ።
5 ሜሌ ዴሮ ፆኦዛ ቢያ ፃላሄሮኬ፤
ናንጊና ናንጋ ጎዳ ጋዓንቴ ጫሪንጮ ማዤኔ።
6 ቦንቾና ዼኤፑሞዋ ዒዛ ኮራኬ፤
ዒዛኮ ጌኤዦ ማኣራ ዶዱሞና ሚዛጱሞና ዓኣኔ።
7 ሳዖይዳ ናንጋ ዴራ ናንጊና ናንጋ ጎዳ ጋላቱዋቴ!
ዒዛኮ ቦንቾና ዎልቆናሮ ዒዛ ጋላቱዋቴ።
8 ናንጊና ናንጋ ጎዳ ሱንፆም ቦንቾ ዒንጉዋቴ፤
ዒንጎ ባኣዚ ዓርቂ ዒዛኮ ዓሳ ቡካ ጶኦኮ ጌሉዋቴ።
9 ዒዛኮ ዱማዼያ ማዔ ዼኤፑሞሮ ዒዛም ዚጉዋቴ፤
ሳዓ ቢያ ዒዛ ቤርታ ጎጋይቁዋቴ።
10 ዴሮ ቢያሢ ባኣካ፦ «ናንጊና ናንጋ ጎዳ ካኣታዼኔ!» ጎዑዋቴ፤
ሳዔላ ዶዲና ማዢንቴሢሮ ዓጊፃዓኬ፤
ዓሲም ቢያ ዒ ፒዙሞና ዎጋኔ።
11 ጫሪንጫ ዎዛዹዋቴ! ሳዔሌ ኔኤኒያ ዎዛዼ!
ባዞንታ ዬያይዳ ዓኣ ባካ ቢያ ዑኡዞ ዋይዚሱዋቴ።
12 ጎዦንታ ጊዳ ዓኣ ባካኣ ቢያ ፂኩዋቴ!
ያዺ ማዓዛ ካዮ ሚፃ ቢያ ዎዛና ዓይናዻንዳኔ።
13 ዒዚ ሙካንዳኔ፤
ናንጊና ናንጋ ጎዳ ቤርታ ዔያታ ዓይናዻንዳኔ፤
ሳዖይዳ ዎጋኒ ዒ ሙካንዳኔ፤
ሳዖይዳ ፂሉሞና ዴሮ ዑፃ ጎኑሞና ዎጋንዳኔ።