145
ዳውቴ ዓይኑሞ
ጋላታ ዓይኑሞ
1 ታ ፆኦዛሦ፥ ታ ካኣቲዮ!
ታ ኔኤኮ ዼኤፑሞ ሄርሺ ኬኤዛንዳኔ፤
ናንጊና ታ ኔ ሱንፆ ጋላቴ ጎይሣ ናንጋንዳኔ።
2 ቢያ ኬላ ኬላ ታ ኔና ጋላታንዳኔ፤
ናንጊና ታ ኔኤኮ ሱንፆ ቦንቼ ጎይሣ ናንጋንዳኔ።
3 ናንጊና ናንጋ ጎዳ ዼኤፒኬ፤
ፑኡፒ ጋላታ ዒዛም ኮይሳያኬ፤
ዒዛኮ ዼኤፑማ ዓሲ ዔራኒ ዳንዳዓያይዳፓ ዑሣኬ።
4 ዎዶና ዎዶና ኬስካ ዓሳ ኔኤኮ ማዾ
ሄሊሲ ሙካ ዓሶም ኬኤዚ ዔርዛንዳኔ፤
ኔኤኮ ዲቃሢ ሄርሺሳ ማዾዋ ፔጋሲ ዔያታ ኬኤዛንዳኔ።
5 ዴራ ኔኤኮ ቦንቾንታ ቦንቺንቶኮዋ ዼኤፑሞ ኬኤዛንዳኔ፤
ታኣኒያ ኔኤኮ ዲቃሢ ሄርሺሳ ማዾ ማሊ ማሊ ናንጋንዳኔ።
6 ዴራ ኔኤኮ ዲቃሢ ሄርሺሳ ዼኤፖ ማዾ ዛሎ ኬኤዛንዳኔ፤
ታኣኒያ ኔኤኮ ዼኤፖ ማዾ ሄርሺ ዼጊዲ ኬኤዛንዳኔ።
7 ዔያታ ኔኤኮ ኮሹሞ ሚርጊፆ ኬኤዛንዳኔ፤
ኔኤኮ ፂሉሞ ዎልቆ ዛሎ ዼግ ጌዔ ዑኡሲና ዓይናዻንዳኔ።
8 ናንጊና ናንጋ ጎዳ ኮሺ፥ ሃሣ ሚጪንታያኬ፤
ዻጋዻኒ ሩኡሩዋያ፥ ናሹማኣ ናንጊና ጋፑዋያኬ።
9 ዒዚ ቢያ ባኮም ኮሺኬ፤
ዒ ማዤ ባኮ ቢያ ሚጪንታያኬ።
10 ናንጊና ናንጋ ጎዳሢዮ!
ኔ ማዤ ባካ ቢያ ኔና ጋላታንዳኔ፤
ኔኤም ዱማዼ ኔ ዴራ ቢያ ኔና ዼኤፒሲ ሄርሻንዳኔ።
11 ኔኤኮ ካኣቱሞ ቦንቾ ዛሎ ኬኤዛንዳኔ፤
ኔኤኮ ዎልቆ ዛሎዋ ሄርሺ ጌስታንዳኔ።
12 ዬያይዲ፥ ዓሲ ቢያ
ኔ ዎልቆና ኔኤኒ ማዼ ዼኤፖ ማዾንታ
ጊንሣ ሃሣ ኔኤኮ ካኣቱሞ ቦንቾ ዼኤፑሞዋ ዔራንዳኔ።
13 ኬስካ ዎዶ ቢያይዳ ዎይሣ ካኣታሢ ኔናኬ፤
ኔኤኮ ካኣቱማ ናንጊና ባይቁዋያኬ።
ናንጊና ናንጋ ጎዳ ጋዓ ባኮ ጉሙርቂንቲ ኩንሣያኬ፤
ዒዚ ማዻ ባካ ቢያ ኮሺኬ።
14 ሎኦማኒ ቡኡዲንታ ዓሶ ዒ ኬኤሊንቃኔ፤
ሳዓ ሎኦሚ ዓኣ ዓሶዋ ዔቂሳኔ።
15 ቢያሢ ጉሙርቂ ኔና ዛጋኔ፤
ኔኤኒያ ዔያቶም ኮይሳ ዎዶና
ዔያታ ሙዓንዳ ሙዖ ዒንጋኔ።
16 ኔኤኒ ኔኤኮ ኩጮ ቡሊ
ፔቴ ፔቴ ሼምፔና ዓኣ ባኮም
ኮይሳ ባኮ ዒንጊ ዒኖ ዔያቶኮ ሃውሺሳኔ።
17 ናንጊና ናንጋ ጎዳ ማዻ ባኮና ቢያ ፂሎኬ፤
ጊንሣ ሃሣ ኮሺኬ።
18 ናንጊና ናንጋ ጎዳ ዒዛ ሺኢቃዞንሢም ቢያ
ጎኔ ዒኔፓ ሺኢቃዞንሢም ቢያ ዒ ዑኬኬ።
19 ቦንቺ ዒዛ ዒጊጫዞንሢም
ኮይሳ ባኮ ቢያ ዒዚ ዒንጋኔ፤
ሜታዺ ዒላታ ዒላቶዋ ዋይዚ ዔያቶ ማኣዳኔ።
20 ዒዛ ናሽካዞንሢ ቢያ ዒ ፑርታፓ ካፓኔ፤
ፑርቶ ዓሶ ጋዓንቴ ዒዚ ዎዺ ባይዛኔ።
21 ታኣኒ ቢያ ዎዴ ናንጊና ናንጋ ጎዳ ጋላታንዳኔ፤
ዒዚ ማዤ ባካ ቢያ
ዒዛኮ ዱማዼ ጌኤዦ ሱንፆ ሄርሺ ሄርሺ ናንጎንጎ።