ዓይኑሞ ማፃኣፖ.
52.
ፆኦሲኮ ዎጎና ኮሹሞና ዔዞ ዎልቆሶ ፑርቱሞና ዓይጋ ኔ ጪኢዺንታይ? ፆኦሲ ዓኣፓ ኔኤኒ ቶኦቺንቴያታዖ ቢያ ዎዴ ዎይቲ ኔ ዖቶርቃይ? 
ኔኤኒ ጌሺሢ ታኣኮ ማዾኬ ጌዒ ዓርቄሦ ዻንጋ ኔኤኮ ዓጬ ሺጊሬጉዲ ባይሲንታ ሱኪ ሺራኔ። 
ኮሹሞይዳፓ ባሼ ፑርቱሞ ጎኑሞይዳፓ ሉኡዙሞ ባሼ ኔኤኒ ዶኦራኔ። 
ኔኤኒ ዓሶ ጌሻ ዓሢ ዓሲ ማኣሳንሦንዶ ጎይሢ ጌስታኒ ናሽካኔ። 
ዬያሮ ፆኦሲ ኔና ጋፒ ባይዛንዳኔ፤ ኔ ማኣራፓ ኬሲ ኔና ዒዚ ዳውሳንዳኔ፤ ዓሳ ናንጋ ሳዓፓ ኔና ቱጊ ኬኤራንዳኔ። 
ፂሎ ዓሳ ዬያ ዛጊ ዒጊጫንዳኔ፤ ሚኢቺያ ሂዚ ጌዒ ዔያታ ሚኢጫንዳኔ፦ 
«ፆኦሲ ፔኤኮ ጊቲማጉዲ ማሂባኣ ፔ ቆሎ ሚርጉሞና ሄርሺንቴ ፔ ፑርቱሞናኣ ዶዴ ሃያ ዓሢ ዛጉዋቴ።» 
ታኣኒ ጋዓንቴ ፆኦሲ ማኣሮይዳ ዋርቂ ዓኣ ዛይቶ ሪሚቶጉዲኬ፤ ዒዛኮ ጋፑዋ ናሹሞ ናኣናና ታ ጉሙርቄ ጎይሣ ናንጋንዳኔ። 
ፆኦሲዮ! ኔኤኒ ማዼ ኮዦ ባኮሮ ቢያ ናንጊና ታ ኔና ጋላታኔ፤ ሱንፃ ኔኤኮ ኮሺታሢሮ ኔ ሱንፆ ታ ሃጋኣ ዎዛ ማሃኔ፤ ኔኤም ዱማዼ ዓሶ ባኣካ ታ ኔና ጋላታኔ።