ዓይኑሞ ማፃኣፖ.
101.
ካኣታ ፆኦሲም ጫኣቃ ጫኣቁሞ ኔኤኮ ሚጪንቲፆና ፒዜ ዎጊፆና ዛሎ ታ ዓይናዻኔ፤ ናንጊና ናንጋ ጎዳሢዮ! ጋላታ ዓይኑሞ ታ ኔኤም ሺኢሻኔ። 
ዻቢንቲባኣ ጎይፄሎ ዶዲሺ ታ ዓርቃንዳኔ፤ ኔኤኒ ታ ኮራ ዓይዲ ዬዓንዳይ? ታ ማኣሮ ዓሶና ዎላ ፒዜ ዒኔና ታ ናንጋንዳኔ። 
ፑርታ ባኣዚ ማዺንቴም ታ ዛጊ ዚቲ ጋዓዓኬ፤ ፆኦሲዳፓ ሃኬ ዓሳ ማዻ ባኮ ቢያ ታ ዒፃኔ፤ ፔቴታዖ ታ ዔያቶና ዎላ ካኣማዓኬ። 
ዎቦ ዒና ዓኣ ዓሳ ታ ኮራፓ ሺኢኮንጎ፤ ፑርቱሞና ዎላ ታኣኮ ፔቱሞ ባኣሴ። 
ፔ ላጋሢ ካሽካሺ ዾንካሢ ታ ጎራኔ፤ ዖቶርቃ ዓኣፒና ሄርሺንታ ዒኔያ ዓኣ ዓሢ ታ ቲኢሩዋሴ። 
ታኣና ዎላ ናንጋንዳጉዲ ታኣኮ ዓኣፓ ሳዖይዳ ጉሙርቂንታዞንሢዳኬ፤ ጌኤሺ ጎይሢና ሃንታሢ ዒዚ ታኣም ማዻንዳኔ። 
ጌሻያ ማዔ ዓይጎ ዓሲያ ታ ማኣሮይዳ ናንጋዓኬ፤ ሉኡዙሞ ጌስታሢያ ታ ቤርታ ፒዝ ጌዒ ዔቃዓኬ። 
ሳዖይዳ ፑርቶ ማዻ ዓሶ ቢያ ጉቴ ጉቴ ታ ባይዛንዳኔ፤ ፑርቶ ማዻ ዓሶ ቢያ ናንጊና ናንጋ ጎዳ ካታማፓ ታ ጋፒሳንዳኔ።