ዓይኑሞ ማፃኣፖ.
119.
ናንጋ ናንጎና ዔኤቢ ቦሂሳ ባኣዚ ባኣዞንሢ ናንጊና ናንጋ ጎዳ ዎጎና ሃንታዞንሢ ዓንጂንቴያኬ። 
ዒዛኮ ዓይሢፆ ካፓዞንሢ ፔኤኮ ጎኔ ዒናፓ ኮዓዞንሢ ዓንጂንቴያኬ። 
ዻቢንቲ ባኣዚ ዔያታ ማዹዋሴ፤ ጋዓንቴ ዒዛ ጎይፆና ዓኣዻኔ። 
ዛጊ ኑ ካፓንዳጉዲ ዳምቦ ኔኤኮ ኔ ኑና ዓይሤኔ። 
ዳምቦ ኔኤኮ ኑ ካፓንዳጉዲ ጎይፃ ታኣሲ ዶዲ ታኣም ማዔቴ ዓይጎ! 
ኔ ዓይሢፆ ባንሢ ታ ዛጋኣና ቦርሲንቱዋሴ። 
ኔኤኮ ፂሉሞ ዎጎ ታ ዔራ ዎዶና ፒዜ ዒኔና ጋላታ ታ ኔኤም ሺኢሻንዳኔ። 
ዎጎ ኔኤሲ ታ ካፓንዳኔ፤ ኔኤኒ ታና ጋፒ ሃሺፖ። 
ዼጌሢ ጎይፆ ፔኤሲ ዎማይዲ ጌኤሻንዳይ? ኔኤኮ ቃኣላ ጋዓ ጎይፆ ናንጊሢናኬ። 
ታኣኒ ጉቤ ዒናፓ ኔና ኮዔኔ፤ ኔ ዓይሢፃፓ ታ ዓጊፁዋጉዲ ታና ካፔ። 
ታ ኔኤም ዋይዞ ዒፂ ዻቢንቱዋጉዲ ቃኣሎ ኔኤሲ ታ ዒና ታኣኒ ዓኣቼኔ። 
ናንጊና ናንጋ ጎዳሢዮ! ኔኤኒ ዓንጂንቴያኬ፤ ዳምቦ ኔኤሲ ኔ ታና ዔርዜ። 
ኔ ዻንጋፓ ኬስካ ዎጎ ቢያ ታ ዻንጎና ታኣኒ ኬኤዛንዳኔ። 
ዓሲ ፔ ቆሎና ዎዛዻሢጉዲ ኔ ዓይሢፆጉዴያ ሃንቲፃ ታና ዎዎዛሳኔ። 
ኔኤኮ ዳምቦ ታኣኒ ታ ዒኖና ማላኔ፤ ዒኖ ታኣሲ ታኣኒ ኔ ጎይፃ ማሄኔ። 
ዳምባ ኔኤሲ ታና ዎዛሳኔ፤ ቃኣሎዋ ኔኤኮ ታ ዋሉዋሴ። 
ናንጊና ናንጋኒ ቃኣሎ ኔኤኮ ታ ካፓንዳንጉዲ ታና ኔኤኮ ዓይላሢም ኮሺ ማዼ። 
ኔኤኮ ዎጋፓ ዲቃሢ ሄርሺሳ ባኣዚ ታ ዛጋንዳጉዲ ዓኣፖ ታኣሲ ቡሌ። 
ታኣኮ ሳዖይዳ ቤሲባኣ ዓሲኬ፤ ኔኤኮ ዓይሢፆ ታ ጊዳፓ ዓኣቺፖ። 
ቢያ ዎዴ ዎጎ ኔኤኮ ጶቂሥሢና ሼምፓሢ ታኣኮ ኮሺ ዶጬኔ። 
ኔኤኮ ዓይሢፆይዳፓ ዻቢንቴዞንሢ ሄርሺንታዞንሢና ጋዳንቂንቴዞንሢና ኔ ጎራኔ። 
ኔኤኮ ዓይሢፆ ታ ካፔሢሮ ዔያቶኮ ጫዦና ቶኦቺፆና ታኣፓ ሺኢሼ። 
ዎይሣ ዓሳ ዴዒ ታና ባይዛኒ ዞርቴያታቴያ ኔኤኮ ዓይላሢ ዳምቦ ኔኤሲ ዒኖና ማላኔ። 
ዓይሢፃ ኔኤኮ ታኣም ዎዛኬ፤ ዞሪያ ታና ዞራያኬ። 
ታኣኒ ሳዖ ዓጮና ፔቴ ማዒ ዓዺንቴኔ፤ ኔኤኮ ቃኣሎ ጉዴያ ሼምፔና ማሂ ታና ጌሤ። 
ታ ናንጎ ጎይፆ ታ ኔኤም ኬኤዜኔ፤ ኔኤኒ ታኣሲ ዋይዜኔ፤ ዳምቦ ኔኤኮ ታና ዔርዜ። 
ኔ ዳምቦ ማሊ ታ ጶቂሣንዳጉዲ ታና ማሄ፤ ታኣኒያ ኔኤኮ ዲቃሢ ሄርሺሳ ማዾ ማላኔ። 
ማሊፃፓ ዔቄያና ዒና ታኣኮ ላቤኔ፤ ኔ ቃኣሎ ጉዴያ ታና ዶዲሼ። 
ሉኡዙሞ ታ ጊዳፓ ሺኢሼ፤ ኔ ኮሹሞና ዎጎ ኔኤሲ ታና ዔርዜ። 
ታኣኒ ጉሙርቂንታያ ማዓኒና ዎጎዋ ኔኤሲ ካፓኒ ጋፒ ታ ዔቄኔ። 
ናንጊና ናንጋ ጎዳሢዮ! ኔ ዎጎ ታኣኒ ዶዲሺ ዓርቄኔ፤ ሃዳራ ታና ቦርሲሲፖ። 
ታ ዒኖ ዓርቃ ባኣዚፓ ኔ ኬሴሢሮ ኔ ዓይሤ ጎይፆና ታ ጳሽካንዳኔ። 
ናንጊና ናንጋ ጎዳሢዮ! ኔ ዎጎ ጎይፆ ታና ዔርዜ፤ ታኣኒያ ጋፒንፆ ሄላንዳኣና ካፓንዳኔ። 
ዎጎ ኔኤሲ ታ ካፓንዳጉዲና ጉቤ ዒናፓ ታ ዓይሢንታንዳጉዲ ማሊ ጶቂሥሢ ኔ ታኣም ዒንጌ። 
ዬያና ታ ዎዛዻሢሮ ኔ ዓይሢፆ ጎይፆ ዔኪ ታና ዓኣዼ። 
ታኣም ኮይሳ ባኣዚዳ ጎጋይቂሢዳፓ ባሼ ዒኖ ታኣሲ ኔ ዓይሢፆ ባንሢ ማሄ። 
ዔኤቢ ፓሡዋ ባኣዚ ዛጊሢፓ ዓኣፖ ታኣሲ ማሄ፤ ኔኤኮ ቃኣሎ ጉዴያ ናንጎ ታኣኮ ዓካሴ። 
ኔ ዒጊጪንታያ ማዓንዳጉዲ ታና ኔ ዓይላሢም ኔ ዒንጌ ዎዞ ቃኣሎ ማዺ ኩንሤ። 
ዎጋ ኔኤሲ ፒዜ ማዔሢሮ ታ ዒጊጫ ዻውሲንታፓ ታና ካፔ። 
ዓይሢፆ ታ ኔኤኮ ካፓኒ ኮዓኔ፤ ኔኤኒ ፂሎ ማዔሢሮ ናንጎ ታኣኮ ዓካሴ። 
ናንጊና ናንጋ ጎዳሢዮ! ሚጪንቲፃ ኔኤኮ ታ ባንሢ ሙኮንጎ፤ ኔኤኮ ዓውሲፃኣ ኔ ቃኣሎጉዴያ ታኣም ዳኪንቶንጎ። 
ኔ ቃኣሎ ታ ጉሙርቃሢሮ ታና ጫሽካ ዓሶም ማሂ ታ ኬኤዛንዳኔ። 
ዎጎ ኔኤኮ ታ ጉሙርቃኔ፤ ጎኑሞ ሃይሴ ታ ዻንጋፓ ፔቴታዖ ሺኢሺፖ። 
ናኣናና ናንጊ ሄላንዳኣና ቢያ ዎዴ ዎጎ ታ ኔኤሲ ካፓንዳኔ። 
ዳምቦ ታ ኔኤኮ ኮዓኔ፤ ታ ሼኖጉዴያ ሃንጋ ሴካ ታ ሃንታንዳኔ። 
ዓይሢፆ ኔኤኮ ታኣኒ ካኣቶም ኬኤዛንዳኔ፤ ዬያ ታ ማዼሢሮ ቦርሲሳ ባኣዚ ታና ባኣሴ። 
ታ ኮሺ ናሽካ ኔ ዓይሢፆና ዎዛዻኔ። 
ኩጮ ታኣሲ ታኣኒ ናሽካ ኔ ዓይሢፆ ባንሢ ዔቂሳኔ፤ ዳምቦዋ ኔኤሲ ማሊ ታ ጶቂሣኔ። 
ሃጋኣ ዎዛ ታ ማሃሢ ዬያይዳ ማዔሢሮ ታና ኔኤኮ ዓይላሢም ኔ ዒንጌ ቃኣሎ ማሌ። 
ኔኤኮ ቃኣላ ታና ናንጋያ ማሃኔ፤ ዬይ ታኣኮ ሜታሢ ዎዶና ዶዱሞ ማዓያኬ። 
ዖቶርቃ ዓሳ ሚርጌና ታና ሚኢጬኔ፤ ታኣኒ ጋዓንቴ ኔኤኮ ዎጋፓ ዓጊፃዓኬ። 
ናንጊና ናንጋ ጎዳሢዮ! ሚናፓ ዓኣ ዎጎ ኔኤኮ ታ ማሌኔ፤ ዬያና ታኣኒ ታና ዶዲሼኔ። 
ዎጎ ኔኤሲ ሃሼ ፑርቶ ዓሶይዳፓ ዔቄያና ዻጋሲ ታና ዻጋሳኔ። 
ታኣኮ ሾኦቹሞ ዓጫ ዳምባ ኔኤሲ ታኣኮ ዓይኑሞኬ። 
ናንጊና ናንጋ ጎዳሢዮ! ዋንቶና ሱንፆ ኔኤኮ ታ ማላኔ፤ ዎጎ ኔኤሲያ ታ ካፓኔ። 
ኔ ዳምቦ ጎይፆ ታ ሃንታኔ፤ ዬይ ታኣኮ ማዾ ማዔኔ። 
ናንጊና ናንጋ ጎዳሢዮ! ታኣኒ ኮዓሢ ኔና ሌሊኬ፤ ኔኤኮ ዎጎዋ ካፓኒ ታ ጫኣቃኔ። 
ጉቤ ዒናፓ ታ ኔ ዓኣፖ ካሮ ኮዔኔ፤ ኔኤኮ ቃኣሎጉዴያ ኮሹሞ ኔኤሲ ታና ዻዌ። 
ታኣኒ ጎይፆ ታኣሲ ዛጌኔ፤ ታ ሃንቲፆዋ ኔ ዓይሢፆ ባንሢ ታ ማሄኔ። 
ኔ ዓይሢፆ ታኣኒ ካፓኒ ሩኡሬኔ፤ ኔጊያ ታ ኔጉዋሴ። 
ፑርቶ ዓሶኮ ሱዛ ታና ማሬኔ፤ ታኣኒ ጋዓንቴ ዎጎ ኔኤሲ ዋሊባኣሴ። 
ኔኤኮ ፂሎ ዎጎ ዛሎሮ ሳዖኮ ጊዲሚዣ ኔና ጋላታኒ ታ ዔቃኔ። 
ታኣኒ ኔና ዒጊጫዞንሢም ቢያ ዳምቦዋ ኔኤሲ ካፓዞንሢኮ ታ ላጌኬ። 
ናንጊና ናንጋ ጎዳሢዮ! ሳዓ ኔኤኮ ሚጪንቲፆና ኩሜኔ፤ ዳምቦዋ ኔኤሲ ታና ኔ ዔርዜ። 
ናንጊና ናንጋ ጎዳሢዮ! ኔኤኮ ቃኣሎጉዴያ ኔ ዓይላሢም ኮሺ ባኣዚ ኔ ማዼኔ። 
ኔኤኮ ዓይሢፆ ታ ጉሙርቃኔ፤ ኮሺ ማሊሢንታ ዔራቶዋ ታና ዔርዜ። 
ኔ ታ ጊዳ ሜቶ ዓጋንዳሢኮ ቤርታ ጎይፆ ዻቢ ታ ዓኣዼኔ፤ ሃሢ ጋዓንቴ ቃኣሎ ኔኤኮ ታ ካፓኔ። 
ኔኤኒ ኮሺኬ፥ ኔ ማዻ ባካኣ ኮሺኬ፤ ዬያሮ ዳምቦ ኔኤሲ ታና ዔርዜ። 
ዖቶርቃ ዓሳ ሱንፆ ታኣኮ ሉኡዙሞና ፑርቲሴኔ፤ ታኣኒ ጋዓንቴ ዓይሢፆ ኔኤኮ ጉቤ ዒናፓ ካፓኔ። 
ዒና ዔያቶኮ ባይቂ ዶጬያኬ፤ ታኣኒ ጋዓንቴ ኔ ዎጎና ዎዛዻኔ። 
ዳምቦ ኔኤሲ ታ ዔራንዳንጉዲ ሜታሢዴና ኬዛ ታኣም ኮሺ ማዔኔ። 
ፓይዲባኣ ቢራና ዎርቄናይዳፓ ባሼ ኔ ዻንጋፓ ኬስካ ዎጋ ታኣም ኮሺኬ። 
ኔ ኩጫ ታና ማዤኔ፥ ኮሺያ ታና ኮሼኔ፤ ኔኤኮ ዓይሢፆ ታ ዔራንዳጉዲ ማሊ ጶቂሥሢ ታኣም ዒንጌ። 
ኔኤኮ ቃኣሎ ሃጋኣ ዎዛ ማሂ ታ ጌሤሢሮ ኔና ዒጊጫዞንሢ ታና ዛጊ ዎዛዾንጎ። 
ናንጊና ናንጋ ጎዳሢዮ! ኔ ዎጋ ፂሎ ዎጌኬ፤ ኔ ታና ሜታሴሢያ ኔኤኮ ጉሙርቂንቲፆናታሢ ታ ዔሬኔ። 
ታና ኔኤኮ ዓይላሢም ኔ ጫኣቄ ጎይፆና ኔ ሚጪንቲፃ ታና ዶዲሻያ ማዖንጎ። 
ኔኤኮ ዎጋ ታኣኮ ዎዞኬ፤ ሼምፔና ታ ናንጋንዳጉዲ ኮሹማ ኔኤሲ ታኣም ሙኮንጎ። 
ዖቶርቃ ዓሳ ሉኡዙሞና ታና ሜቶይዳ ጌልዜሢሮ ቦርሲንቶንጎ፤ ታኣኒ ጋዓንቴ ዓይሢፆ ኔኤሲ ማላኔ። 
ኔና ዒጊጫዞንሢ ዓይሢፆዋ ኔኤሲ ዔራዞንሢ ሃንጋ ታ ባንሢ ሙኮንጎ። 
ታኣኒ ቦርሲንቱዋጉዲ ዒና ታኣኮ ኔ ዎጎ ካፒፆና ፒዜ ማዖንጎ። 
ታ ሼምፓሢ ኔ ዻቂሺፆ ሚርጌና ኮዔኔ፤ ቃኣሎ ኔኤኮ ታኣኒ ሃጋኣ ዎዛ ማሃንዳኔ። 
«ዓይዲ ኔ ታና ዶዲሻንዳይ?» ጌዒ ጌዒ ዓኣፓ ታኣኮ ኔ ቃኣሎ ካፒፆና ላቤኔ። 
ታኣኒ ጩቢዳ ሱፂንቴ ዎይኔ ዓርሦ ሱርባጉዲ ማዔያታቴያ ዳምቦ ኔኤኮ ታ ዋሊባኣሴ። 
ኔ ዓይላሢ ዎማ ሄላንዳኣና ሜታዺ ዴዓንዳይ? ታና ዳውሳዞንሢዳ ሜቶ ኔ ዓጋንዳሢ ዓይዲዳይ? 
ኔኤኮ ዎጋ ጋዓ ጎይፆ ዓኣዹዋያታዖ ዖቶርቃዞንሢ ዔቴ ታኣም ቦኦኬኔ። 
ዓይሢፃ ቢያ ኔኤኮ ጉሙርቂንታያኬ፤ ዓሳ ታና ታ ማዼ ባኣዚ ባኣንቴ ዳውሳሢሮ ኔኤኒ ታና ማኣዴ። 
ሳዖይዳፓ ዔያታ ታና ባይዛኒ ዻካ ዓቴኔ፤ ታኣኒ ጋዓንቴ ዓይሢፆ ኔኤሲ ሃሺባኣሴ። 
ኔ ሚጪንቲፆጉዴያ ጊንሣ ማሂ ታና ሼምፔና ጌሤ፤ ታኣኒያ ኔ ዓይሢፆ ካፓንዳኔ። 
ናንጊና ናንጋ ጎዳሢዮ! ቃኣላ ኔኤኮ ጫሪንጮይዳ ናኣናና ዶዲ ናንጋያኬ። 
ኔኤኮ ጉሙርቂንቲፃ ሾይንቲፓ ሾይንቲ ሄላንዳኣና ናንጋኔ፤ ሳዖ ኔ ማዤኔ፥ ዬይ ዶዲ ናንጋኔ። 
ቢያሢ ኔ ዓይሌ ማዔሢሮ ኔ ዎጋ ሃኖ ሄላንዳኣና ዶዲ ናንጋኔ። 
ዎጋ ኔኤሲ ታኣኮ ዎዛ ማዒባኣያታቴ ሜታሢ ዎዶና ታ ሄኤዶ ባይቄያ ናንዳኔ። 
ዬያና ኔ ታና ሼምፔና ማሄሢሮ ኔ ዓይሢፆ ፔቴታዖ ታኣኒ ዋላዓኬ። 
ታኣኒ ኔኤሮታሢሮ ሃዳራ ታና ዓውሴ! ኔኤኮ ዎጎዋ ታኣኒ ኮዔኔ። 
ፑርቶ ዓሳ ታና ባይዛኒ ካቴኔ፤ ታኣኒ ጋዓንቴ ዎጎ ኔኤሲ ማሌኔ። 
ፒዙሞኮ ቢያ ዛጲ ዓኣሢ ታ ዛጌኔ፤ ዓይሢፃ ጋዓንቴ ኔኤሲ ኮሺ ዳልጊኬ። 
ዎጎ ኔኤሲ ታ ኮሺ ናሽካኔ፤ ሮኦሮ ጉቤያ ታኣኒ ማላኔ። 
ኔኤኮ ዓይሢፃ ዓይጎ ዎዴናኣ ታኣፓ ዱማዹዋኣሢሮ ታ ሞርኮይዳፓ ባሼ ታና ኔ ማሊ ጶቂሣያ ማሄኔ። 
ኔ ዎጎ ታኣኒ ማላሢሮ ታና ዔርዛ ዓሶይዳፓ ባሼ ማሊ ጶቂሣ ዒኔ ታ ዔኬኔ። 
ኔኤኒ ኬሴ ዎጎ ጊንፆ ታ ዓኣዻሢሮ ጋርቼ ዓሶይዳፓ ባሼ ታኣኒ ዔራ ማዔኔ። 
ኔኤኮ ቃኣሎ ታኣኒ ካፓኒ ቶኮ ታኣኮ ታ ፑርታ ጎይሢዳፓ ቃዜኔ። 
ኔኤኒ ኔኤሮ ታና ዔርዜሢሮ ኔ ዎጎይዳፓ ታ ኬስኪባኣሴ። 
ቃኣላ ኔኤሲ ዎዚ ዓኣፃይ! ፆሎሊ ዔኤሲዳፓኣ ባሼ ዓኣፃኔ። 
ኔ ዎጎይዳፓ ማሊ ጶቂሥሢ ታኣኒ ዴንቄኔ፤ ዬያሮ ሉኡዙሞ ጎይፆ ቢያ ታኣኒ ዒፄኔ። 
ቃኣላ ኔኤሲ ታ ቶኮኮ ፆምፔ ታ ጎይፆኮዋ ፖዔኬ። 
ኔኤኮ ፂሎ ዎጎ ታኣኒ ካፓኒ ጫኣቄሢሮ ዬያ ታኣኒ ዶዲሺ ዓርቃንዳኔ። 
ሚርጌና ታ ሜታዼኔ፤ ናንጊና ናንጋ ጎዳሢዮ! ኔ ቃኣሎጉዴያ ጊንሣ ማሂ ሼምፔና ታና ጌሤ። 
ናንጊና ናንጋ ጎዳሢዮ! ታ ሼኔና ታ ኔኤም ሺኢሼ ታኣኮ ጋላቶ ዒንጊፆ ኔ ዔኬ፤ ኔኤኮ ዎጎዋ ታና ዔርዜ። 
ሼምፔላ ታኣኮ ቢያ ዎዴ ሜቶይዳኬ፤ ጋዓንቴ ታ ኔኤኮ ዎጎ ዋሊባኣሴ። 
ፑርቶ ዓሳ ቡኡዶ ፒሮ ታኣም ፒሬኔ፤ ታኣኒ ጋዓንቴ ዳምቦኮ ዑሣ ዓኣዺባኣሴ። 
ኔ ዎጋ ናንጊና ታኣኮ ዻካሊ ባኣዚ ማዔኔ፤ ዬያና ዒና ታኣኮ ሚርጌና ዎዛዻኔ። 
ዓይሢፆ ኔኤሲ ናንጊና ናንጊ ሄላንዳኣና ማዺ ታ ኩንሣኒ ዒኖ ታኣሲ ዬያ ባንሢ ማሄኔ። 
ላምዖ ማሊሢና ዓኣ ዓሶ ታ ዒፃኔ፤ ታኣኒ ጋዓንቴ ኔ ዎጎ ናሽኬኔ። 
ኔኤኒ ታኣኮ ፑኖ ካያሢና ጊቲማሢናኬ፤ ቃኣሎ ኔኤሲ ታ ዎዛና ካፓኔ። 
ታ ፆኦዛሢኮ ዎጎ ታኣኒ ካፓንዳጉዲ ዒንሢ ፑርቶ ዓሳ ታ ኮራፓ ሃኩዋቴ። 
ኔኤኮ ቃኣሎጉዴያ ታና ኬልቂ ዓርቄ፤ ታኣኒ ሼምፔና ናንጋንዳኔ፤ ዎዛ ታኣኮ ጉሪ ማዔም ታ ቦርሲንቱዋጉዲ። 
ሂርጋ ባኣያ ታ ናንጋንዳጉዲ ኬልቂ ታና ዓርቄ፤ ኔ ዳምቦዋ ቢያ ዎዴ ታ ዛጋንዳኔ። 
ማሊፃ ዔያቶኮ ጌኔና ሉኡዙሞና ኩሜያ ማዔሢሮ ኔ ዎጋፓ ዒፂ ኬስካዞንሢ ቢያ ኔያ ዒፃንዳኔ። 
ሳዖይዳ ፑርቶ ዓሶ ቢያ ቡኡራጉዲ ኔ ሺኢሼኔ፤ ዬያሮ ታ ኔኤኮ ዳምቦ ናሽኬኔ። 
ዑፃ ታኣኮ ኔና ዒጊቹሞና ጎጋይቃኔ፤ ኔ ዎጎዋ ሚርጌና ታ ዒጊጬኔ። 
ፒዙሞና ፂሉሞና ዓኣ ባኣዚ ታ ማዼኔ፤ ሄርቂ ዎይሣ ዓሶም ዓኣሢ ታና ዒንጊፖ። 
ታና ኔ ዓይላሢኮ ዻቂንቶ ጎናሴ፤ ዖቶርቃዞንሢ ታና ሄርቂ ዎይሣንዳጉዲ ማሂፖ። 
ዓኣፓ ታኣኮ ኔ ዓውሲፆንታ ፂሉሞ ቃኣሎዋ ካፒሢና ላቤኔ። 
ታና ኔ ዓይላሢም ናሹሞ ኔኤሲ ቤኤዜ፤ ኔ ዎጎዋ ታና ዔርዜ። 
ታኣኒ ኔ ዓይላሢኬ፤ ኔ ዳምቦ ዔራንዳጉዲ ታና ማሄ። 
ናንጊና ናንጋ ጎዳሢዮ! ዎጋ ኔኤሲ ሃሺንቲዳ ዓኣሢሮ ኔኤኒ ማዾ ማዻንዳ ዎዳ ሃሢኬ። 
ዓይሢፆ ኔኤሲ ዎርቄይዳፓ ባሼ ታ ናሽካኔ፤ ጎኔኬ ጌኤሺ ዎርቄይዳፓኣ ባሼ ሚጪንታኔ። 
ኔ ዓይሢፃ ቦሂሳ ባኣዚ ባኣያ ፒዜኬ ታ ጋዓኔ፤ ዬያሮ ሉኡዙሞ ጎይፆ ታ ዒዒፃኔ። 
ዳምባ ኔኤኮ ዲቃሢ ሄርሺሳያኬ፤ ዬያሮ ታ ሼምፓሢ ዬያ ካፓኔ። 
ኔ ቃኣሎኮ ቡሊፃ ፖፖዓኔ፤ ዔሩዋ ዓሶ ማሊ ጶቂሣያ ማሃኔ። 
ዓይሢፆ ታ ኔኤኮ ኮሺ ናሽካሢሮ ሱኡኮና ታ ዻንጎ ታ ዋሊ ዴዓኔ። 
ሱንፆ ኔኤኮ ናሽካዞንሢም ቢያ ኔ ማዻ ጎይፆ ታ ባንሢ ማዒጋፓ ታኣም ሚጪንቴ። 
ሃንቲፆ ታኣኮ ኔ ቃኣሎጉዴያ ፒዚሴ፤ ጎሜ ታና ዎይሣንዳጉዲ ሃሺፖ። 
ኔ ዓይሢፆ ታ ካፓኒ ዳንዳዓንዳጉዲ ዓሲ ታና ማኣሳንሣያይዳፓ ዓውሴ። 
ታና ኔኤኮ ዓይላሢም ዓኣፖ ካሮ ኔኤኮ ፖዒሴ፤ ዳምቦዋ ኔኤኮ ታና ዔርዜ። 
ዎጋ ኔኤኮ ቦንቺንቲባኣሢሮ ዓቢፃ ታኣኮ ዋኣሢጉዲ ዎታኔ። 
ናንጊና ናንጋ ጎዳሢዮ! ኔኤኒ ፂሎኬ፤ ዎጊፃኣ ኔኤኮ ፒዜኬ። 
ኔ ዓይሢፆ ኔኤኒ ፂሉሞና ኬሴኔ፤ ዬይያ ኮሺ ጉሙርሳያኬ። 
ታ ሞርካ ቃኣሎ ኔኤሲ ዔኪባኣሢ ኮሺ ታና ሮኦጋሳኔ። 
ቃኣላ ኔኤኮ ኮሺ ጊሶናያኬ፤ ታኣኒ ኔ ዓይላሢ ዬያ ናሽኬኔ። 
ታኣኒ ፓሡዋያና ቶኦቺንቴያናኬ፤ ጋዓንቴ ታ ኔኤኮ ዓይሢፆ ዋሊባኣሴ። 
ፂሉማ ኔኤኮ ናንጊና ናንጋያኬ፤ ዎጋኣ ኔኤሲ ጎኔኬ። 
ሜቶና ዋኣዪሢና ታና ሄሌኔ፤ ጋዓንቴ ኔ ዓይሢፃ ታኣኮ ዎዛኬ። 
ዓይሢፃ ኔኤሲ ናንጊና ፂሉሞ ዓይሥሢኬ፤ ሼምፔና ታ ናንጋንዳጉዲ ማሊ ጶቂሥሢ ታኣም ዒንጌ። 
ናንጊና ናንጋ ጎዳሢዮ! ጉቤ ዒናፓ ታ ዒላታኔ፤ ኔ ታኣም ዋይዜ፤ ዳምቦዋ ኔኤኮ ታ ካፓንዳኔ። 
ታ ኔ ባንሢ ዒላታሢሮ ታና ዓውሴ፤ ዓይሢፆዋ ታ ኔኤኮ ካፓንዳኔ። 
ኔ ታና ማኣዳንዳጉዲ ዓባ ፆርቁዋንቴ ጴጪ ታ ዒላታኔ፤ ኔ ቃኣሎዋ ሃጋኣ ዎዛ ማሂ ታ ጌሣኔ። 
ኔኤኮ ቃኣሎ ታ ማላኒ ዓኣፓ ታኣኮ ዋንቶ ጉቤ ዱኡሚንቱዋዖ ዎርቃኔ። 
ኔ ኮሹሞጉዴያ ዑኡዞ ታኣሲ ዋይዜ፤ ናንጊና ናንጋ ጎዳሢዮ! ኔ ዎጎጉዴያ ጊንሣ ማሂ ታና ሼምፔና ናንጋያ ማሄ። 
ፑርታ ባኣዚ ታኣም ቱካ ዓሳ ታ ባንሢ ዑኬኔ፤ ጋዓንቴ ዔያታ ኔ ዎጎኮ ዙላኬ። 
ናንጊና ናንጋ ጎዳሢዮ! ኔኤኒ ጋዓንቴ ዑኬኬ፤ ዓይሢፃኣ ኔኤሲ ቢያ ጎኔኬ። 
ናንጊና ኔኤኒ ዬያ ኔ ዎጎ ዶዲሺ ኬሴያ ማዔሢ ሚርጌ ዎዴኮ ቤርታፓ ታ ዔሬኔ። 
ታኣኒ ዎጎ ኔኤኮ ዋሊባኣሴ፤ ዋኣዪፆ ታኣኮ ዛጌ፤ ሄሊያኣ ታና ዓውሴ። 
ታ ዛሎ ኔ ሞኦቲንቴ፥ ታና ዓይሴ፤ ኔ ቃኣሎ ጎይፆ ሼምፔና ታና ናንጊሼ። 
ዳምቦ ኔኤሲ ዔያታ ኮዑዋኣሢሮ ዻቂንታ ፑርቶ ዓሶይዳፓ ሃኬኬ። 
ናንጊና ናንጋ ጎዳሢዮ! ሚጪንታ ኔኤኮ ዼኤፒኬ፤ ኔ ዎጎጉዴያ ሼምፔና ታና ናንጊሼ። 
ታና ዳውሳ ሞርካ ሚርጌኬ፤ ታኣኒ ጋዓንቴ ኔኤኮ ዓይሢፃፓ ሺኢኪባኣሴ። 
ዔያታ ቃኣሎ ኔኤሲ ካፑዋሴ፤ ዬያሮ ጉሙርቂንቱዋ ዓሶ ዛጊ ታ ሻኣኪንቴኔ። 
ናንጊና ናንጋ ጎዳሢዮ! ኔኤኮ ዓይሢፆ ታ ናሽካያ ማዔሢ ዛጌ፤ ኔኤኮ ናንጊና ናንጋ ናሹሞና ሼምፔና ታና ጌሤ። 
ኔኤኮ ቃኣላ ጉቤና ጎኔኬ፤ ኔኤኮ ፂሎ ማዔ ዎጋኣ ናንጊና ናንጋያኬ። 
ሱኡጋ ታኣኒ ዔኤቢ ማዺባኣንቴ ዳውሴኔ፤ ታ ጋዓንቴ ቃኣሎ ኔኤኮ ዒጊቹሞና ቦንቻኔ። 
ዔኤቢ ሚርጌ ዲዒ ዔኬ ዓሲጉዲ ቃኣላ ኔኤኮ ታና ዎዛሴኔ። 
ሉኡዙሞ ታ ዒፃኔ፥ ሻሻኣኪንታኔ፤ ዎጎ ኔኤሲ ጋዓንቴ ናሽካኔ። 
ኔኤኮ ፂሎ ማዔ ዎጎ ዛሎ ፔቴ ኬሊዳ ላንካይ ማይንቲ ታ ኔና ጋላታኔ። 
ኔኤኮ ዎጎ ናሽካ ዓሶም ሚርጌ ኮሹሞ ዓኣኔ፤ ዹቃ ባኣዚያ ዔያቶ ባኣሴ። 
ናንጊና ናንጋ ጎዳሢዮ! ዓውሲፆ ኔኤሲ ዎዛ ጌሢ ታ ካፓኔ፤ ኔ ዓይሢፆዋ ማዺ ታ ኩንሣንዳኔ። 
ሼምፓሢ ታኣኮ ኔ ዓይሢፆ ካፓኔ፤ ሚርጌና ዬያ ታ ናሽካኔ። 
ጎይፃ ታኣኮ ጉቤ ኔ ቤርታ ፔጋኣኬ፤ ዬያሮ ኔኤኮ ዎጎንታ ዓይሢፆንታ ታ ካፓኔ። 
ናንጊና ናንጋ ጎዳሢዮ! ታ ዒላታ ኔ ቤርቶ ሄሎንጎ፤ ኔ ቃኣሎጉዴያ ማሊ ጶቂሥሢ ታኣም ዒንጌ። 
ሺኢጲፃ ታኣሲ ኔ ቤርቶ ሄሎንጎ፤ ኔ ቃኣሎጉዴያ ሄሊ ታና ዓውሴ። 
ኔ ዎጎ ኔ ታና ዔርዜሢሮ ዻንጋ ታኣሲ ጋላታ ዓልቂሳኔ። 
ዓይሢፃ ኔኤሲ ቢያ ፂሉሞ ዓይሥሢታሢሮ ዒንዲርዛ ታኣሲ ኔ ቃኣሎ ዛሎ ዓይናዾንጎ። 
ኔኤኮ ዓይሢፆ ታ ዶኦሬሢሮ ኩጫ ኔኤሲ ታና ማኣዳኒ ጊኢጌያ ማዖንጎ። 
ናንጊና ናንጋ ጎዳሢዮ! ዓውሲፆ ታ ኔኤሲ ኮዔኔ፤ ኔኤኮ ዎጋ ታና ዎዛሳያኬ። 
ታ ኔና ጋላታኒ ሼምፔና ናንጎም! ኔ ዎጋኣ ታና ማኣዶንጎ። 
ዓዳ ዣኣሌ ማራይጉዲ ታ ማዔኔ፤ ዓይሢፆ ታ ኔኤሲ ዋሊባኣሢሮ ታና ኔ ዓይላሢ ኔኤኒ ኮዔ።