ዓይኑሞ ማፃኣፖ.
138.
ጋላታ ሺኢጲሢ ናንጊና ናንጋ ጎዳሢዮ! ጉቤ ዒኔፓ ታ ኔና ጋላታኔ፤ ሜሌ ፆኦዛ ዛጋንቴ ኔኤም ታኣኒ ጋላታ ዓይኑሞ ዓይናዻኔ። 
ኔኤኮ ናንጊና ናንጋ ናሹሞንታ ፒዙሞንታ ኔኤኮ ሱንፆ ዼኤፑሞንታ፥ ሃሣ ኔ ዓይሢፆ ፑኡፑሞንታ ፔጋሲ ኔኤኒ ታኣም ዻዌሢሮ ኔኤም ዱማዼ ኔኤኮ ጌኤዦ ማኣሮ ባንሢ ሺሪ ሂርኪ ጌይ ዚጊ ዚጊ ታ ኔና ጋላታኔ። 
ታ ኔና ዔኤላዛ ኔ ታኣኮ ሺኢጲፆ ዋይዜኔ፤ ኔ ዶዱሞና ኔኤኒ ታና ዶዲሼኔ። 
ናንጊና ናንጋ ጎዳሢዮ! ኔ ጌዔ ቃኣሎ ዔያታ ዋይዜሢሮ ዓጮ ካኣታ ቢያ ኔና ጋላታኔ። 
ኔ ማዼ ባኮ ቢያሢንታ ኔኤኮ ዼኤፖ ቦንቾንታሮ ዓይናዺ ዔያታ ዼኤፒሳኔ። 
ኔኤኒ ሌካ ዼጌ ቤዛ ዓኣያ ማዔቴያ ሂርኬ ማዔ ቦሂንቴዞንሢ ኔ ዛጋኔ፤ ዖቶሮ ዓሶ ሃኬ ዓኣ ቤዛ ዓኣዖ ኔኤኒ ዔራኔ። 
ታኣኒ ሜቶኮ ባኣኮ ጌሌቴያ ኔኤኒ ሼምፔና ታና ጌሣኔ። ዻጋዺ ታጊዳ ዔቄ ሞርኮ ኔኤኒ ማካኔ፤ ኔኤኮ ዼኤፖ ዎልቆና ኔ ታና ዓውሳኔ። 
ናንጊና ናንጋ ጎዳ ታኣም ማሌ ማሊፆ ኩንሣንዳኔ፤ ናንጊና ናንጋ ጎዳሢዮ! ኔኤኮ ናሹማ ናንጊና ናንጋያኬ፤ ኔ ኩጮና ኔኤኒ ማዤሢ ዋሊ ሃሺፖ።