ዓይኑሞ ማፃኣፖ.
141.
ፆኦሲ ዓውሳንዳጉዲ ሺኢቂንታ ሺኢጲሢ ናንጊና ናንጋ ጎዳሢዮ! ታ ኔ ዋይዞም ዒላታኔ፤ ኔጉዋዖ ዑኬና ታና ማኣዴ፤ ታኣኒ ኔ ዋይዞም ዒላታሢ ዋይዜ። 
ታኣኒ ሺኢቃ ሺኢጲፃ ዑንጄ ኔኤም ጩቢሾያጉዲ ኔ ባንሢ ዔቂሳ ኩጫኣ ዒባናኣና ዒንጎ ዒንጊፆጉዲ ማዖም። 
ናንጊና ናንጋ ጎዳሢዮ! ታ ዻንጎ ካፓ ዓሲ ጌሤ፤ ታ ሙሱሮዋ ቃዛንዳ ዓሲ ዔቂሴ። 
ፑርቶ ዓሶና ዎላ ፑርታ ማዾ ታ ማዹዋጉዱ ታኣኮ ዒኖ ፑርቱሞ ባንሢ ማሊሲፖ፤ ዔያቶና ዎላ ዴይ ሙዎ ሙኡዚያ ታና ሙዒሲፖ። 
ፂሎ ዓሲ ታና ፁንቆንጎ፥ ዬይ ታና ሚጪንቲሢኬ፤ ዒዚ ታና ጎሮንጎ፥ ዬይ ታ ቶኦኮ ዖይሲና ቲሽኪሢኬ፤ ጋዓንቴ ታ ቢያ ዎዴ ፑርቶ ዓሶ ማዾ ማኪ ማኪ ሺኢቃኔ። 
ሱኡጋ ዔያቶኮ ዼኤፖ ላሎ ማጋ ኬኤሪንታኣና ታ ጋዓ ባካ ጎኔታሢ ዔያታ ዔራንዳኔ። 
ሳዓ ጎሽኪንታኣና ቦኪ ቡርሺንታሢጉዲ ዔያቶኮ ሜጌፃ ዱኡፖ ካራ ካራ ዜርቂንታንዳኔ። 
ናንጊና ናንጋ ጎዳ ማዔ ታ ፆኦዛሢዮ! ታኣኒ ጋዓንቴ ኔና ጉሙርቂፆ ሃሻዓኬ፤ ኔ ታና ዓኣቻንዳጉዲ ታ ኮዓሢሮ ሃይቆም ጌይ ታና ሃሺፖ። 
ዔያታ ዓኣቺ ፒሬ ፒራስካፓ ታና ቶሊሴ፤ ፑርቶ ማዻ ዓሶኮ ዹቃስካፓ ታና ዓይሴ። 
ታኣኒ ኮሺና ዖኦኪ ዴንዳዛ ፑርቶ ዓሳ ዔያታ ፒሬ ፒራስካ ፔኤሮ ዓዺንቶንጎ።