Ak'aj tu'jil tyol qman Tchiky'b'in 11

Aye kab'e kujsilte

1 Ex tzaj q'o'n jun tze we'y te echb'il, ikyxixjo tze'nku ajlaj, ex tzaj q'ma'n we'y:

We'ksa, ex echinkujiy a tja Dios, junx tuk'a t-altar.* Ex ajlanqekujiy aye' nchi k'ulin antza. 2 Me mi kub' techinjiy twi' pe'n ti'jxi ja, qu'n ma txi q'on te' kye', a nya Judiyqe.* Ex kb'ajil kywa'b'in tkyaqiljo tnam xjan toj kab'e toj ox k'al* xjaw. 3 Ex kxel nsma'n kab'e kujsilte wi'ja, tok kyxb'alin te b'isb'ajil. Ex kchi yolil te kujsil te' yol toj 1,260 q'ij. 4 Ayetzi'n kab'e kujsilte yol lo, ayetzi'n kab'e tze olivo* ex kab'e xtanko'l ite'ku nwutza, ayi'n Tajaw tkyaqil tx'otx'. 5 Ex qa at jun nt-ximin tu'n tkub' b'inchin mib'in kyi'j, ok k-okil q'aq' toj kytzi, tu'n kytz'e'y te jun majx. Ex ikytzin kchi kyimile' aye kyaj tu'n kyb'inchin mib'in kyi'j. 6 Me ayetzin kujsil yol lu'n at kyoklin tu'n mi tzaja jb'al kyojjo kyq'ijil, aj kyok ten yolil ti'j Dios.* Ex at kyipin tu'n tx'ixpit a' tu'n tok te chiky',* ex tu'n kyqanin tkyaqil wiq yajb'il tib'aj tx'otx', tze'nku kyaj.

7 Me ajtzin tjapin b'ajjo kyaq'in tu'n kyq'o'n yek'b'il, jun ma tij txuk kjawitz tojjo jul te kawb'il, a ma nintz t-xe.* K'wel kyi'j tu'n, ex kchi k'wel b'yo'n tu'n.* 8 Ex ayetzin kyxmilil otaq kyim ok kchi kyjel kuẍb'in toj tnam Jerusalén, ja' kub' b'yo'n kyAjaw twutz cruz. Ajo tnam, iky n-ele tze'nku Sodoma exsin Egipto, aye techil ti'jjo tkyaqil nya wen.* 9 Ex toj oxe q'ij tuk'a niky'jin, ayetzin xjal twutz tkyaqil tx'otx', a'lchaqx kye kyxe'chil, kyyol ex kytanim, kchi ka'yil kyi'j, ex mi txi kyq'o'n amb'il, tu'n kyku'x muqet. 10 Ex ayetzi'n itz'qex twutz tx'otx' kchi tzalaje ti'jjo kyimin, ex kxel kysma'n oyaj kyxolx, qu'n aye xjal lo kub' kyb'inchin mib'in kyi'j kykyaqil xjal twutz tx'otx'.

11 Me tb'ajlinxi' oxe q'ij tuk'a niky'jin, ax Dios xi q'o'nte kychwinqil, ex b'e'x i jaw we'ks juntl majl.* Ex ayetzi'n nchi ka'yintaq kyi'j, b'e'x tzaj nim kyxob'il. 12 Ex ayetzin kab'e kujsil yol, xi kyb'i'n jun tq'ajq'ojil wib'aj toj kya'j, ex ntq'ma'n: Ku kyjatza tzalu'n.

Ex b'e'x i xi' toj muj, tu'n kykanin toj kya'j.* Ex iwle kyu'n kyajq'oj. 13 Me tojxjo or anetzi'n, tzaj jun nim kyaqnajnab',* ex tu'n tpajjo kyaqnajnab', b'e'x tzaj tz'aqjo tlajajin tnejjo tnam, ex b'e'x i kyim wuq mil xjal toj. Ayetzi'n i kyij tuk'a kychwinqil, tuk'a nim kyxob'il, i nimsin tb'i Dios, a Tajaw Kya'j.

14 Ma b'aj te tkab' b'isb'ajil lo. Me atx juntl ch'ix tul kanin.

A twuqin chun

15 Atzin twuqin angel xi toq'sin tchun, ex i b'ijte tq'ajq'ojil wi'b'aj kujxix wen toj kya'j, a nkyq'ma'n:

Atzin tx'otx', a ja' nkawinetaq tajaw il, ma tz'ok tetzin qAjaw, a Crist, a ja' kkawile te jun majx.*

16 Ex ayetzin kyaje toj ka'wnaq† nejinel, a q'uqleqetaq toj kyq'uqb'il twutz Dios, b'e'x i kub' muk'e twutz tx'otx', ex i k'ulin twutz. 17 Xi kyq'ma'n:

Kxel qq'o'n chjonte te'y,

ay qAjaw ex qMan Dios, a nimxix tipin,

a attaq te tnejil, ex at ja'lin.

Qu'n tzaj ttzyu'n tkyaqil tipi'n,

ex ma txi xkye tu'n tkawi'n tib'aj tkyaqil.

18 Aye nya nimil b'e'x tzaj kyq'oj.

Me atzin ja'lin, ma kanin tq'ijil tyab' twi'y.

Ex atzin paqjo ja'lin,

tu'n kyok tkyaqil kyimnin toj pa'b'in tu'n.

Ex kxel tq'o'n chojb'il kyejo taq'nila, aye yolil Tyola,

junx kyuk'a kykyaqil nimil ti'ja,

aye' njaw kynimsin tb'i'y,

exla qa ma nim kyoklin, ex qa mina.*

Ex kchi k'wel tyuch'injiy toj najin,

aye nchi yuch'inte twutz tx'otx'.

19 Tb'ajlinxi' ikyjo, b'e'x jqetjo tja Dios toj kya'j, ex tojjo tja q'ancha'lin te' kax, a yek'b'il ti'jjo Kujsb'il Tyol qa at Dios kyuk'a Ttanim. Ex b'e'x tzaj xloq'lin kya'j, junx tuk'a jun tq'ajq'ojil njumin wen, ex q'ankyaq ex jun nim kyaqnajnab' ex txqan saqb'aqin.*

*11:1 Ez. 40:3

*11:2 Lc. 21:24

*11:2 Kab'e toj ox k'al, 42 n-ele.

*11:4 Zac. 4:3, 11-14

*11:6 1Re. 17:1

*11:6 Ex. 7:17-19

*11:7 Dan. 7:3; Tchi. 13:4-7

*11:7 Dan. 7:21

*11:8 Is. 1:9-10

*11:11 Ez. 37:10

*11:12 2Re. 2:11

*11:13 Tchi. 6:12; 16:18

*11:15 Dan. 7:14, 27

†11:16 Kyaje toj ka'wnaq, 24 n-ele.

*11:18 Sal. 115:13

*11:19 Tchi. 8:5; 16:18