8
Puang Yesus Pongkena Imam illalan pa'dandi bakaru
1 Dadi pungngu' tannunna kada ditula' temo iamo: Dengammi Pongkena Imam taampui ma'loko dio tandai kananna Puang Allata'alla To Randan Matande yao suruga. 2 Anna umpalakomo pengkaranganna illalan angngenan masero, battu' dikua lantang kapenombaan tongan napapia Puang Allata'alla, tangngia panggaraga ma'rupa tau.
3 Angganna Pongkena Imam diangka' annu la umpalanda' pa'petando anna bua pemala' dio tingngayona Puang Allata'alla. Susimi duka' Puang Yesus Pongkena Imam taampui, innang la dengan duka' aka la napemalasan. 4 Pa'rapananni la illalan liupi lino, manassa anna tae' la mendadi imam, annu dengammi imam siumpalanda' bua pemala', situru' atoran alukna to Yahudi. 5 Angngenan pemalasan illalan lino nangei umpalako pengkaranganna imam sitonganna angga kalimbayona angngenan pemalasan yao suruga, susi napalanda' Puang Allata'alla lako Musa anna la umpake'de' lantang pemalasan nakua: “Pengkilalaii, la mupapia situru' tandengan kupaitaiko yao tanete.”* Kel. 25:40. 6 Sapo temo, pengkaranganna Puang Yesus marru matande anna la pengkaranganna imam inde lino. Susimi duka' pa'dandi bakarunna Puang Allata'alla lako ma'rupa tau nakarang Puang Yesus marru untondon pa'dandi yolo annu kara-kara nadandi Puang Allata'alla ummolai Puang Yesus marru mapia.
7 Annu kela tae' dengan sassana pa'dandi bunga'na, ta'mo la manggi' umpadengan pole pa'dandi kapenduanna Puang Allata'alla. 8 Sapo umpasala petauanna Puang Allata'alla, nakua:
“Sitonganna, pissan attu la kupadengan pole pa'dandi bakaru
lako to Israel sola to Yehuda.
9 Tae' la susi pa'dandingku lako nenena
angku tettei illalan mai lembangna Mesir.
Tae' unturu' pa'dandingku,
napolalan tae' duka' kupaillalan penawa.
10 Indemi pa'dandi bakarungku lako to Israel
illalan allo la ditingngayonae:
La kupatitanan illalan pikki'na parentaku
anna la kuuki' illalan penawanna,
lambisan Kao la napodewata
anna iamo la mendadi petauangku.
11 Anna ta'mo la umpatudu padanna
battu' sa'do'doranna kumua: ‘Pengngissanniko Puang Allata'alla.’
Annu la naissanan asammo' susi to kamai tenni to barinni'.
12 La kugarri'imi kasalaanna,
anna ta'mo la kupaalai penawa angganna kasalaanna.Ӡ Yer. 31:31-34.
13 Ianna untetteran pa'dandi bakaru Puang Allata'alla, kalembasanna malusami pa'dandi yolo. Anna angganna matuanna anna malusanna ta'mo la masae anna pa'demo.