Uţup wi Pawulu apiiŧuŋ
Tit
Uţup ujuni
Ulibra wi uwo kakaarta ki Pawulu apiiŧuŋ Tit. Tit mënţ aanwo nayuday aşë bi kak afiyaar Kriŧtu aji gakandër na Pawulu. Pawulu apiiŧa kakaarta kë kaţënka du Kret di abiiŋ aduka, aji ado katen ulemp wi pnŧuk pi banfiyaaruŋ Kriŧtu panwooŋ da. Kakaarta ki kaţiiniyaan iko iwajanţ inknooranuŋ Pawulu ţi pnŧuk mënţ. Uŧeek uwo kë Pawulu aleşan Tit jibi ñaaŋ i baţuuŋ ţi kadun ki pnŧuk pi banfiyaaruŋ awooŋ kawo. Apiiŧ aţup uko waŋ, ţiki awin mnwo mnwuţaan mi bañaaŋ baŧum ţi biki Kret bawoonaanuŋ. Utëbanţën uwooŋ kë akak aţup Tit ajukan bañaaŋ biki da mnwo mi kawuuŋ kandoli kawooŋ kawoonaan. Bantohi biinţ na bantohi baaţ (banwooŋ kak kajukan baaţ banwoonuŋ bampoţi), baţaşa na bajuuk ţi ulemp. Abaañşaan aţup Tit jibi ñaaŋ anfiyaaruŋ Kriŧtu awooŋ kawo. Awo kawo ñaaŋ anwooŋ aanji ŋal pla bţup, kado pnoh na bañaaŋ kalow bkujar, pŋom, bpaţşër ţi pnŧuk pi banfiyaaruŋ.
Hënk di ifah yi ulibra wi iwooŋ:
1. Pwul mboş na pñehan Naşibaţi (1.1-4)
2. Pţaŋ banwooŋ ţi kadun ki pnŧuk pi banfiyaaruŋ (1.5-16)
3. Pţaŋ banfiyaaruŋ Kriŧtu (2.1–3.11)
4. Pwul mboş pbaañşaani (2.1–3.15)
1
Pwul mboş
1 Nji Pawulu, nwooŋ nalempar Naşibaţi, dpiiŧiiŋ iwi Tit, dwo kak *nanjañan i Yeŧu *Kriŧtu kahilna kaţup uţup unŧaaŋuŋ na pfiyaar pi biki Naşibaţi adatuŋ na kame kanjoonanuŋ kanjaaŋ kaţij bañaaŋ bañog Naşibaţi. 2 Mnhaţ mi ubida wi mnţo manwoona ţi iko mënţ. Ubida mënţ, Naşibaţi anwooŋ aanji ţilan ahoŋuŋ wa undiimaan wi apaşuŋ umundu. 3 Ţi wal wi adatuŋ, Naşibaţi nabuuran nja awul uţup wi nul aji nţup wa bañaaŋ. 4 Dpiiŧu, iwi abuk naan na manjoonan ţi Yeŧu Kriŧtu i ŋfiyaaruŋ nja bŧi. Dñehan Naşibaţi Aşin nja na Yeŧu Kriŧtu ambuuranuŋ nja bawulu bnuura babot bajoobţënu uhaaş.
Ulemp wi Tit du Kret
5 Kë nşë duku du Kret ihilna ibaañëş ulemp undukiiŋ, idat bañaaŋ bankwooŋ bantohi biki banfiyaaruŋ ţi ŋbeeka bŧi jibi njakiiŋ ido. 6 Nantohi i banfiyaaruŋ awo i kawo ñaaŋ i nin aloŋ awooŋ aanka uko uţup ţi a, awo kaniim ñaaţ aloolan kaliŋ ţi a, babukul bawo kafiyaar Yeŧu *Kriŧtu, baanwo kawo ţi iko iwuţaan abot awo kado kate. 7 Na manjoonan naweek i banfiyaaruŋ awo namali i Naşibaţi ukaaŋ kë awo i kawo ñaaŋ i nin aloŋ awooŋ aanka uko uţup ţi a, aanwo kawo nahomp, këme naŧar udeeb, nakuj, naŋal ugut, aanwo kawo naguurad ţi uko wi itaka. 8 Kë aşë wo i kaţëp ţëp kawo ñaaŋ anjaaŋ ayeenk bañaaŋ bnuura, anŋaluŋ pdo bnuura, aka uşal, awo naŧool, aţaş Naşibaţi, abot aţijan uleeful. 9 Awo kamëban uţup unjoonanuŋ wi Naşibaţi jibi bajukanuŋ wa kahilna kado kaţaŋ bañaaŋ na pjukan pnuura, kabot kadiiman banklaţuŋ uţup mënţ kë baanfaŋi.
10 Na manjoonan, baŧum ţi bañaaŋ biki Kret baanji bate, aŧum bţup abot aji baguurad. Bayuday banjakuŋ aji bañaaŋ bawo i kawala kaŧëmp bawoonuŋ haŋ. 11 Iwo i kado baka badëŧ itum! Baji baŧok ŋşal ŋi itoh ipëb wi bajaaŋ bajukan baka iko inwooŋ iinwoo kado kajukan. 12 Uka ñiinţ aloŋ i Kret, najukan naweek, andooŋ aji : « Biki Kret bawo baţilan baweek, baŋot ji ŋko ŋi uţeeh, awo bapëra banfeeruŋ. » 13 Uko wi aţupuŋ ujoonani, ukaaŋ kë iwo kaŋoman na baka bnuura bahilna baliinŧ ţi pfiyaar, 14 bawut kaţaş ŋţup ŋanwooŋ ŋaanwo manjoonan ŋi bayuday baloŋ na iko yi bañaaŋ bandekuŋ manjoonan kafeţ bajakuŋ aji bañaaŋ bawo i kado. 15 Iko bŧi iji iwo ijinţ ţi kadun ki Naşibaţi pa bañaaŋ banwooŋ bajinţ, kë nin uko uloŋ uşë wo uunji uwo ujinţ pa banţopuŋ banwooŋ baanŋal pfiyaar. Ŋşal na ŋhaaş ŋi baka ŋaţopi. 16 Baji baji bameeŋ Naşibaţi kaşë diiman ţi mnwo mi baka kë bapoka : bawo bañaaŋ banjaaŋ bado iko inţopuŋ maakan, banwooŋ baanji bate, banwooŋ baanhil pdo nin uko uloŋ unuura.