Uţup wi bapiiŧuŋ Bahebërë.
1.
Naşibaţi aţëpna ţfa ţi *baţuparul ŋyaaş ŋŧum ado kë bado iko iŧum aţiiniyaan na bateem nja. 
Kë ţi ŋwal ŋbaañşaani ŋi ŋwooŋ ŋi aşë ţëpna ţi Abukul aţiini na nja. Abukul mënţ i i adatuŋ ado kë aka iko bŧi, ţi ul i i aţëpnuŋ kak apaş baţi na mboş. 
Abukul awooŋ bjeehi banjaaŋ badiiman mndëm mi nul, ul ajaaŋ adiiman uko wi awooŋ na manjoonan. Ul amëbanuŋ iko bŧi yi apaşuŋ na uţup wi nul unwooŋ na mnhina. Ajinţan bañaaŋ ţi ipekadu yi baka aşë ya aţo du kañen kadeenu ki Naşibaţi du baţi. 
Mndëm mi Abuk Naşibaţi mampel maakan mi ŋwanjuŧ, kë hënk di Naşibaţi awululuŋ katim kampeluŋ ki ŋa. 
Na manjoonan, Naşibaţi aambaaŋ kajakaara na uwanjuŧ uloŋ: « Iwi iwooŋ Abuk naan, nţa di dţup aji dwo şaaş? » Kë aambaaŋ kaţiini ţi uko wi uloŋ ţi ŋa kaji : « Nji dwo Aşin, ul aşë wo Abuk naan. » 
Ţi wal wi Naşibaţi abiiŋ awo i pyil ţi umundu Abukul, anwooŋ bajeen, aji : « Ŋwanjuŧ bŧi ŋawo kadëmana. » 
Kë ţi uko wi ŋwanjuŧ, upiiŧana ţi *Ulibra wi Naşibaţi aji : « Naşibaţi ado ŋwanjuŧ ŋi nul kë ŋawo ji uyook ado ŋa kë ŋawo ji bdoo banklañşiiŋ. » 
Kë Naşibaţi aşë ţiini na Abukul aji : « Iwi Naşibaţi, pşihu pawo pi mnţo, pşih pi nu pawo pŧool. 
Iŋal uko unwooŋ uŧool apok buţaan, ukaaŋ kë nji Naşibaţi i nu ndatu awulu mnlilan mampeluŋ mi banwooŋ na iwi bŧi. » 
Akak aţiini aji : « Iwi Ajugun, ipaşuŋ mboş du ujuni aboman baţi na iñen yi nu. 
Iko mënţ iluŋ kaba, iluŋ kamën ji imişa. Kë iwi işë duka. 
Iluŋ kaŋuj ya ji imişa, iluŋ kawohëş ya ji imişa, kë iwi işë duka jibi iwooŋ, ŋnuur ŋi nu ŋaankba. » 
Naşibaţi aambaaŋ kajakaara na uwanjuŧ wi nul uloŋ: « Biin iţo ţi kañen naan kadeenu te wal wi nji kaţuuŋ başooradu ţi ihoţu uţeeh. » 
Ŋwanjuŧ bŧi ŋawo wo ŋhaaş ŋanklemparuŋ Naşibaţi. Ayil yil ŋa ŋabi pţënk banwooŋ i kabuur te mnţo.