Ka Sulat no Impaalap to mgo Hibriu.
1.
Dongan, nigkagian to Magboboot ka kaap-apuan ta no ian ka mgo Hudiu. No ka mgo talagnangon to kinagian din ka impakagi rin kandan. Di ka batasan din to igpohitaga rin kandan to kinagian din, nigloinloin. 
Di kuntoon to soini no mohurian no allow, ka Anak din ka impohitaga kanta to kinagian to Magboboot. Ka soini no Anak din ka nigpohimu to Magboboot to soini no kalibutan, no si Hisus dod ka nig-alam din woy nigbootan din to oyow ian on tagtuun to tibo. 
Ka tibo no karoyawan to Magboboot, duon to Anak din, no ogsosokod lagboy ka goinawa ran. Oggongonan to Anak din ka kalibutan woy ka langit su ligkat to kabogbogan to kagi rin. Ko nigpakimatoy to lawa rin oyow ogkaawo on ka mgo salo ta oyow ogmalinis on ka goinawa ta, nig-uli dio to langit no nigpinpinnuu on dio to kawanan to Magboboot no ian mabogbog. 
Sikan ian to nohimu on ka Anak din no mamabogbog to mgo diwata no suguanon din woy nigbogayan to Magboboot sikandin to ngaran no dakoldakol to mgo ngaran dan. 
Nataga ki to soini su ka kagi to Magboboot ki Hisus, waro mog-unawa to kagi rin to mgo diwata rin. Ian su duon impasulat din dongan to kagi rin to Anak din. Kagi rin to, “Sikoykow ka Anak ku, no kuntoon no allow, sikanak on ka amoy nu.” Di agad kon-u, waro din innangon to agad hondoi no diwata no suguanon din to, “Sikanak ka amoy rin woy sikandin on ka Anak ku.” 
No ko ogkatuman on ka allow to Magboboot no magaan din on igpohondini ka panganoy no Anak din kai to soini no kalibutan, duon dangob no kagi rin tongod to Anak din to, “Og-awoson to ogsayoon sikandin to tibo no mgo diwata no suguanon ku.” 
Di tongod to mgo diwata to Magboboot, soini ro atag ka kagi rin. Kagi to sulat to, “Ka pogsugu din to mgo diwata din, ogkoiling to kalamag woy ko logdog no hapuy.” 
Di tongod to Anak din, soini atag ka innangon to Magboboot. Kagi, “Taman to waro katamanan, Magboboot, waro katamanan to pogpangatondanan nu. Woy ogkaayun lagboy ka pog-alap nu to sikan no katondanan nu. 
Indakoli nu to goinawa nu ka maroyow di og-usigan nu to goinawa nu ka maroot. Sikan ian to, sikanak no ian Magboboot woy Magboboot nu, nig-indanan ku sikoykow oyow ogkabogayan ka to dakol no igkarago nu no ogdakoldakol to sikan no igkarago no igkabogoy to mgo duma nu.” 
Duon dod dangob no kinagian to Magboboot to Anak din. Kagi, “Sikoykow, Lagboy no Igbuyag, ka nighimu to soini no kalibutan dongan. Agad ka tibo no dio to langit, ka koykow ro no bolad ka nighimu. 
Ogkaawo doka tibo no nighimu nud, di sikoykow, waro katamanan nu. Tibo no nighimu nud, ogkabuyag on no ogkounawa to manggad no ogkamolu do. 
Ian su ogkoongkoran nud on ka tibo, unawa to tahan no manggad no songo ogkoongkoran no ogkaliwanan on to iam. Di sikoykow atag, kono ka ogkahalin no waro katamanan nu.” 
Di agad kon-u, waro nangoni to Magboboot ka agad hondoi no diwata no suguanon din to, “Kai kad on to kawanan ku ogpinpinnuu taman to ogdoogon ku ka tibo no mgo usig nu.” 
Nokoy naan ka mgo diwata no suguanon din? Ka lawa ran, ogkoiling to mgo gimukud no kono ogkakitaan. Di talagbulig sikandan to Magboboot no ogsuguon din dio to sikan no mgo otow no ogtuu on kandin to oyow ogkapangabangan on to mgo salo dan.