1 Nayan, seini se meikagi ko tepad te insà insolat niyo kanak. Aw eked pengognan se otaw, mèpiya iyan. 2 Meneng aw mengognan se otaw, keilangan melobos se pedowan din diyà te esawa din amon eked keboyo te medaet. 3 Se meama, keilangan mengimanday te esawa din. Se bayi heman, keilangan mengimanday te esawa din. 4 So diyà te otaw mengognan, eked ketig-apò te bayi se kandin lawa, meneng metig-apò te kandin esawa. Onawa heman niyan se meama, eked sikandin peketig-apò te kandin lawa, meneng metig-apò te kandin esawa. 5 Ikà niyo eg-eked te pegpeleyokay singed aw megsebad se pedowan niyo te eked kaw pegpeleyokay te pila se aldaw amon tomayod kaw megtawal-tawal. Pegkepenga niyan, todà kaw pegpeleyokay amon eked kaw keboyo i Satanas pineokit te ibeg te lawa niyo. 6 Yan se inikagi ko kenyo kenà amon legesen ko sikiyo mengognan, meneng amon ketegahan niyo te mepakay diyà kanak aw mengognan kaw. 7 Pengkey ibeg ko meiling kaw peden kanak so wedad esawa ko, meneng netegahan ko te lekat te Timanem se mebatog inangen te teg sebad-sebad otaw.

8 Seini se kagi ko diyà te menge otaw wedà pengognan aw diyà te menge otaw balo. Mèpiya aw eked kaw pengognan iling kanak. 9 Meneng aw eked kaw peketameng te ibeg niyo, mèpiya aw mengognan kaw, so aw ontò se ibeg niyo mengognan, labi pa mèpiya aw mengognan kaw.

10 Seini se isogò ko diyà te kedita niyo doen esawa. Kenà lekat kanak se sogò seini, meneng lekat te Pengolo. Eked kepakay aw tomanan se bayi te esawa din. 11 Meneng aw somoway sikandin te esawa din, keilangan eked pengognan diyà te doma meama, meneng mèpiya aw molì heman todà doton te kandin esawa. Eked heman kepakay aw somibwan se meama te esawa din.

12-13 Doen pa ikegiyen ko diyà te doma otaw pengkey wedà ini keliwati lekat te Pengolo. Seini se punù ko kenyo. Eked sibwani te otaw egpemenal se esawa din kenà egpemenal meibeg megdoma kandin, 14 so aw egpemenal se sebad otaw, kenà mediyò lekat te Timanem se esawa din wedà pemenal. Iling heman kenyan se menge batà dan, so medapag dan diyà te Timanem. Kenà dan iling te batà te otaw kenà egpemenal. 15 Meneng se otaw kenà egpemenal, aw ibeg din tomanan te esawa din egpemenal, mepakay iyan. Eked pegtameng se otaw egpemenal, so ibeg te Timanem eked kidon pegleges te doma. 16 Pengkey temengan niyo se esawa niyo kenà egpemenal, meneng eked niyo ketegahi aw memenal dan.

17 Keilangan tomaking se teg sebad-sebad kenitadon te ibeg te Pengolo tadon, aw tomayod kidon heman te keogpà te pegpenenalan tadon te tawal te Timanem. Yan se ipegpunù ko diyà te kedita te otaw egpemenal. 18 Aw netolì den se meama te wedà pa ketawal te Timanem, keilangan eked sikandin keyàyà te netolì sikandin. Aw wedà pa sikandin ketolì, kenà den keilangan tolien sikandin. 19 Pengkey tolien se otaw aw eked tolii, kenà niyan se meelagà diyà te Timanem, meneng yan se meelagà aw toloen tadon se punù te Timanem kenitadon. 20 Mèpiya aw tomayod se teg sebad-sebad kenitadon kidoen te keogpà te pegpenenalan tadon te tawal te Timanem. 21 Aw allang kaw te pegtawal te Timanem kenyo, wedad beloyan. Meneng aw ibeg te tig-apò megpelowà kenyo, lowà kaw. 22 Pengkey allang kaw pa, meneng iling kaw den te kenà allang, so impelowà kaw te Pengolo lekat te salà. Aw sikiyo kenà allang te pegtawal te Timanem kenyo, neinang kaw den iling te allang, so tinig-apò kaw den i Cristo. 23 So ontò meelagà se imbayad din kenyo, yan ikà niyo egpeallang diyà te doma otaw. 24 Yan menge kedowa ko, keilangan megpedeleg se teg sebad-sebad kenyo te pegsebad niyo diyà te Timanem iling te keogpà niyo te pegpenenalan niyo te tawal te Timanem.

25 Nayan, tomaba a te insà niyo tepad te menge otaw wedà pengognan. Wedad punù ikeliwat ko kandan lekat te Pengolo tadon, meneng pineokit te keido din kanak, egkeseligan a, aw seini den se aneng-aneng ko.

26 Mèpiya aw tomayod kaw te keogpà niyo songkani, so doen kelimahan agpet den domateng kenitadon. 27 Aw doen den esawa niyo, ikà niyo egpesibwanay. Aw wedad esawa niyo, ikà niyo egpengognan. 28 Meneng aw mengognan kaw, kenà iyan salà. Se ibeg ko olò, eked kaw peden detengi te kelimahan egdateng diyà te menge otaw doen esawa.

29 Menge kedowa ko, ibeg ko ketegahan niyo ini. Agpet den se aldaw te peglikò te Pengolo tadon. Yan lekat seini, pengkey doen esawa niyo, ikà niyo eglengà te pegtaking niyo te Timanem. 30 Pengkey melidò kaw, pengkey meluba kaw, pengkey doen kedònan niyo aw wedad, aw den iyan, so sebad olò se egtekingan niyo. 31 Pengkey eg-ogpà kaw dini te keneyonan, meneng ikà niyo eglengà te pegtaking niyo ki Cristo amon gayed kaw meketoman te ibeg te Timanem, so megkewedad se keneyonan seini te eked den kenamay.

32 Ibeg ko peden, wedad ketetana niyo, so se telaki, yan se mebatog din eneng-enengen olò se ibeg te Pengolo tadon amon meluba se Pengolo kandin. 33 Meneng se meama doen esawa, yan se eked kebatog metibok se aneng-aneng din tomaking ki Cristo, so eneng-enengen din heman se ibeg te esawa din amon meluba se esawa din kandin, 34 so egketengà se ibeg din. Iling heman kenyan se bayi, so se laga, mebatog din tiboken se pedowan din diyà te ibeg te Pengolo tadon, amon melinis se lawa din aw aneng-aneng din. Meneng se bayi doen esawa, yan se gayed din eneng-enengen se ibeg te esawa din amon meluba se esawa din kandin. 35 Eked a keibeg aw kelimahan kaw pineokit te inikagi ko, meneng ibeg ko megtabang a kenyo amon meg-inang kaw te mèpiya, aw tomaking kaw te Pengolo tadon te kedakel te pedowan niyo.

36 Na, aw doen otaw kidoen kenyo doen batà din laga metesan den wedà din pepengognani, aw todà meg-aneng-aneng se amay te mèpiya aw doen esawa te batà din, mepakay aw tomanen din se ibeg din sìyan. Aw mengognan se batà din, kenà iyan salà. 37 Meneng aw meg-aneng-aneng se amay te eked palos pepengognani se batà din laga, aw wedad megleges kandin, aw lekat te kandin ibeg, kenà medaet aw eked pepengognani te amay se batà din. 38 Mèpiya heman aw ipepengognan te amay se batà din, meneng labi pa mèpiya aw eked pepengognani se batà din.

39 Eked kepakay aw somoway se bayi te esawa din singed aw matay se meama. Meneng aw matay se meama, mepakay aw todà mengognan se bayi balo, meneng keilangan egpemenal te Pengolo tadon se pengognanen din. 40 Meneng se aneng-aneng ko, labi pa besi meluba se balo aw eked todà pengognan. Aneng-aneng ko, Espiritu Santo se migtoladà kanak kenyan.