5
Timanem se peg-ilingan
1 Yan, so ininang kaw te Timanem menge batà din egkedekelan din te pedowan, keilangan meg-iling kaw kandin. 2 Keilangan gayed kaw megpedekelay te pedowan iling te kedakel te pedowan i Cristo kenitadon. Pegkematay i Cristo doton te kros, simelilin sikandin kenitadon, aw yan neinang sikandin iling te ayam-ayam inimetayan amon mesinalay se Timanem.
3 So sakop kaw te Timanem, ikà niyo eglayok te kenà kenyo esawa. Ikà niyo egkapoy. Ikà niyo eg-ingà. Keilangan ketegahan te wedad palos eg-inangen niyo iling kenyan. 4 Eked heman kepakay aw mikagi kaw te medaet. Eked heman kepakay aw mikagi kaw te wedad ontong. Eked heman kepakay aw megkebawol kaw te medaet. Meneng keilangan gayed kaw megpesiontong diyà te Timanem. 5 Ketegahan niyo te benal se kagi ko seini. Eked peekopi i Cristo aw Timanem se otaw diyà te peglowan din aw eglayok dan te kenà kandan esawa, aw egkapoy dan, aw eg-ingà dan. Aw eg-ingà se otaw, doen egsimbahen din kenà Timanem.
6 Ipelumun te Timanem se kedita te otaw eg-inang te medaet iling kenyan, so kenà dan egtolò kandin. Yan peg-ahà kaw amon eked kaw keekali te otaw egpelingo-lingo egtoladà te kebenalan. 7 Ikà niyo egtaking kandan. 8 Kedengan, diyà kaw te kengitngitan, so wedà kaw pa ketaga-taga tepad te Timanem. Meneng songkani diyà kaw den te kelowahan, so migpesakop kaw diyà te Pengolo tadon. Yan keilangan imendayan niyo se keogpà niyo diyà te kelowahan. 9 Aw imendayan niyo se keogpà niyo diyà te kelowahan, ketegahan iyan pineokit te mèpiya se pedowan niyo, aw metòlid se eg-inangen niyo, aw egkeseligan kaw. 10 Pekagsen kaw peg-iling te inang mekebegay te luba diyà te Pengolo tadon. 11 Ikà niyo eg-inabut te inang wedad ontong eg-inangen te menge sakop te kengitngitan. Meneng keilangan ipekità niyo te medaet se eg-inangen dan. 12 Ontò medaet se eg-inangen dan kenà egkitaen te doma otaw, igsà mekeyèyaay se otaw mikagi tepad kenyan. 13 Meneng aw ipekità se eg-inangen te otaw doton te kelowahan, yan ontò ketegahan aw eden se mèpiya aw medaet. 14 Aw doen manyag, keenyagan se kedita. Yan se doun te doen eg-ikegiyen seini.
“Aw timedogi ka pa, keloka ka den.
Aw nematay ka pa, keantay ka den lekat te nematay,
So keenyagan kaw den i Cristo.”
15 Peg-ahà kaw tepad te eg-inangen niyo. Ikà niyo eg-iling te otaw wedad inenengen. Meneng peg-iling kaw te otaw doen inenengen. 16 Keilangan meg-inang kaw te mèpiya dalem te doen pa aldaw, so medita se otaw gayed eg-inang te medaet songkani. 17 Yan ikà niyo eg-inang te wedad ontong, meneng keilangan tomolò kaw te ibeg te Pengolo tadon.
18 Ikà niyo eglasing, so mekedaet iyan kenyo. Meneng keilangan beyà-beyaan kaw te Espiritu Santo. 19 Yan aw metipon kaw, pegdelangan kaw tandà te keluba te pedowan niyo, amon iduyun se Pengolo tadon. 20 Keilangan gayed kaw megpesiontong te kedita diyà te Timanem Amay tadon pineokit te ngadan te Pengolo tadon si Jesu Cristo.
Menge punù diyà te teleesawa
21 Keilangan megpesegmanay kaw tandà te pegtaking niyo ki Cristo.
22 Sikiyo menge bayi doen esawa, keilangan tomolò kaw te esawa niyo, iling te pegtolò niyo te punù te Pengolo tadon, 23 so meama se pengolo te esawa din, iling ki Cristo se Pengolo te kedita tadon egpemenal. Iling kidon te lawa din, aw sikandin se egpelowà kenitadon. 24 Yan keilangan tomolò se menge bayi te esawa dan, iling te pegtolò te kedita tadon egpemenal ki Cristo.
25 Sikiyo menge meama doen esawa, keilangan dakel se pedowan niyo te esawa niyo, aw yan meg-iling kaw ki Cristo. Dakel se pedowan i Cristo diyà te kedita tadon egpemenal, aw yan se doun te simelilin sikandin kenitadon aw nematay amon megpelowà kenitadon. 26 Yan se ininang din amon inangen kidon din ontò egpenimanem. Yan se ininang din, so lininisan kidon den i Cristo pineokit te pegpebonyag tadon diyà te wayeg pineokit te kagi te Timanem. 27 Lininisan kidon din amon meluba sikandin te pegtengteng din kenitadon, so ibeg din wedad salà tadon, aw wedad kemalì, aw wedad palos medaet iling kenyan. Meneng ibeg din ontò kidon menimanem. 28 Iling heman kenyan, keilangan dakel se pedowan te meama diyà te esawa din, iling te aneng-aneng din tepad te kandin lawa. Yan aw dakel se pedowan te meama diyà te esawa din, iling te dakel se pedowan din diyà te kandin pegkeotawun, 29 so wedad palos otaw egkebensi te kandin lawa, meneng gayed din iyan eg-ipaten. Iling heman kenyan, gayed eg-ipat si Cristo kenitadon egpemenal, 30 so iling kidon te menge kinemoloan te lawa din. 31 Doen kagi te Timanem insolat,
“Yan se doun te tomanan se meama te amay aw inay din, aw megsebad diyà te esawa din. Se didowa dan meinang sebad.”
32 Ontò mèpiya se kebenalan impetaga-taga te Timanem pineokit te kagi din sìyan, aw mikagi a den diyà kenyo te kedegdagan niyan. Yan se kebenalan tepad ki Cristo aw sikitadon egpemenal. 33 Meneng ibeg ko ketegahan niyo te keilangan dakel se pedowan te teg sebad-sebad meama te esawa din, iling te aneng-aneng din tepad te kandin pegkeotawun. Keilangan megsagman heman se bayi te kandin esawa.