1 Doen sebad aldaw, inindanan si Jose te nesekitan se amay din. Yan impetaking din se dowa batà din si Efraim aw si Manases, aw dimoton dan ki Jacob. 2 Inindanan si Jacob te dimateng se batà din si Jose, aw yan migkagsen sikandin aw minenaw diyà te katri din. 3 Minikagi si Jacob diyà ki Jose, “Kedengan, migpekità se Timanem metolos diyà kanak kidoen te Luz doton te Canaan, aw mèpiya se impakang din kanak. 4 Minikagi sikandin, ‘Medita se batà ibegay ko kamno amon meinang medita pongan se menge bowad-bowad nikaw. Ibegay ko se tanà dini te Canaan diyà te menge bowad-bowad nikaw amon tig-epoen dan ini te wedad temanan.’ ”

5 Minikagi heman si Jacob, “Se didowa batà nikaw timebaw dini te Ehipto te wedà a pa alin dini, yan se sekopen ko diyà te menge batà ko. Inangen ko kanak batà si Efraim aw si Manases, onawa te ontò batà ko si Ruben aw si Simeon. 6 Aw betaen no pa se doma, eked ko dan sekopi, meneng tepad te tanà kinewaen te menge bowad-bowad ko te pegkematay ko, mesakop dan diyà te pongan te kakay dan si Efraim aw si Manases. 7 Keidowan ko se didowa batà no sìyan tandà te dakel se pedowan ko diyà te inay no si Raquel. Ontò nepuluk se pedowan ko te pegkematay din doton te Canaan medapag te Efrata te peg-olì ko lekat te Mesopotamya. Inlebeng ko se lawa din medapag te dalan pesalo te Efrata.” (Se lonsod te Efrata, yan se iningedanan Bitlihim songkani.)

8 Pegkità i Jacob te didowa batà i Jose, mig-insà sikandin, “Sinu lay se menge telaki sìyan?”

9 Timaba si Jose, “Seini se didowa batà ko imbegay te Timanem kanak dalem te peg-ogpà ko dini te Ehipto.”

Minikagi si Jacob, “Ibingi dan diyà, so megtawal-tawal a den amon begayan dan te Timanem te mèpiya.”

10 Tabag den medaet se mata i Jacob so migketemoay den sikandin, aw yan wedà nael sikandin kità. Inibing i Jose se batà din, aw yan kinelesan dan i Jacob aw inedekan din dan. 11 Minikagi si Jacob diyà ki Jose, “Kedengan mig-aneng-aneng a te eked a den palos kità kamno, meneng pineokit te tabang te Timanem kanak, kimità a den kamno aw menge batà nikaw heman.”

12 Penga niyan, inabat i Jose se batà din lekat te giba te amay din, aw limongken sikandin diyà te amay din lamig minapet se olo din diyà te tanà.

13 Impetindeg i Jose si Efraim lenged te bibang i Jacob, aw si Manases lenged te kowanan din. 14 Meneng pig-ibelios i Jacob se belad din, so belad din lenged te kowanan se impemaed din te olo i Efraim, pengkey adi sikandin, aw bibang din se impemaed din te olo te kakay si Manases. 15 Penga niyan, migtawal-tawal sikandin amon begayan te Timanem si Jose te mèpiya, kagi din, “E Timanem, sikona se egseligan te menge kemonaan ko si Abraham aw si Isaac. Sikona se gayed mig-ipat kanak lamig songkani. 16 Sikona se migpelowà kanak amon wedad memeeleg kanak. Ibeg ko mèpiya se ibegay no diyà te didowa telaki seini. Ibeg ko eked palos kelibeli se ngadan ko aw ngadan te menge kemonaan ko si Abraham aw si Isaac pineokit te didowa apò ko seini. Ibeg ko heman, megkedita se batà dan aw menge bowad-bowad dan.”

17 Nayan, pegkità i Jose te si Efraim se pinemàdan te amay din te kowanan, wedà sikandin keibeg kenyan. Yan inabat din se belad te amay din amon elinen din lekat te olo i Efraim doton te olo i Manases. 18 Minikagi si Jose, “Amà, wedà iyan peketotok, so seini se kakay. Seini se keilangan pemàdan nikaw te kowanan.”

19 Meneng mig-eked si Jacob, aw minikagi sikandin, “Netegahan ko iyan Atò. Netegahan ko iyan. Meinang heman melangkaw se menge bowad-bowad i Manases, meneng labi pa melangkaw si Efraim, so meinang medita pongan se menge bowad-bowad din.”

20 Yan mèpiya se intawal-tawal din diyà te Timanem tepad kandan te aldaw sìyan te peg-ikagi din kani, “Kenyo ngadan se gemiten te menge bowad-bowad ko te peg-ikagi dan te mèpiya diyà te menge doma otaw, so mikagi dan, ‘Ibeg day, mèpiya se ibegay te Timanem kenyo, iling te ipegbegay din diyà ki Efraim aw si Manases.’ ”

Pineokit kenyan, ininang i Jacob si Efraim labi pa melangkaw diyà ki Manases. 21 Penga niyan, minikagi si Jacob diyà ki Jose, “Nayan, agpet den se aldaw te pegkematay ko, meneng ipaten ka pa te Timanem, aw ipeolì din se menge bowad-bowad ta te modi aldaw doton te tanà inogpaan te menge kemonaan ta gebii. 22 Kenà menge kedowa nikaw se begayan ko den te tanà ko doton te Sikem, meneng sikona se begayan ko kenyan. Yan se tanà melambò inabat ko lekat te menge tege Amori te pegpengayaw ko kandan te sondang aw bosog.”