1 “Iling heman kani se keteboan te peglowan te Timanem. Doen sempolò laga simongon te meama peipiden. Doen solò inibing te teg sebad-sebad kandan. 2 Lima se laga doen mèpiya aneng-aneng, aw lima se laga kolang se aneng-aneng dan. 3 Doen solò inibing te lima laga kolang se aneng-aneng dan, meneng wedad pitrolyo inibing dan amon iawop dan diyà te solò dan aw meamin se awop niyan. 4 Meneng nengibing se lima laga doen mèpiya aneng-aneng te solò dan aw pitrolyo todà dan iawop. 5 Pegtagad dan te pegdateng te meama peipiden, nepilot se kedita dan aw timedogi dan, so nenamay wedà dateng se tinegadan dan.

6 “Pegketengà te delem, dinineg dan se otaw minikagi, ‘Na, dimateng den se peipiden. Ayas kaw den songon kandin.’ 7 Yan neloka se kedita te laga aw migtodà dan te mitsa te solò dan. 8 Minikagi se lima laga kolang se aneng-aneng dan diyà te lima laga doen mèpiya aneng-aneng, ‘Begayi kay bag te pitrolyo, so agpet den mepadeng se solò day.’ 9 Meneng minikagi se lima laga doen mèpiya aneng-aneng, ‘Eked kay pemegay, so eked kidon keteped te pitrolyo inibing day. Mèpiya aw domoton kaw te tinda amon mayad kaw.’ 10 Yan dimoton dan te tinda amon mayad dan. Penga te pegkesayo dan, dimateng se otaw peipiden. Timaking heman se kedita te neketagad, aw dimoton dan te peipid. Penga te peg-awop dan kidoen te balay, tinakep se lelebangan niyan.

11 “Pegkenamay-namay, dimateng se lima laga lekat te tinda. Timawal dan doton te lowà te balay, kagi dan, ‘Sir, owangi bag se tetakep.’ 12 Meneng minikagi sikandin, ‘Wedà ko sikiyo kilelai.’

13 “Yan se doun te keilangan gayed kaw megpeketagad, so wedà niyo ketegahi aw eden eldawi aw orasi se peglikò ko.”

14 “Iling heman kani se peglowan te Timanem. Doen otaw dimoton te mediyò ogpeanan. Meneng te wedà pa kesayo, tinawal din se kedita te sineligan din aw imbegay din diyà kandan se kwarta insalig kandan. 15 Doen kwarta imbegay din diyà te teg sebad-sebad kandan tepad te kebiyasa dan. Lima melalan se imbegay din diyà te sebad otaw, aw dowa melalan se imbegay din diyà te doma otaw, aw sebad melalan se imbegay din diyà te doma otaw. Penga niyan, nesayo sikandin. 16 Nayan, se otaw binegayan din te lima melalan, mignigosyo sikandin aw doen gamad din lima melalan. 17 Iling heman kenyan se ininang te otaw binegayan din te dowa melalan, so doen gamad din dowa melalan. 18 Meneng se otaw binegayan din te sebad melalan, nemangbang sikandin kidoen te tanà aw inlebeng din se kwarta imbegay diyà kandin.

19 “Nayan, pegkenamay, minolì se amo dan, aw tinawal din se sineligan binegayan din te kwarta amon ketegahan din aw doen gamad dan. 20 Pegdateng te sineligan binegayan din te lima melalan, inibing din iyan sipat gamad din lima melalan, aw minikagi sikandin, ‘Sir, lima melalan se imbegay no diyà kanak, aw doen den heman gamad ko lima melalan.’ 21 Minikagi se amo din, ‘Mèpiya se ininang nikaw. So keseligan ka, labi pa dakel se ibegay ko diyà kamno. Ibeg ko meluba ka heman onawa te kanak pegkeluba.’ 22 Penga niyan, dimateng se sineligan binegayan din te dowa melalan, aw minikagi sikandin, ‘Sir, dowa melalan se imbegay no diyà kanak, aw doen den heman gamad ko dowa melalan.’ 23 Minikagi se amo din, ‘Mèpiya se ininang nikaw. So keseligan ka, labi pa dakel se ibegay ko diyà kamno. Ibeg ko meluba ka heman onawa te kanak pegkeluba.’ 24 Penga niyan, dimateng heman se sineligan binegayan din te sebad melalan, aw minikagi sikandin, ‘Sir, netegahan ko te mebolot ka otaw, so eglegeniyen no se intanem te doma otaw, aw gayed no ipegsawol diyà te pol nikaw se omay trigo impepalid te doma otaw. 25 Yan wedà a pegnigosyo te kwarta nikaw, meneng inlebeng ko iyan kidoen te tanà, so nelemitan a kamno. Iolì ko den diyà kamno se sebad melalan imbegay no diyà kanak.’ 26 Minikagi se amo din, ‘Tekahen ka aw ontò medaet se ininang nikaw. Minikagi ka den te eglegeniyen ko se intanem te doma otaw, aw ipegsawol ko diyà te pol ko se omay trigo impepalid te doma otaw. Aw netegahan no iyan, 27 keilangan ipebeles no peden se kwarta ko diyà te doma otaw amon iolì iyan diyà kanak te peg-olì ko sipat batà niyan.’ 28 Penga niyan, minikagi sikandin diyà te menge doma sineligan, ‘Na, ebati niyo se sebad melalan imbegay ko diyà kandin, aw begayi niyo diyà te otaw doen sempolò melalan. 29 Se otaw egkeseligan, yan se begayan ko te labi pa dakel diyà te keilangan din. Meneng se otaw kenà egkeseligan, yan se ebatan ko te imbegay ko diyà kandin. 30 Na, se medaet otaw seini, ibingi niyo sikandin kidoen te lowà doton te kengitngitan amon ipelumun. Ontò megkelag se otaw kidoen, aw megyangget-yangget se ngipen dan tandà te kegemakan dan.’ ”

31 “Aw lomikò a Timanem Migpekeotaw amon lomowan a, tekingan a te kedita te anghil. Penga niyan, menenoo a kidoen te melangkaw onsedanan te peglowan amon meg-okom a te kedita te otaw 32 tiponen ko lekat te kebelad te keneyonan. Tepiden ko dan diyà te dowa pongan iling te eg-inangen te telediyaga te karniro aw tepiden din se menge karniro aw kambing, 33 so egtiponen din se karniro lenged te kowanan din aw egtiponen din heman se kambing lenged te bibang din. Iling heman kenyan se inangen ko te peg-okom ko, 34 so mikagi a diyà te menge otaw lenged te kowanan ko, ‘Taking kaw den kanak, so pinemallì kaw te Amay ko Timanem amon meluba kaw. Metoman den iyan so megtebò a den lomowan diyà kenyo iling te peglalang te Amay ko te wedà pa inangi se keneyonan. 35 Pegkeballos ko, impekaen a niyo. Pegkelao ko, impeinem a niyo. Pengkey wedà a niyo kilelai te pegdateng ko doton kenyo, meneng impeogpà a niyo doton te balay niyo. 36 Pegkewedad te penenaktun ko, doen imbegay niyo kanak. Pegkesakit ko, mig-ipat kaw kanak. Pegkekeleboso ko, linaoy a niyo.’ 37 Penga niyan, meg-insà se otaw lenged te kowanan ko eg-inang te metòlid, kagi dan, ‘Sir, kano ka lay bellosi, penga niyan impekaen ka day? Kano ka lay kelao, penga niyan impeinem ka day? 38 Kano ka lay dini wedà ka day kilelai, penga niyan impeogpà ka day doton te balay? Kano lay pegkewedad se penenaktun no, penga niyan binegayan ka day? 39 Kano ka lay kesekiti aw kekeleboso, penga niyan mig-ipat kay kamno?’ 40 Tomaba a, ‘Eneng-enengi niyo se kagi ko seini. Pineokit te peg-inang niyo kenyan diyà te ontò medanà otaw egtaking kanak, ininang niyo iyan diyà kanak.’

41 “Penga niyan, mikagi a heman diyà te menge otaw lenged te bibang ko, ‘Ontò kaw ipelumun. Kesayo kaw den lekat kanak. Doton kaw den te kilot doen apoy eked palos kepadeng, so yan se integilan te Timanem amon doen egbelan din ki Satanas aw kedita te anghil din. 42 Pegkeballos ko, wedà a niyo pekàni. Pegkelao ko, wedà a niyo peinemi. 43 Pegdateng ko doton kenyo, wedà a niyo peogpai doton te balay niyo. Pegkewedad te penenaktun ko, wedà a niyo begayi. Pegkesakit ko aw pegkekeleboso ko, wedà a niyo leoyi.’ 44 Meg-insà dan heman, ‘Sir, kano kay lay kità te binallos ka, aw nelao ka, aw wedad ogpeanan no, aw wedad penenaktun no, aw nesekitan ka, aw kineleboso ka, penga niyan wedà kay pegtabang kamno?’ 45 Tomaba a, ‘Eneng-enengi niyo se kagi ko seini. Pineokit te wedà kaw pegtabang te ontò medanà otaw egtaking kanak, wedà a niyo tebangi.’ 46 Penga niyan, ipedeleg dan doton te pelumun wedad temanan. Meneng se otaw eg-inang te metòlid, begayan dan te kaling pedowan wedad temanan.”