1 Nayan, mig-indan si Jesus te menge tegdeyanan diyà te medita otaw netipon kidoen. Minikagi sikandin, “Doen otaw migpawà aw nenanem te paras. Mig-inang sikandin te alad, aw tigmesanan te paras, aw layag. Penga niyan, impetonggò din iyan te menge doma otaw, aw dimoton te mediyò ogpeanan. 2 Pegdateng te aldaw te peglegani, doen sineligan insogò te tig-apò amon doen talad ebaten din lekat te menge otaw impetonggò din. 3 Meneng pegdateng te sogounun doton kandan, binadas dan sikandin aw impekesayo dan te wedad palos imbegay kandin. 4 Penga niyan, doen doma sineligan insogò te tig-apò. Meneng binonalan dan sikandin diyà te olo, aw ontò dan pa pigyàyà. 5 Penga niyan, doen doma sineligan insogò te tig-apò. Meneng inimetayan dan. Medita pa se sineligan insogò din doton kandan, meneng doen binadas dan, aw doen heman inimetayan dan. 6 Se temanan insogò din, yan se batà din egkedekelan din te pedowan, so aneng-aneng din keilangan segmanen dan se kandin batà. 7 Meneng pegdateng te batà din doton, migpebelaw-belaway dan, ‘Seini se meketig-apò te tanà seini aw matay se amay din. Mèpiya aw imetayan tadon sikandin amon sikitadon den se meketig-apò te tanà seini.’ 8 Penga niyan, inimetayan dan sikandin aw in-agbel dan se lawa din doton te lowà te pawà.

9 “Nayan, meg-indan a den diyà kenyo aw eden se inangen te tig-apò diyà kandan. Domoton sikandin aw imetayan din se kedita dan, aw ipetonggò din se pawà din te doma otaw. 10 Migbasa kaw den besi te kagi te Timanem seini insolat,

12 Pegdineg te menge obanen te Judiyo kenyan, netegahan dan te sikandan se nesogatan te tegdeyanan din sìyan, aw yan se doun te ibeg dan megdakep peden kandin. Meneng wedà dan peketoman, so nelemitan dan te menge otaw gayed egpenenalan kandin. Penga niyan, nesayo dan lekat kidoen.

13 Wedà kenamay, doen menge Parisiyo aw menge sakop i Herod insogò dan doton ki Jesus, so ibeg dan doen idimanda dan tepad te pegtoladà din. 14 Pegdateng dan doton ki Jesus, minikagi dan, “Sir, netegahan day te kenà ka egkebolalaw. Netegahan day heman te pengkey sinu se otaw toledaan nikaw, gayed ka egtoladà te kebenalan tepad te ibeg te Timanem. Nayan, doen insà day kamno. Lomàpang kidon lay te menge punù ingkeliwat i Moises aw mayad kidon te mihoras diyà te gobirno te Roma? Mepakay lay aw eked?”

15 Meneng netegahan i Jesus te medaet se tod dan te peg-insà dan kenyan. Yan minikagi sikandin, “Medaet se pegtandà niyo kanak. Pekitai niyo kanak se kwarta ipegbayad niyo te mihoras.”

16 Penga niyan, imbegay dan diyà kandin se kwarta plata. Mig-insà si Jesus, “Sinu lay bawa se insawol kidoen? Sinu lay ngadan se insolat kidoen?”

Timaba dan, “Selotan te Roma.”

17 Minikagi si Jesus, “Begayi niyo diyà te selotan se keilangan ibegay niyo diyà kandin, aw begayi niyo heman diyà te Timanem se keilangan ibegay niyo diyà kandin.”

Pegdineg dan kenyan, nepela dan.

18 Doen heman menge Sadusiyo dimoton ki Jesus. Yan se menge otaw egtoladà te eked palos keantay se otaw lekat te nematay. Mig-insà dan diyà ki Jesus, kagi dan, 19 “Sir, doen impunù i Moises kenitadon tepad te inangen te telekedowa meama. Aw matay se meama te wedad pa batà te esawa din, keilangan mengognan se kedowa te nematay diyà te nayi din nebalo, amon doen peden batà te kedowa din nematay. 20 Na, doen ekon pito telekedowa meama. Nengognan se kakay dan, aw nematay sikandin te wedad pa batà dan. 21 Penga niyan, nengognan se ikedowa meama te nayi din nebalo, meneng nematay heman sikandin te wedad pa batà dan. Onawa heman se neinang te iketelo meama. 22 Migpetibos-tibosay se pito telekedowa nengognan te bayi sìyan, meneng nematay se kedita dan te wedad pa palos batà dan. Penga niyan, nematay heman se bayi. 23 Nayan, indani kay. Aw meantay se otaw lekat te nematay, sinu lay lebò diyà kandan se ontò esawa te bayi sìyan? So migpetibos-tibosay dan se pito nengognan kandin.”

24 Minikagi si Jesus, “Ontò kaw migkemalì, so wedà niyo pa kelebeti se kagi te Timanem insolat, aw wedà niyo heman ketegahi aw eden se mebatog inangen te Timanem pineokit te tolos din. 25 Aw entayen te Timanem se menge otaw lekat te nematay, eked dan palos pengognan, so iling dan te menge anghil eg-ogpà doton te langit. 26 Wedà kaw ketaga-taga te metoman meantay se otaw lekat te nematay, so wedà kaw besi pegbasa te libro insolat i Moises gebii. Pegsolat din tepad te pegpekità te Timanem diyà kandin kidoen te sagbet limegdeg, minikagi se Timanem diyà kandin, ‘Siak se Timanem gayed egseligan i Abraham, aw si Isaac, aw si Jacob.’ 27 Yan kenà otaw wedad pedowan se egsalig te Timanem, meneng otaw doen pedowan se egsalig kandin. Yan se doun te ontò kaw migkemalì.”

28 Nayan, dimateng se sebad menenoladà te punù ingkeliwat i Moises, aw dinineg din se pegpebelaw-belaway dan. Pegketaga-taga din te mèpiya se intaba i Jesus kandan, mig-insà sikandin, “Diyà te kedita te punù ingkeliwat i Moises, eden lay punui se ontò melangkaw?”

29 Minikagi si Jesus, “Seini se punù ontò melangkaw.

32 Minikagi se menenoladà sìyan, “Sir, neketotok se intaba nikaw. Benal se inikagi no te sebad olò se Timanem, aw wedad doma timanem lowà pa diyà kandin. 33 Benal heman se inikagi no te keilangan kedekelan tadon sikandin te pedowan te ontò melobos se pedowan tadon kandin, aw keilangan kedekelan tadon te pedowan se doma otaw iling te peg-aneng-aneng tadon te kenitadon pegkeotawun. Pengkey mèpiya se pegpengimatay aw pegsonog tadon te ayam-ayam ibegay diyà te Timanem, meneng labi pa mèpiya aw tomolò kidon te didowa punù sìyan.”

34 Pegdineg i Jesus te mèpiya se intaba din, minikagi sikandin, “Agpet den se pegpesakop no diyà te peglowan te Timanem.”

Lekat te aldaw sìyan, wedad palos otaw migtelaman mig-insà ki Jesus.

35 Nayan, pegtoladà i Jesus doton te dakel simbahan, minikagi sikandin, “Benal se ipegtoladà te menge menenoladà te punù ingkeliwat i Moises te bowad-bowad i David se Misiyas isogò te Timanem dini kenyo. 36 Meneng minikagi si David te Pengolo din se Misiyas. Pineokit te pegbayà-bayà te Espiritu Santo ki David, insolat din se kagi seini,

Neluba se kedita te otaw nenenalan ki Jesus. 38 Pegtoladà din, minikagi sikandin, “Peg-ahà kaw te menge menenoladà te punù ingkeliwat i Moises. Gayed dan egpenaol te melayat, aw ibeg dan segmanen dan te doma otaw doton te pedyanan. 39 Ibeg dan heman menenoo doton te mèpiya onsedanan kidoen te simbahan te Judiyo. Aw doen dakel kànen, ibeg dan sikandan se monà ipekaen. 40 Meneng sikandan se eg-agaw te kedònan te menge bayi balo, aw penga niyan menamay se pegtawal-tawal dan amon megpelingo-lingo dan te melobos se pedowan dan diyà te Timanem. Meneng metoman dan ontò ipelumun labi pa diyà te doma otaw.”

41 Nayan, nenenoo si Jesus doton didalem te dakel simbahan te Jerusalem medapag te solanan te kwarta ibowang diyà te Timanem. Timengteng sikandin diyà te menge otaw egsawol te kwarta dan kidoen. Medita se otaw meyaman egsawol te dakel kwarta ibowang dan. 42 Penga niyan, dimateng se sagkep bayi balo, aw migsawol sikandin te didowa kedakò kidoen wedad nael keelagà niyan. 43 Penga niyan, tinawal i Jesus se menge tinoledaan din, aw minikagi sikandin, “Eneng-enengi niyo se kagi ko seini. Pengkey dakel se imbowang te kedita te doma otaw migsawol te kwarta kidoen, meneng labi pa meelagà se imbowang te bayi balo sida. 44 Dakel se kwarta te doma otaw aw eked dan kelimahi tandà te pegpemegay dan. Meneng se bayi sida sagkep, tinigkan din imbowang se kedakel te kedònan din, pengkey nelimahan sikandin.”