1 Nayan, peglibtak te aldaw sìyan, netipon se kedita te pengolo te simbahan, aw menge obanen te Judiyo, aw menge menenoladà te punù ingkeliwat i Moises. Netipon se kedita dan amon meglalang dan aw eden se inangen dan. Penga niyan, ginapos dan si Jesus, aw inibing dan sikandin doton te gobirnador si Pilato. 2 Pegdateng dan doton, mig-insà si Pilato ki Jesus, kagi din, “Sikona lay se Selotan te menge Judiyo?”

Timaba si Jesus, “Ee. Benal se kagi nikaw.”

3 Penga niyan, medita se indimanda te menge pengolo te simbahan tepad kandin. 4 Minikagi heman si Pilato, “Medita se indimanda dan tepad kamno. Eden lay se itaba no kandan?”

5 Meneng wedà den taba si Jesus, aw yan se doun te nepela si Pilato.

6 Nayan, kelikit te Pista te Pegpelowà, doen ketanem te gobirnador te ipelowà din se sebad otaw kineleboso, pengkey sinu se pemellien te kedita te otaw. 7 Na, dalem niyan, doen menge ribildi kineleboso, so nemonò dan te otaw te peg-ato dan te gobirno. Doen sebad kandan iningedanan ki Barabas. 8 Pegketipon te medita otaw, nemoyò dan ki Pilato amon ipelowà din se otaw kineleboso, so yan se ketanem din. 9 Penga niyan, mig-insà si Pilato, “Meibeg kaw lay aw ipelowà ko se Selotan te menge Judiyo?”

10 Yan se inikagi i Pilato, so netegahan din te impedakep te menge pengolo te simbahan si Jesus so miningà dan kandin. 11 Meneng gayed migdeliseg se menge pengolo te simbahan diyà te otaw netipon kidoen amon ipelowà din si Barabas aw eked din pelowai si Jesus. 12 Mig-insà heman si Pilato, “Menonen ko sikandin egtewalen niyo Selotan te menge Judiyo?”

13 Migbelobansag dan heman, kagi dan, “Imetayi sikandin. Lensangi diyà te kros.”

14 Mig-insà si Pilato, “Nengà lay? Eden lay se salà ininang din?”

Meneng labi pa dakel se kagi dan, aw migbelobansag dan, “Imetayi sikandin. Lensangi diyà te kros.”

15 Penga niyan, impelowà i Pilato si Barabas lekat te keleboso, so ibeg din meluba se medita otaw netipon. Impebadas din si Jesus, aw impeibing din amon ilansang diyà te kros.

16 Penga niyan, inibing te menge sondalo si Jesus doton didalem te balay te gobirnador, aw migtipon dan te kedita te doma dan sondalo. 17 Penga niyan, pineseolan dan sikandin te melalag saol iling te saol te selotan. Linekò dan se belagen doen tigis aw yan se insangkob dan diyà te olo din iling te korona te selotan. 18 Penga niyan, migpelingo-lingo dan te egsegmanen dan sikandin, kagi dan, “Iduyun sikona Selotan te menge Judiyo.”

19 Penga niyan, binadas dan se olo din te tigbaw, aw tineptepan dan sikandin. Limongken dan heman diyà kandin aw migpelingo-lingo dan te sikandin se selotan egsegmanen dan. 20 Penga te pegtompuyus dan kandin, linowas dan se melalag saol lekat kandin, aw impesaol dan diyà kandin se kandin saol. Penga niyan, inibing dan sikandin lekat te balay te gobirnador amon ilansang diyà te kros.

21 Nayan, kidoen te dalan, netelaan te menge sondalo se sebad tege Sirene kaling dimateng lekat te saka. Ngadan din si Simon, aw batà din si Alejandro aw si Rufo. Lineges dan sikandin neniang te kros. 22 Inibing te menge sondalo si Jesus doton te bontod iningedanan Golgota. (Se kelebadan niyan, “Tòlan te Olo.”) 23 Pegdateng dan doton, imbegay te sondalo diyà ki Jesus se bino sinengedan te bebolong te saka iningedanan mira amon eked din imenmani se kesakit. Meneng wedà din inemi. 24 Penga niyan, inlansang dan sikandin diyà te kros. Penga niyan, pigtalad-talad te menge sondalo se penenaktun linowas din, aw migbonot dan aw eden se penenaktun meabat te teg sebad-sebad kandan. 25 Menge alas nowibi se oras te peglansang dan kandin diyà te kros. 26 Doen solat tepad te indimanda kandin insawol dan kidoen, kagi niyan, “Seini se Selotan te menge Judiyo.”

27 Doen heman dowa megdedempasay inlansang diyà te kros kidoen te tangkil din, aw si Jesus diyà te tengà-tengà. [ 28 Yan netoman se kagi te Timanem insolat gebii,

29 Migtompuyus kandin se menge otaw minokit diyà te dalan medapag kidoen. Migkiling-kiling dan te olo dan te pegsila dan kandin, aw minikagi dan, “Ehe. Minikagi ka te mekebatog ka megbaet te dakel simbahan sida, aw todà no iyan ipetindeg dalem te telo se aldaw. 30 Na, aw mekebatog ka kenyan, pekitai diyà kenami te doen tolos no pineokit te pegtabang no te kamno pegkeotawun amon eked ka kematay. Tenà ka den lekat te kros.”

31 Iling heman kenyan se pegtompuyus te menge pengolo te simbahan, aw menenoladà te punù ingkeliwat i Moises. Minikagi dan, “Migtabang sikandin te menge doma otaw netigdaan amon eked dan pa kematay. Meneng eked den sikandin peketabang te kandin pegkeotawun amon eked kematay. 32 Aw benal sikandin se Misiyas aw Selotan te menge bowad-bowad i Israel, mekebatog sikandin tomenà lekat te kros dalem te pegtengteng tadon kandin, amon memenal kidon kandin.”

Iling heman kenyan se pegtompuyus te doma otaw inlansang diyà te kros kidoen te tangkil din.

33 Nayan, pegkealas dosi te aldaw, migkengitngit se langit aw tanà lamig alas tris te meapon. 34 Menge alas tris te meapon, timawal si Jesus te dakel se kagi din, kagi te Hebreo, “Eloi, Eloi, lama sabaktani?” Se kelebadan niyan, “E Timanem ko, nengà lay tinenanan a nikaw?”

35 Pegdineg te menge otaw netipon kidoen, minikagi dan, “Na, nengenganay den sikandin diyà ki Elias, sìyan telekeliwat te kagi te Timanem gebii.”

36 Doen otaw ayas minangay te ispongha aw inagem din iyan diyà te bino sinengedan te wayeg. Intangen din iyan diyà te toktok te tigbaw, aw impesopsop din iyan ki Jesus. Minikagi heman se otaw, “Pebeyai niyo sikandin, so kitaen tadon aw domini si Elias amon mengabat kandin.”

37 Penga niyan, timawal si Jesus te dakel se kagi din, aw penga niyan nematay.

38 Nayan, tigkan nelisì se kayad kidoen te tengà-tengà te dakel simbahan te Jerusalem. Nelisì iyan lekat diatas lamig diyà te ongan. 39 Gayed timengteng se kapitan te sondalo ki Jesus, aw pegkità din te pegtawal din aw pegkematay din, minikagi sikandin, “Ontò Batà te Timanem se otaw sìyan.”

40 Doen heman menge bayi kidoen kenà mediyò te kros, aw kinità dan se kedita te neinang. Sikandan si Maria tege Magdala, aw kesangay din si Maria inay te kaling otaw si Santiago aw si Jose. Kidoen heman si Salome. 41 Sikandan se tapay timaking ki Jesus te peglegeb din kidoen te probinsya te Galiliya amon megtabang dan kandin. Medita heman se doma dan bayi timaking ki Jesus te pegdoton din te Jerusalem.

42-43 Agpet den somallep se aldaw, aw keeldawan niyan se Sebado aw aldaw te peg-etod. Doen otaw si Jose tege Arimatiya. Sikandin se sebad obanen egsegmanen te menge doma din obanen eglowan diyà te menge Judiyo, aw egpeliman sikandin te peglowan te Timanem. Pegkeapon niyan, impesalig din se pedowan din, aw dimoton ki Pilato, aw pinemoyò din se lawa i Jesus amon ilebeng din. 44 Nepela si Pilato te nematay den si Jesus. Yan se doun te impeangay din se kapitan te sondalo, aw mig-insà kandin aw nematay den si Jesus. 45 Peg-ikagi te kapitan te benal nematay den si Jesus, migpunù si Pilato te mepakay aw ebaten i Jose se lawa din. 46 Penga niyan, bineyadan din se sapot, aw inabat din se lawa lekat te kros, aw ginakes din iyan te sapot, aw inlebeng din kidoen te lebeng impeawang diyà te pangpang. Penga niyan, kinelid din se dakel bato amon isampeng te lebeng. 47 Timaking heman si Maria tege Magdala aw kesangay din si Maria inay i Jose, aw kinità dan se linebengan te lawa.