1 Yan eked pelumuni te Timanem se kedita te otaw migpesakop diyà ki Jesu Cristo. 2 So pegsebad ko diyà ki Jesu Cristo, doen kaling pedowan imbegay te Espiritu Santo kanak, aw yan se doun te wedad den keilangan meg-inang a te salà, aw eked a den heman detengi te pelumun. 3 So medaet se pedowan tadon, eked kidon peketolò te menge punù ingkeliwat i Moises. Meneng tinebangan kidon te Timanem, so insogò din se Batà din dini te tanà. Migpekeotaw sikandin amon ipelumun tandà te salà tadon. Pineokit te pegkematay din, wedad den eneg te salà, aw eked kidon den keleges tomaking te medaet ibeg te pedowan tadon. 4 Yan se ininang te Timanem amon mekeinang kidon te metòlid iling te impunù din ingkeliwat i Moises. Eked kidon keleges tomaking te medaet ibeg te pedowan tadon, so egpenabang se Espiritu Santo kenitadon amon mekeinang kidon te metòlid. 5 Aw egbeyà-beyaan se otaw te medaet ibeg te pedowan din, gayed sikandin eg-aneng-aneng tepad te pegtoman din te medaet ibeg din. Meneng aw egbeyà-beyaan te Espiritu Santo se otaw, gayed sikandin eg-aneng-aneng tepad te pegtoman din te ibeg te Espiritu Santo. 6 Aw meg-aneng-aneng se otaw tepad te pegtoman din te medaet ibeg te pedowan din, detengan sikandin te kemetayun wedad temanan. Meneng aw meg-aneng-aneng se otaw tepad te pegtoman din te ibeg te Espiritu Santo, yan se otaw doen kaling pedowan wedad temanan, aw melinaw se pedowan din. 7 Se otaw eg-aneng-aneng tepad te pegtoman din te medaet ibeg te pedowan din, yan se egpoon te Timanem, so kenà sikandin egtolò te impunù te Timanem. Eked sikandin peketolò te impunù te Timanem. 8 Aw egbeyà-beyaan se otaw te medaet ibeg te pedowan din, wedad palos inangen din kelubahan te Timanem.

9 Meneng kenà kaw den egbeyà-beyaan te medaet ibeg te pedowan niyo, so egbeyà-beyaan kaw den te Espiritu Santo eg-ogpà kidoen te pedowan niyo. Aw doen otaw wedad Espiritu Santo diyà kandin insogò i Cristo, yan se otaw wedà pegpesakop diyà ki Cristo. 10 Meneng aw eg-ogpà si Cristo diyà kenyo, pengkey matay se lawa niyo tandà te salà, meneng binegayan kaw te Timanem te kaling pedowan, so inaneng-aneng din den te metòlid kaw. 11 Timanem se mig-antay ki Cristo lekat te nematay. Yan aw eg-ogpaan kaw te Espiritu Santo, entayen heman te Timanem se lawa niyo lekat te nematay pineokit te Espiritu Santo eg-ogpà kidoen kenyo.

12 Na, menge kedowa ko, so eg-ogpaan kidon te Espiritu Santo, keilangan meg-inang kidon te ibeg te Timanem. Keilangan eked kidon taking te medaet ibeg te pedowan tadon, 13 so aw egbeyà-beyaan kaw te medaet ibeg te pedowan niyo, detengan kaw te kemetayun wedad temanan. Meneng aw pineokit te tabang te Espiritu Santo lomengà kaw te peg-inang niyo te salà, doen kaling pedowan niyo wedad temanan, 14 so se kedita te otaw egbeyà-beyaan te Espiritu Santo, yan se menge batà te Timanem. 15 Pegpemegay te Timanem te Espiritu Santo diyà kenyo, wedà kaw din inangi menge allang din, meneng ininang kaw din menge batà din. Yan se doun te wedad den kelemitanan niyo, so mepakay den aw Amà se itawal tadon te Timanem, so amay tadon den sikandin, 16 so Espiritu Santo se egpetaga-taga kenitadon te menge batà kidon den te Timanem. 17 So batà kidon din, doen aldaw domateng aw kominawà kidon te kedita te kèpiyaan impetagad din kenitadon. Pengkey eden se ibegay din ki Cristo, yan heman se ibegay din kenitadon. Aw pemilangen kidon tandà te pegtaking tadon ki Cristo, ipelangkaw kidon heman doton te langit doma i Cristo.

18 Pengkey egpemilangen kidon dini lanto te tanà, meneng aneng-aneng ko aw kinewaen tadon se kèpiyaan impetagad te Timanem kenitadon, kelibelan tadon se kelimahan sìyan, 19 so egpeliman se kedita te ininang te Timanem te aldaw domateng aw ipekità din se kedita te menge batà din. 20 Gebii, migkedaet se kedita ininang te Timanem dini lanto te tanà aw wedad den ontong so impelumun, kenà lekat te ibeg niyan meneng lekat te ibeg te Timanem. Meneng doen pa aldaw pelimanan tadon 21 aw inangen te Timanem kaling se kedita te ininang din amon wedad palos matay aw megkedaet. Yan meinang mèpiya se kedita, iling te kèpiyaan domateng kenitadon menge batà te Timanem. 22 Te eked pa iyan ketoman, netegahan tadon te ontò egkelimahan se kedita te ininang te Timanem dini lanto te tanà lamig seini, iling te bayi agpet tebawan. 23 Kenà olò doma ininang te Timanem se egkelimahan, meneng sikitadon heman se egkelimahan dalem te pegpeliman tadon te aldaw te ipekità te Timanem se kedita te menge batà din, aw metoman meinang kaling se lawa tadon. Imbegay den se Espiritu Santo kenitadon, aw sikandin se tagnà te kedita te ibowang te Timanem kenitadon, 24 so lekat te pegpelowà din kenitadon lekat te salà, gayed kidon egpeliman kenyan. Aw dimateng den se pinelimanan tadon, eked kidon ikagi te doen pa pelimanan tadon, so wedad otaw megpeliman te dimateng den. 25 Meneng so wedà pa dateng se egpelimanan tadon, keilangan medalem se pedowan tadon dalem te pegpeliman tadon kenyan.

26 Egtebangan kidon heman te Espiritu Santo amon eked kidon lengà se egpeliman. So aw eked kidon ketaga-taga aw eden se mèpiya pemoyoen tadon te pegtawal-tawal tadon diyà te Timanem, ikeliwat te Espiritu Santo se ontò medalem ibeg te pedowan tadon eked tadon keikagi. 27 Netaga-taga se Timanem Amay aw eden se awop te pedowan tadon, aw netegahan din heman aw eden se aneng-aneng te Espiritu Santo, so egpemoyoen te Espiritu Santo diyà te Timanem se tabang din kenitadon menge sakop din lekat te kandin ibeg.

28 Netegahan tadon den te pineokit te kedita te domateng kenitadon, doen kèpiyaan inangen te Timanem diyà te kedita tadon doen dakel pedowan kandin, so tinawal kidon din tandà te kandin ibeg. 29 Gebii lekat te keteboan te keneyonan, tapay netaga-taga se Timanem aw sinu se megpesakop diyà kandin. Miglalang sikandin meg-inang kenitadon iling te Batà din si Jesus, so ibeg din meinang se kedita tadon iling te telekedowa, aw meinang si Jesus iling te kakay tadon. 30 Se kedita tadon pinemallì te Timanem amon inangen kidon din iling te Batà din, yan heman se tinawal din. Se kedita tadon tinawal din, yan heman se inaneng-aneng din te metòlid. Se kedita tadon inaneng-aneng din te metòlid, yan se ipelowan din doma kandin.

31 Aw meg-aneng-aneng kidon tepad te kedita te kèpiyaan ininang te Timanem kenitadon, ketegahan tadon te wedad palos mekedaeg kenitadon so egdomaan kidon te Timanem. 32 Wedà din temengi se Batà din si Jesus, meneng insogò din sikandin simelilin kenitadon aw nematay amon megtabang kenitadon. Aw iling kenyan se keido din kenitadon, ibegay din heman se kedita te kelidoan tadon. 33 Wedad palos mekeikagi te doen pa salà tadon. Pinemallì kidon te Timanem aw sikandin se mig-aneng-aneng te metòlid kidon. 34 Wedad palos heman mekeikagi te keilangan ipelumun kidon. Nematay si Jesu Cristo simelilin kenitadon. Meneng neantay heman sikandin lekat te nematay, aw eglowan den sikandin doma te Timanem Amay din doton te langit, aw egpemoyò den sikandin diyà te Timanem Amay din te itabang din kenitadon. 35 Pengkey eden se domateng kenitadon, netegahan tadon te gayed dakel se pedowan i Cristo kenitadon. Pengkey kelimahan kidon, aw mesamok kidon, aw pemilangen kidon, pengkey wedad kànen tadon, aw wedad penenaktun tadon, pengkey elegen kidon aw imetayan kidon, netegahan tadon te dakel se pedowan i Cristo kenitadon. 36 Doen insolat kidoen te kagi te Timanem tepad te menge kelimahan sìyan,