1 Dutun he timpu midtiǥum ni Hadì Ben Hadad he hadì te Aram is langun he menge sundaru zin su wey zan mekepekidtebek. Miduma kandan is 32 he menge hadì he edlavan ki Ben Hadad, he zuen dan menge kudà wey menge kerwahi. Ne migenat dan su edsurung dan diyà te Samaria. 2 Mibpesuǥù si Ben Hadad te menge menunudtulà diyà te Samaria su wey zan metudtul heini he lalag diyà te ki Hadì Ahab he hadì te Israel: “Iyan heini migkaǥi ni Ben Hadad: 3 ‘Is menge pelata nu wey menge vulawan nu ne kediey, ne is menge esawa nu wey is mevurut he menge anak nu ne kediey zaan.’ ” 4 Ne is tavak he impetudtul ni Hadì Ahab edhenduen te, “Uyun a te nekaǥi nu, Mahal he Hadì, he gaked a kenikew wey is langun he kediey.”

5 Mid-uman medlikù haazà is menge menunudtulà diyà te ki Ahab he ke sikandan te, “Iyan heini menge lalag ni Ben Hadad: ‘Migkaǥi ad diyà te kenikew he iveǥey nu kedì is menge pelata nu, menge vulawan nu, menge esawa nu, wey menge anak nu. 6 Ne keeselem te iring kayi he uras, ibpehendiyan ku is menge upisyal ku su wey zan mesusi is turuǥan nu wey valey te menge upisyal nu. Egkuwaan dan is langun he ed-isipen nu he menge mahalen.’ ”

7 Impetawag te hadì te Israel is langun he ebpemendumala te Israel ne migkeǥiyan din te, “Ebpen-ahà iyan te paaǥi si Ben Hadad he mezezeeti kiw zin. Su ibeǥey ku en man is mibuyù din he iyan is: menge esawa ku, menge anak ku, menge pelata ku, wey vulawan ku.” 8 Ne midtavak is ebpemendumala wey is duma he menge etew te, “Kenè nu en iveǥey is ebuyuen din.” 9 Umbe, migkeǥiyan ni Ahab haazà is menge menunudtulà ni Ben Hadad te, “Keǥiya niw ziyà te mahal he hadì he ibeǥey ku kandin is nehuna he mibuyù din he iyan is menge pelata ku, menge vulawan ku, menge esawa ku, wey menge anak ku, piru kenè ku igkeveǥey heini is ikezuwa he mibuyù din.” Mid-ulì haazà is menge menunudtulà ne migkaǥi zan diyà te ki Ben Hadad is tavak ni Ahab.

10 Mibpeuman mebpeuwit te lalag si Ben Hadad diyà te ki Ahab he edhenduen te, “Berakat he purungi a siluti te menge ed-ezapen emun kenè ku egkepurung egkezezeeti is Samaria. Edsigureduwen ku he wazà egkesamà minsan eliyavuk he ereg he egkaakup te menge sundaru ku.” 11 Midtavak is hadì te Israel te, “Kegiyi niw sikandin he is sundaru he ebpengandam pa para te tebek kenà ereg he ebpehambug iring te sundaru he nekepasad en he ebpekidtebek.” 12 Nezawat ni Ben Hadad haazà is tavak ni Ahab dutun te ed-inum sikandin wey is duma zin he menge hadì diyà te tulda zan. Ne mibmendaran din is menge etew zin he mebpengandam su edsurung dan diyà te Samaria. Ne midtuman dan haazà.

13 Ne zuen, nekeuma he ebpeneuven te Nengazen diyà te ki Ahab he ke sikandin te, “Iyan heini lalag te Nengazen: ‘Neehè nu ve is utew mahabet he menge sundaru ni Ben Hadad? Piru ibpezaag ku sikandan kenikew ǥuntaan he andew, ne egketuenan nu he iyan a Nengazen.’ ” 14 Mid-insà si Ahab te, “Hentei is edaag kandan?” Midtavak haazà is ebpeneuven te, “Iyan heini lalag te Nengazen: ‘Is betan-en he menge sundaru, he zizalem te gehem te menge gubirnedur ziyà te menge prubinsya, iyan ebpekezaag kandan.’ ” Mid-insà si Ahab te, “Hentei is edhuna edsurung?” Midtavak haazà is ebpeneuven te, “Iyan kew.”

15 Umbe, impetawag ni Ahab sikan is betan-en he menge sundaru, he zizalem te keǥehem te menge gubirnedur ziyà te menge prubinsya–232 sikandan is langun wey elin midtiǥum din is duma pa he menge Israilihanen 7,000 sikandan is langun. 16 Meudtu is kedsurung dan, dutun te ebpemelelangut diyà te tulda zan si Ben Hadad wey sikan is 32 he menge hadì he edlavan kandin. 17 Iyan midhuna medsurung sikan is betan-en he menge sundaru.

Dutun he timpu, is menge midsuǥù ni Ben Hadad te kebpeniid diyà te Samaria migkaǥi ziyà te kandin te, “Duen menge sundaru he ebpemuun diyà te Samaria he edhengkayi.” 18 Migkaǥi si Ben Hadad te, “Emun hengkey is idhendini zan, emun kebpekidtebek etawa kebpekidhusey, dekepa niw sikandan.”

19 Iyan nengegalen te menge Israilihanen sikan is betan-en he menge peremandar ne mibpenelukun kandan is menge sundaru, 20 ne midhimetayan te kada sevaha kandan is menge kuntada zan. Umbe nemelaǥuy is duma he menge sundaru pehendiyà te Aram, ne midal-as sikandan te menge Israilihanen. Piru si Ben Hadad wey is duma he menge zuma zin nekepelaǥuy he ed-untud te kudà. 21 Iyan heeyan sikan is kedsurung eni Hadì Ahab te Israel. Mahabet he menge Aramihanen is mibpenhimetayan dan, ne mibpenguwa zan is menge kudà wey menge kerwahi te menge Aramihanen. 22 Ne kedlavey zutun, mid-uvey ziyà te hadì te Israel is ebpeneuven ne ke sikandin te, “Pengandam ka wey mebpurung mebpelanu, su ed-uman edsurung is hadì diyà te Aram dutun te sunud he tuig.”

23 Ne ziyà mulà te menge Aramihanen, sikan is hadì diyà te Aram migkeǥiyan te menge upisyal zin te, “Is megbevayà te menge Israilihanen, megbevayà diyà te menge vuvungan, umbe nekezaag dan. Piru emun diyè tew sikandan edtebeka te menge suǥud, siguradu he egkezaag tew sikandan. 24 Ne kinahanglan he ebeelan nu heini: Iawè nu sikan is 32 he menge hadì diyà te ketengdanan dan ne iyan iilis nu kandan sikan is menge peremandar. 25 Ne pekehebeta nu is menge sundaru nu, menge kudè nu, wey menge kerwahi nu he iring kahabet duen te nehuna he naawà diyà te kenikew. Ne zutun ebpekidtebek kiw te menge Israilihanen diyà te menge suǥud, ne siguradu egkezaag tew sikandan.” Mibpezumazuma zutun si Ben Hadad, ne mibeelan din heini.

26 Ne zutun te sunud he tuig, midtiǥum ni Ben Hadad is menge Aramihanen, ne midhendiyè dan te inged he Afek su ebpekidtebek dan te menge Israilihanen. 27 Midtiǥum daan is menge Israilihanen wey in-andam dan is menge kinahanglan dan ne migenat dan is ebpekidtebek te menge Aramihanen. Ne atbang is kampu zan te kampu te menge Aramihanen. Piru henduen dà sikandan te dezuwa he dezeisey he layud te menge kambing emun idhindeg te menge Aramihanen he nekeeneb diyà te menge suǥud. 28 Midhendiyà is suluǥuen te Megbevayà te hadì diyà te Israel ne migkaǥi te, “Iyan heini lalag te Nengazen: Egkeisip te menge Aramihanen he megbevayà a ziyà te menge vuvungan ne kenà diyà te menge suǥud. Umbe ebpengelinteuwan ku he mezaag nu is utew mahabet he menge sundaru zan su para metueni niw he iyan a Nengazen.”

29 Migkampu is menge Israilihanen wey is menge Aramihanen he neked-atbang seled te pitu he andew. Ne hein ikepitu en he andew midtebek en sikandan. Ne senga andew zà ne nekepatey en is menge Israilihanen te 100,000 he menge sundaru he menge Aramihanen. 30 Ne is nesamà he menge Aramihanen nemelaǥuy ziyà te inged he Afek, ne zutun netempaǥan te verengbeng dutun te inged is 27,000 kandan. Mibpelaǥuy zaan dutun si Ben Hadad, ne mid-eles diyà te kineselezan he ruǥu te valey. 31 Migkeǥiyan sikandin te menge upisyal zin te, “Nezineg dey he hihizuwen kun is menge hadì te Israel. Umbe edhendiyè key te hadì te Israel ne ebpekevavè key pinaaǥi te kebivisti te saku wey kebagkes te pisì diyà te menge ulu zey. Ne kela ke kenè ke zin ded himetayi.”

32 Umbe, mibivisti sikandan te saku wey mibagkes dan te pisì is ulu zan. Ne midhendiyè dan te hadì te Israel ne ke sikandan te, “Si Ben Hadad he edtahud kenikew ebpehizuhizu he ke egkehimu kenè nu sikandin himetayi.” Midtavak haazà is hadì te, “Uuyag pe bes sikandin? In-iring ku sikandin te suled ku.” 33 Mid-isip dutun te menge upisyal he tuus haazà is tavak te hadì he ibeǥey zin is hangyù dan, umbe segugunà sikandan migkaǥi te, “Uya, si Ben Hadad ne henduen be te suled nu en.” Migkaǥi haazà is hadì te, “Dumaha niw sikandin dini te kedì.”

Ne hein nekeuma si Ben Hadad, ne impeuntud sikandin ni Ahab te kerwahi zin. 34 Migkaǥi si Ben Hadad diyà te ki Ahab te, “Id-ulì ku ziyà te kenikew is menge inged he mid-aǥew te amey ku ziyà te amey nu. Ne egkehimu ke edtukud ka te menge tindahan diyà te Damascus, iring te mibeelan te amey ku ziyà te Samaria.” Migkaǥi si Ahab te, “Edhimuwen ta heini he sevaha he kesebutan, ne ibpaawè ku sikew.” Umbe mid-uyun sikandan, ne hein nepasad impeǥenat sikandin ni Ahab.

35 Dutun he timpu, midsuǥù te Nengazen is sevaha he etew he sevaha te menge ebpeneuven, te kegkaǥi ziyà te zuma zin te, “Pesekiti a kenikew.” Piru wazà mebpezumazuma haazà is etew. 36 Umbe, migkeǥiyan din haazà is etew te, “Geina te wazè nu tumana is suǥù te Nengazen, edhimetayan ka te erimaung dutun te ked-ulì nu puun dini.” Ne hein ked-ulì dutun te etew, naahà sikandin te erimaung ne midhimetayan sikandin duen te erimaung.

37 Duen en maan naahà dutun te ebpeneuven he sevaha he etew ne ke sikandin en maan te, “Pesekiti a kenikew.” Ne mibpesekitan dutun te etew ne nepelian sikandin. 38 Ne migenat haazà is ebpeneuven, ne midhitindeg diyà te zalan, su edteǥazan din is hadì te Israel he ebayà dutun. Mibpeuvag-uvag sikandin pinaaǥi te kebpezeket te bindahi ziyà te menge mata zin su para kenà sikandin mekilala. 39 Ne kebayà duen te hadì mibensaǥan sikandin dutun te ebpeneuven te, “Datù, nekezuma a te tebek, ne zuen etew he mid-uwit din kayi te kediey is bihag ne ke sikandin te, ‘Bentayi nu heini he etew. Emun ebpekepelaǥuy sikandin, edhimetayan ka etawa ibpevayad ka te 35 he kilu he pelata.’ 40 Ne hein nepulikì a te zuma he vuluhaten ne nekepelaǥuy haazà is bihag.”

Migkaǥi haazà is hadì te, “Ereg ka he edsilutan te sungkad te migkaǥi nu.” 41 Ne midlekat duen te ebpeneuven sikan is bindahi ziyà te menge mata zin, ne nekilala sikandin dutun te hadì te Israel he sevaha zuen te menge ebpeneuven. 42 Migkeǥiyan din haazà is hadì te, “Iyan heini lalag te Nengazen: Tenged te impaawè nu sikan is etew he migkaǥi ku he ereg he edhimetayan, ne iyan ka edhimetayan he ilis din, ebpenhimetayan daan is menge etew nu he ilis te menge etew zin.” 43 Mid-ulì haazà is hadì te Israel ziyà te turuǥan din diyà te Samaria he mibmezaat is gehinawa zin wey nepauk.