1 Hein iketelu en he andew, nekeuma si David wey is menge sakup din diyà te Ziklag. Netuenan dan he midsurung te menge Amalikanhen is Negev, apil en is Ziklag. Mibinsulan dan is Ziklag 2 ne mibpemihag dan is menge vahi wey menge vatà te haazà he inged. Wazè dan penhimetayi su mibihag dan dà sikandan. 3 Hein nekeuma zutun ensi David, neehè dan te menge sakup din he mibinsulan en is inged dan, ne wazè en is menge esawa zan wey menge anak dan. 4 Umbe, is menge etew zutun ne edluyahan dan en te kedsineǥew zan dà. 5 Naapil mevihag is dezuwa he esawa ni David he si Ahinoam wey si Abigail he esawa ni Nabal he tig-Carmel. 6 Midekelè en is prublima ni David su mezaat en is egkeisip te menge sakup din tenged te kegkevihaǥa te menge anak dan ne ebpelenuwan dan en te ebatu si David. Piru zutun midlig-enan si David te Nengazen he Megbevayè din.

7 Ne zutun migkeǥiyan ni David si Abiatar he memumuhat he anak ni Ahimelec te, “Uwita nu kayi kes ipud.” Ne zutun mid-uwit ni Abiatar ziyà te ki David. 8 Ne mibpenginginsà si David te Nengazen te, “Egkehimu ve he edtelukunan dey is midsurung kenami? Egkezaag dey vuwa sikandan?” Midtavak is Nengazen te, “Uya, telukuni niw sikandan su egkezaag niw, ne egkelibri niw is menge vinihag.” 9 Ne zutun migenat si David wey is 600 he sakup din taman te nekeuma zan diyà te zal-ug he Besor. Ne zutun dà mebpelintetaǥak is 10 200 he menge sakup din su utew zan en nengeveley ne kenè dan en ebpekelayun dutun te zal-ug. Piru si David ne midlaus mulà medal-as duma zin is 400 he sakup din.

11 Ne zutun duen naahà te menge sakup ni David he sevaha he Ehiptohanen diyà te pemuleey, ne mid-uwit dan haazà diyà te ki David. Ne mibeǥayan dan te supas wey wahig, 12 wey sengekemkem he ingkagkag he higus wey dezuwa he akup he pasas, su tetelu he andew he wazà mekekaan wey wazà mekeinum, ne hein nekekaan wey nekeinum sikandin ne human pa mebmezesen sikandin. 13 Ne human insai ni David te, “Hentei ves is egalen nu? Tege hendei ke ves?” Midtavak sikandin te, “Sevaha a he Ehiptohanen ne uripen a te sevaha he Amalikanhen. Mid-ewaan a te egalen ku, tetelu en he andew su midezaru a. 14 Midsurung dey is sakup te Negev he mid-ubpaan te menge Kiritnen, he sakup te Juda, wey apil pa is sakup te Negev he ed-ubpaan te menge kevuwazan ni Caleb. Ne mibinsulan dey zaan is Ziklag.” 15 Ne migkeǥiyan sikandin ni David te, “Igkepenurù nu ve kenami ke hendei megkampu heini is menge mengayew?” Midtavak sikandin te, “Penengdui a kenikew ziyà te etuvangan te Megbevayà he kenà a kenikew himetayi wey kenà a kenikew iveǥey te egalen ku, ne ibpeturedu ku human keniyu is kampu zan.”

16 Umbe, nenangdù si David, ne midumahan sikandan duen te Ehiptohanen diyà te migkempuwan duen te menge mengayew. Ne zutun neehè dan is menge Amalikanhen he nekepeyapat he ebpemengaan, ebpen-inum wey utew menge melipayen, tenged te utew mezakel is naaǥew zan diyà te menge Filistihanen wey ziyà te Juda. 17 Midsurung sikandan ni David duma is menge sakup din, ne dezuwa he kezukileman is kedtebek dan taman te mid-uman en maan mebmezukilem. Ne wazà minsan sevaha he nekepelaǥuy gawas te 400 he menge betan-en he nemen-untud te kemilyu he nemelaǥuy. 18 Ne zutun nahawì ni David is langun he menge gamit dan he mibpenguwa te menge Amalikanhen apil is dezuwa he esawa zin. 19 Wazà minsan sevaha he netarin dutun te nengaaǥew kandan te menge Amalikanhen, batà wey meǥurang, maama wey vahi, wey minsan hengkey he mibpenguwa te menge Amalikanhen. Pudu heini nahawì ni David. 20 Apil en dutun is menge kerehidu wey menge vaka. Te kemulu pa ed-evuǥa te menge sakup ni David haazà is langun he menge layud he edhuna kandan, ke sikandan te, “Ki David heini he naaǥew.”

21 Hein nekelikù en ensi David diyà te zal-ug he Besor, midsinuǥung sikandan dutun te 200 he menge sakup din he mibpelintetaǥak tenged te utew zan kegkeveley. Migkemusta sikandan ni David. 22 Ne zuen dutun menge sakup ni David he egkengelalunglalung, ke sikandan te, “Kenè tew ebehinan sikandan te nengaaǥew tew ziyà te menge Amalikanhen su wazè dan meduma kenitew. Ilikù niw zà kandan is menge esawa zan wey menge anak dan, ne ibpeǥenat en sikandan.” 23 Midtavak si David te, “Menge suled, kenè kew peleleǥed te imbeǥey te Nengazen kenitew. Midtevangan kiw zin ne nezaag tew is midlusud kenitew. 24 Wazà iyan ebpemineg keniyan te egkeǥiyen niw. Kinahanglan he ebehinan is langun! Is bahin te mibpelintetaǥak he ebantey te menge gamit tew, kinahanglan he id-repeng daan duen te midhendiyà te tebek.” 25 Mibeelan haazà ni David he meupiya he edsunuzen te menge Israilihanen puun dutun taman guntaan. 26 Hein nekeuma ensi David diyà te Ziklag, impeuwit din diyà te menge pengulu te Juda he menge emiǥu zin is duma he menge naaǥew zan, duma zutun is lalag he: “Heini zed is ibeǥey ku keniyu he naaǥew zey ziyà te menge kuntada te Nengazen.” 27 Iyan mibpeuwitan din is ebpemendumala te inged he: Betel, Ramot Negev, Jatir, 28 Aroer, Sifmot, Eshtemoa, 29 Racal, wey is diyà te menge inged te menge Jerameelinhen wey menge Kinhanen, 30 diyà te Horma, Borashan, Atac, 31 Hebron wey zuma pa he menge inged he nengeveyaan ni David wey menge sakup din.