1 Kedlavey te 20 he tuig te kedtukuza ni Solomon te valey te Nengazen wey te turuǥan din, 2 mid-uman din tukuza is menge inged he imbeǥey kandin ni Hiram ne mibpeubpaan din te menge Israilihanen. 3 Iyan heini timpu he midsurung ni Solomon is Hamat Zoba ne naaǥew zin heini. 4 Mid-umanan din tukuza is Tadmor he ziyà te sibsivayan wey menge inged diyà te Hamat he zutun is menge budiga. 5 Midlig-enan din is divavew wey zizalem he vahin te Bet Horon. Mibpelingutan din heini te menge verengbeng ne mibpemeelan dutun is menge pultahan he zuen dan menge terangka. 6 Iyan daan heini mibeelan din diyà te Baalat wey te zuma pa he menge inged he zutun is menge budiga zin, menge kerwahi wey menge kudè din. Midtukud din is langun he egkesuatan din te edtukud diyà te Jerusalem, Lebanon wey te langun he tanà he sakup din.

7-8 Duen pa menge etew he nengetaǥak diyà te Israel he kenà menge Israilihanen. Menge kevuwazan sikandan te menge Hitihanen, Amunihanen, Perisihanen, Hivihanen wey menge Jebusihanen he nengesamà he wazà mepatey te menge Israilihanen te ked-eǥawa zan te tanà te Canaan. Midhimu sikandan ni Solomon he menge uripen he ebpeǥesen he ibpeterebahu, ne taman guntaan kemulu he menge uripen sikandan. 9 Piru wazà minsan hentei he Israilihanen he mid-uripen ni Solomon, kekenà, midhimu zin sikandan he menge sundaru zin, menge upisyal, menge pengulu te menge sundaru, menge peremandar te menge kerwahi zin, wey menge pereuntud te kudà. 10 Is 250 kandan midhimu zin he menge upisyal he edumala te menge edterebahu te menge pruyiktu zin.

11 Hein nepasad en haazà is turuǥan he mibpeveelan ni Solomon he para te esawa zin he anak te hadì te Ehipto, in-awè din is esawa zin diyà te Inged ni David. Su migkaǥi sikandin te, “Kenà egkehimu he kayi ed-ubpà is esawa ku te turuǥan ni Hadì David he hadì te Israel, su segradu is minsan hendei he lugar he zutun dengan isavuk kes Kavan te Nengazen.”

12 Ne mibpemuhat si Solomon te pemuhat he edtutungen para te Nengazen dutun te pemuhatà he mibeelan din diyà te etuvangan te varkun te valey te Nengazen. 13 Midtuman din is suǥù ni Moises he ebpemuhat sumalà is kinahanglan he ibpemuhat kada andew wey te Andew te Kedhimeley, te Pista te Kebpuun te Hayag, wey te tetelu he pista he edsilibrahan kada tuig: is Pista te Supas he Wazè din Tapey, is Pista te Kedraǥun, wey is Pista te Kebaal te menge Lawig. 14 Ne sumalà te sulunuzen te amey zin he si David, migrupu zin is menge memumuhat wey menge Levihanen para te menge vuluhaten dan. Is menge Levihanen, ne iyan ebpengegalen te menge etew he edalig te Megbevayà, wey ed-uǥup dan te menge vuluhaten te menge memumuhat dutun te valey te Nengazen kada andew. Migrupu zin daan is menge ebantey te kada gemawan te valey te Nengazen su iyan heini insuǥù ni David he suluǥuen te Megbevayà. 15 Midtuman eni Solomon is langun he insuǥù ni Hadì David mehitenged te menge memumuhat wey menge Levihanen wey te menge budiga.

16 Nepasad is langun he mibpeveelan ni Solomon dutun te valey te Nengazen puun te kebpundara kayi taman te kegkepasad kayi.

17 Ne midhendiyà si Solomon te Ezion Geber wey ziyà te Elot, diyà te beyvey te Zaǥat he Meriǥà, diyà te tanà te Edom. 18 Mibpeuwitan sikandin ni Hiram te menge varku he iyan edumala zuen is menge upisyal zin he memetau ziyà te zaǥat. Heini sikandan mid-untud te varku zuma te menge sakup ni Solomon pehendiyà te Ofir. Ne hein midlikù sikandan ne nekeuwit dan te menge 16 he tunilada he vulawan, ne mid-uwit dan haazà diyà te ki Hadì Solomon.