1 Ne hein nekeuma si Rehoboam diyà te Jerusalem, midtiǥum din is memetau he menge sundaru ziyà te tribu ni Juda wey ni Benjamin. Neketiǥum sikandin te 180,000 he menge sundaru he id-asdang din te menge Israilihanen su edhewien din is ginhedian din. 2 Piru migkeǥiyan te Nengazen si Shemaya he suluǥuen din, 3 “Keǥiyi nu si Hadì Rehoboam he hadì te Juda, he anak ni Solomon, wey langun he Israilihanen diyà te Juda wey Benjamin 4 te siak, is Nengazen, migkaǥi a te: ‘Kenè kew mebpekidtebek te menge kezuzumahi niw. Ulì kew, su kedì heini he kebayà is langun.’ ” Mibpezuma zan te Nengazen ne wazè dan surunga si Jeroboam.

5 Wazà med-awà si Rehoboam diyà te Jerusalem ne midlig-enan din heini is menge inged para kenà meselezi is Juda: 6 Betlehem, Etam, Tekoa, 7 Bet Zur, Soco, Adulam, 8 Gat, Maresha, Zip, 9 Adoraim, Lakish, Azeka, 10 Zora, Ayalon, wey Hebron. Iyan heini vinerengbeng he menge inged diyà te Juda wey Benjamin. 11 Midlig-enan din is menge verengbeng kayi ne midsevukan din heini te menge peremandar kayi he menge inged. Heini sikandan mibeǥayan din te egkeenen, lana te ulibu, wey vinu. 12 Mibpesevukan din heini he menge inged te menge kelasag wey menge vangkew he ebpekeuman te kelig-en kayi. Umbe mibpedayun is kegkesekupa zin te Juda wey Benjamin.

13 Is menge memumuhat wey menge Levihanen he ziyà med-ubpà te zuma he tribu te Israel, ne ziyè dan edapig te ki Rehoboam. 14 Heini he menge kevuwazan ni Levi ne mid-ewaan dan is menge valey wey menge tanè dan ne midhalin dan diyà te Juda wey Jerusalem su wazè dan isipa ni Jeroboam wey te menge anak din he menge memumuhat te Nengazen. 15 Midtezù si Jeroboam te keugelingen din he menge memumuhat diyà te menge simbahan diyà te metikang he menge lugar, he zutun dan ed-ezapa is menge ed-ezapen dan he mibpeveelan ni Jeroboam he kambing wey vaka. 16 Is menge Israilihanen diyà te zuma he tribu te Israel he egkesuat he edangep diyà te Nengazen he Megbevayà te Israel, ne nenelukun te menge kevuwazan ni Levi ziyà te Jerusalem, su para mekepemuhat dan te menge pemuhat diyà te Nengazen, he Megbevayà te menge kepuun dan. 17 Midlig-enan dan is ginhedian te Juda, ne seled te tetelu he tuig is ked-uǥupi zan ki Rehoboam he anak ni Solomon. Midsunud sikandan te Nengazen iring te mibeelan dan te iyan pa hadì si David wey si Solomon.

18 Mid-esawa ni Rehoboam si Mahalat, he iyan amey zin si Jerimot he anak ni David ne iyan iney zin si Abihail he anak ni Eliab wey apù ni Jesse. 19 Ne mid-anak si Rehoboam wey si Mahalat te tetelu he pudu maama he iyan si Jeush, si Shemaria, wey si Zaham. 20 Mid-esawa zaan ni Rehoboam si Maaca he anak ni Absalom. Ne iyan menge anak dan he menge maama si Abia, Atai, Ziza, wey si Shelomit. 21 Iyan utew pelanggà ni Rehoboam he esawa zin si Maaca. 18 is menge esawa ni Rehoboam he dungganen ne zuen pa 60 he esawa zin he kenà dungganen. Ne 28 is anak din he menge maama ne 60 is menge vahi. 22 Is anak din diyà te ki Maaca he si Abia iyan mibpilì din he pengulu te menge anak din he lavew, su egkesuatan din he iyan ebpekeilis kandin te kedhadì. 23 Nezumahan te ketau is kebeǥayi ni Rehoboam te zuma he menge anak din te menge ketengdanan. Is duma pa he menge anak din, impezumala zin te vinerengbeng he menge inged te Juda wey Benjamin. Ne mibeǥayan din sikandan te menge kinehenglanen dan wey mezakel he menge esawa.