1 Hein ikepitu en he tuig, ne midwaleng en si Jehoyada. Mibpekid-upakat sikandin te lelima he peremandar te menge ginatus he sundaru he iyan si Azaria he anak ni Jehoram, si Ishmael he anak ni Jehohanan, si Azaria he anak ni Obed, si Maasea he anak ni Adaya, wey si Elisafat he anak ni Zicri. 2 Heini sikandan mid-eneb te inged te Juda te kedtiǥum te menge Levihanen wey te menge pengulu te menge pemilya.

Hein nemekeuma is langun diyà te Jerusalem, 3 midhendiyè dan te valey te Megbevayà, ne nekid-uyun sikandan ki Joash he anak te hadì. Migkeǥiyan ni Jehoyada is menge etew te, “Iyan en heini timpu he edhadì is anak te hadì, sumalà te insaad te Nengazen he layun duen kevuwazan ni David he edhadì. 4 Ne ǥuntaan iyan heini veeli niw: is sevaha zutun te tetelu he vahin te menge memumuhat wey menge Levihanen, he ebantey emun Andew te Kedhimeley, ne mebantey ziyà te menge ǥemawan te valey te Nengazen. 5 Ne is sevaha pa zutun te tetelu he vahin ne mebantey ziyà te turuǥan te hadì. Ne is sevaha pa zutun te tetelu he vahin ne mebantey ziyà te ǥemawan te pundasyun. Is duma he menge etew ne ziyà te menge lama te valey te Nengazen. 6 Wazà ibpeseled dutun te valey te Nengazen gawas te menge memumuhat wey menge Levihanen he ebpenilbi te haazà he timpu. Egkehimu he ebpekeseled dan su ǥeina te impehinungud sikandan para te buluhaten kayi. Piru is duma ne kinahanglan he ziyè dà ebantey te gawas sumalà is insuǥù te Nengazen. 7 Kinahanglan he ebpurungan te ebantey te menge Levihanen is hadì, he andam is menge ǥumaan dan, ne layun dan dumahi minsan hendei ebpevayà. Is minsan hentei he edseled dutun te valey te Nengazen he kenà memumuhat etawa Levihanen ereg he edhimetayan.”

8 Mibeelan te menge Levihanen wey te langun he menge tig-Juda is insuǥù ni Jehoyada he memumuhat. Midtiǥum te menge peremandar is langun he menge sakup dan, is menge ebantey te Andew te Kedhimeley, apil en is kenà ebantey zutun he andew. Wazè pa ipeulì ni Jehoyada is menge Levihanen minsan te nepasad dan en is kandan he vaal. 9 Ne mibeǥayan ni Jehoyada is menge peremandar te menge vangkew wey zezekelà wey zezeisek he menge kelasag he ǥaked dengan ni Hadì David, he ziyà itaǥù te valey te Megbevayà. 10 Impepelastar zin is neǥumeenan he menge maama ziyà te peliǥuy te valey te Nengazen wey te pemuhatà te kedipinsa zuen te hadì.

11 Ne zutun impeǥawas ni Jehoyada wey te menge anak din si Joash he anak te hadì ne migkurunahan. Ne mibeǥayan din sikandin te kupya te menge sulunuzen mehitenged te kedumalà te hadì, ne impezayag din is kegkehimuwa ki Joash he hadì. Midlenahan din sikandin he ebpekilala he hadì en sikandin ne nemengulahì is menge etew te, “Mebmeluǥayad is untung te hadì!”

12 Ne hein nezineg ni Atalia is keǥurub te menge etew he ebpemelelaǥuy wey ebpemengulahì te kedalig te hadì, ne midhendiyà sikandin te kandan dutun te valey te Nengazen. 13 Ne neehè din dutun is beǥu he hadì he midhitindeg uvey zuen te tukud he edhithitindeǥan te menge hadì duen te ǥemawan te valey te Nengazen. Dutun te avey te Hadì is menge peremandar wey is menge perehiyup te trumpita, ne langun he menge etew nemen-uruhuy wey mibpezaǥing te trumpita. Is menge perekanta he zuen dan menge instrumintu ne edhuna sikandan is edalig te Megbevayà. Ne hein naahà ni Atalia haazà is langun, mibindas din is bisti zin su mibmezaat is gehinawa zin, ne nemensag sikandin te, “Menge meluiven! Menge meluiven!”

14 Mibmendaran ni Jehoyada is menge peremandar te menge sundaru te, “Uwita niw ziyà te gawas si Atalia. Kenè niw sikandin kayi himetayi te valey te Nengazen. Ne himetayi niw is minsan hentei he egkesuat he edlibri kandin.” 15 Umbe, midakep dan sikandin ne mid-uwit dan diyà te idselang duen te Pultahan te menge Kudà he ebpehendiyà te turuǥan, ne zutun dan sikandin himetayi.

16 Ne zutun si Jehoyada, is menge etew, wey is hadì, utew meheǥet is kebpekid-uyun dan he ebpesakup dan te Nengazen. 17 Ne midhendiyà is langun he menge etew te simbahan he para ki Baal ne midrundus dan heini. Midrupet dan is menge pemuhatà wey is menge ed-ezapen dutun, ne midhimetayan dan si Matan he memumuhat para ki Baal ziyà te egkesineruwan duen te menge pemuhatà.

18 Ne insarig ni Jehoyada te menge memumuhat he menge kevuwazan ni Levi is kedumala zutun te valey te Nengazen iring te mibeelan dengan ni David. Ebpemuhat dan te menge pemuhat he edtutungen sumalà te ingkesurat diyà te Kesuǥuan ni Moises, wey ed-ugyab dan wey egkanta sumalà te insuǥù ni David. 19 Mibpeventayan daan ni Jehoyada is menge ǥemawan te valey te Nengazen para wazà ebpekeseled dutun he etew he ed-isipen he meremerik.

20 Ne miduma zin is menge peremandar, is menge telehuzen he menge etew, is menge upisyal wey is langun he menge etew, ne inhated dan is hadì diyà te turuǥan he ziyà ebpuun te valey te Nengazen. Ne ziyè dan mebayà te ǥemawan he zapit te zizaya. Ne impepinuu zan is hadì diyà te pinuuwè din te kedhadì. 21 Nengelipey is menge etew, ne mibmelinew is inged hein minatey en si Atalia.