1 Is anak ni Josia he si Jehoahaz iyan in-ilis te menge etew te kedhadì diyà te Jerusalem. 2 Mibpenuiǥen si Jehoahaz te 23 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan. 3 Diyà te huziyan he timpu impeengked sikandin te kedhadì te hadì diyà te Ehipto he si Neco, ne impevayad ni Neco te vuhis is menge tig-Juda te menge 3,000 he kilu he pelata wey 35 he kilu he vulawan. 4 Mibihag ni Neco si Jehoahaz pehendiyà te Ehipto, ne midhimu zin si Eliakim he suled ni Jehoahaz he hadì diyà te Juda wey Jerusalem. Mid-ilisan ni Neco is ngazan ni Eliakim te Jehoyakim.

5 Mibpenuiǥen si Jehoyakim te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Mezaat is ulaula zin diyà te etuvangan te Nengazen. 6 Midsurung sikandin ni Hadì Nebucadnezar he hadì te Babilonia, ne migkedinahan sikandin ne mid-uwit diyà te Babilonia. 7 Mid-uwit daan ni Nebucadnezar is duma he menge gelemiten diyà te valey te Nengazen ne intaǥù din diyà te turuǥan din.

8 Is duma pa he ǥuǥud mehitenged te kedhadì ni Jehoyakim wey is utew mezaat he menge vaal he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel wey Juda. Iyan nekeilis kandin te kedhadì is anak din he si Jehoyakin.

9 Mibpenuiǥen si Jehoyakin te 18 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan wey sepulù he andew. Mezaat is ulaula zin diyà te etuvangan te Nengazen. 10 Kebpuun te veǥu he tuig mibihag ni Hadì Nebucadnezar si Jehoyakin pehendiyà te Babilonia. Mibpenguwa zin is mahalen he menge azen diyà te valey te Nengazen. Ne is anggam ni Jehoyakin he si Zedekia, midhimu zin he hadì te Juda wey Jerusalem.

11 Mibpenuiǥen si Zedekia te 21 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. 12 Mezaat is ulaula zin diyà te etuvangan te Nengazen he Megbevayè din, ne wazè din ipekevavà is keugelingen din te ebpeneuven he si Jeremias he perekaǥi te Nengazen. 13 Nekidsukulà daan sikandin ki Hadì Nebucadnezar, minsan pa te impepenangdù din sikandin pinaaǥi te ngazan te Megbevayà he kenà sikandin medluib kandin. Utew mesinupaken si Zedekia. Kenà sikandin edlikù diyà te Nengazen he Megbevayà te Israel. 14 Ne gawas kandin, minsan is lavew he menge memumuhat wey is menge pengulu te menge etew midluib en te Megbevayà. Mid-iringan dan is utew mezaat he vaal te menge etew ziyà te zuma he menge nasyun ne midremerikan dan is baley te Nengazen, he mid-isip din he segradu he lugar ziyà te Jerusalem.

15 Layun ebpekidlalag kandan is Nengazen, he Megbevayà te menge kepuun dan, pinaaǥi te menge ebpeneuven din, su egkehizuwan din sikandan wey egkenuǥunan din sikan is baley zin. 16 Piru mid-undaunda zan dà is menge ebpeneuven te Megbevayà, mid-engitan dan, wey wazè dan beliya is menge lalag kayi te menge ebpeneuven. Umbe nepeukan sikandan te Nengazen, ne wazà ebpekeeǥen kandin. 17 Impesurung din sikandan te menge tig-Babilonia. Mibpenhimetayan te menge tig-Babilonia is betan-en he menge maama kandan minsan ed-aput pa ziyà te valey te Nengazen. Wazè dan kegkehizu te minsan hentei maama etawa bahi, batà etawa meǥurang, deruwanen etawa kenà. Imbeǥey te Megbevayà is langun he menge etew zin diyà te ki Nebucadnezar. 18 Mid-uwit ni Nebucadnezar ziyà te Babilonia is langun he menge gelemiten diyà te valey te Megbevayà, deisey etawa zekelà, wey is langun he ketiǥeyunan dutun te valey te Nengazen, wey is menge ketiǥeyunan te hadì wey te menge upisyal zin. 19 Mibinsulan dan is baley te Megbevayà wey mibengkag dan is berengbeng te Jerusalem. Mibinsulan dan daan is langun he melig-en he vahin dutun te inged, ne migevè dan is langun he mahalen he menge azen. 20 Mibihag ni Nebucadnezar pehendiyà te Babilonia is menge Israilihanen he wazè mepatey, ne nehimu sikandan he menge uripen din wey te menge anak din, ne wazà meengked is kegkeuripena kandan taman te iyan en nehimu he gemhanan is ginhedian te Persia. 21 Umbe, netuman is migkaǥi te Nengazen pinaaǥi te ebpeneuven he si Jeremias he egkehimu he mekevulungbulung haazà is tanà ne ebpekehimeley heini seled te 70 he tuig.

22 Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias. 23 Iyan heini pehibelu ni Hadì Cyrus he hadì te Persia:

“Imbeǥey kedì te Nengazen he Megbevayà diyà te langit, is langun he ginhedian kayi te kelibutan, ne insarig din kedì is kebpehitindeg te valey zin diyà te Jerusalem he sakup te Juda. Sikiyu is langun he menge etew te Megbevayà, ne ulì kew ziyà te tanè niw. Ne verakat he zumahi kew zin.”