1 Duen balu he vahi he is esawa zin he minatey sevaha he sakup te grupu te menge ebpeneuven. Ne sevaha he andew, mibuyù sikandin te tavang diyà te ki Elisha. Ke sikandin te, “Minatey en is esawa ku he suluǥuen nu ne netuenan nu he edtahud sikandin te Nengazen. Ne ǥuntaan nekeuma is etew he neutangan din ne egkuwaan din is tanè dey wey is dezuwa he anak dey he menge maama ne ed-uripenen din su iyan kun sikandan bayad te utang te esawa ku.” 2 Migkaǥi si Elisha ziyà te kandin te, “Hengkey is igketavang ku kenikew? Keǥiya nu kediey ke hengkey is diyà te valey nu?” Midtavak haazà is bahi te, “Wazà datù, gawas te zeisey he lana ziyà te tivud.” 3 Migkaǥi si Elisha te, “Hendiyè ka te langun he zuma nu he menge meǥinged, ne penambey ka te mahabet he menge teleǥuey. 4 Ne seled kew te menge anak nu ziyà te valey niw ne lekevi niw is gemawan. Ne itisi niw te lana is langun he menge teleǥuey. Ne kada egkepenù he teleǥuey ne itapid niw te edsavuk.”

5 Umbe, mibeelan dutun te vahi haazà is nekaǥi ni Elisha ziyà te kandin, ne midlelekeb sikandan te menge anak din diyà te valey zan. Ne mid-uwit te menge anak din diyà te kandin is menge teleǥuey, ne midteǥuan din haazà te lana. 6 Ne hein nepenù en is langun he menge teleǥuey, migkeǥiyan din is anak din te, “Duwali e pa keniyu te teleǥuey.” Midtavak is anak din te, “Wazè en teleǥuey.” Ne zutun dutun mid-engked is kedtudà te lana.

7 Ne midhendiyà haazà is bahi te ki Elisha he suluǥuen te Megbevayà ne midtudtul zin is nehitavù. Ne migkeǥiyan sikandin ni Elisha te, “Hipanew ka ne ivelegyè nu is lana ne veyazi nu is utang nu. Ne zuen pa subra he selapì he egkesamà he ereg he igkeuyag nu wey te menge anak nu.”

8 Ne sevaha he andew, midhendiyà si Elisha te Shunem. Ne zuen dutun sepian he vahi he midhinggat kandin te kegkaan. Ne puun dutun emun edsaǥad si Elisha ziyà te Shunem, ne edtuluy sikandin diyà te valey zuen te vahi su egkaan.

9 Ne migkaǥi haazà is bahi ziyà te esawa zin te, “Netuenan ku he heini is etew he layun edtuluy kayi te kenita, ne suluǥuen te Megbevayà. 10 Ebeelan ta sikandin te zeisey he ruǥu ziyà te atep, ne edsevukan ta te katri, lemisahan, bangkù, wey sulù, su para egkehimu he ed-ubpàubpà sikandin kayi emun edhengkayi.”

11 Ne sevaha he andew, midhendiyà si Elisha te Shunem, nemenahik sikandin duen te ruǥu ne midhimeley. 12 Midsuǥù din is suluǥuen din he si Gehazi he umawa zin sikan is bahi. Umbe mid-umew ni Gehazi haazà is bahi, ne hein nekeume en sikandin, 13 migkeǥiyan ni Elisha sikan is suluǥuen din te, “Insai nu ke hengkey is meupiya he igkevales ta kayi te ked-elimahi zin kenita. Kela ke zuen ibpahangyù din kenita ziyà te hadì etawa ziyà te peremandar te menge sundaru.” Midtavak haazà is bahi te, “Kenè en kinahanglan su meupiyè en is kebpekesavuk ku duma te menge zuma ku he meǥinged.” 14 Mid-insà si Elisha ziyà te ki Gehazi te, “Hengkey is ereg he ebeelan ta ziyà te kandin?” Midtavak si Gehazi te, “Wazè din anak he maama ne meǥurang en is esawa zin.” 15 Migkaǥi si Elisha te, “Umani nu umawa.” Umbe mid-umew sikandin ni Gehazi, ne midhitindeg sikandin diyà te ǥemawan. 16 Migkeǥiyan ni Elisha te, “Te iring kayi he timpu zutun te sunud he tuig ne zuen nu en edsepipiyen he vatà he maama.” Midtavak haazà is bahi te, “Datù, kenà a kenikew terterui, su suluǥuen ka te Megbevayà.”

17 Piru mibmeǥingey iyan haazà is bahi, ne mid-anak sikandin te maama hein sunud he tuig, sumalà is nekaǥi ni Elisha.

18 Ne sevaha he andew, hein dekelè en haazà is batà, nenelukun sikandin te amey zin he edterebahu ziyà te vevesukà duma te menge ebpemenraǥun. 19 Netekewtekew is amey zin te midhabet sikandin megkaǥi te, “Amà, mesakit is ulu ku! Mesakit is ulu ku!” Ne migkeǥiyan te amey zin is suluǥuen din te, “Uwita nu ziyà te iney zin.” 20 Umbe, mid-uwit duen te suluǥuen haazà is batà diyà te iney zin, ne midsekepu zin haazà. Iyan, hein neudtu minatey en haazà is batà. 21 Ne mid-uwit dutun te iney haazà is anak din he minatey ziyà te ruǥu ni Elisha ziyà te zivavew, ne insavuk din duen te katri. Ne migawas sikandin dutun te ruǥu ne midlekevan din is gemawan.

22 Ne mid-umew zutun te vahi is esawa zin ne migkeǥiyan din te, “Ipehengkayi nu is sevaha he suluǥuen he ibpetundan te sevaha he asnu su para mekaagpas a he edhendiyà te suluǥuen te Megbevayà, ne petuluy e zà ebpekelikù.” 23 Mid-insà is esawa zin te, “Maan is edhendiyè ka ǥuntaan he andew te kenè man heini Pista te Kebpuun te Hayag etawa Andew te Kedhimeley?” Midtavak haazà is bahi te, “Maambe en.” 24 Ne midsiyahan din sikan is asnu ne migkeǥiyan din is suluǥuen din te, “Gaanggaan ke en! Ne kenè nu ipenaneynaney heini is asnu emun kenè ku sikew egkeǥiyan.”

25 Umbe, migenat sikandan, ne nekeuma zan diyà te Buntud he Carmel, he zutun sikan is suluǥuen te Megbevayà. Ne hein naahà ni Elisha haazà is bahi ziyà te egkehunaan, migkeǥiyan din is suluǥuen he si Gehazi te, “Ahaa nu man, ebpekeuma sikan is bahi he tig-Shunem! 26 Peleleǥuya nu sikandin te edsinuǥung ne insai nu ke egkemenumenu en sikandin, is esawa zin, wey is anak din.” Ne migkeǥiyan dutun te vahi si Gehazi te meupiya zed is langun.

27 Piru hein nekeume en sikandin diyà te ki Elisha zutun te vuvungan, midluhud sikandin is egawed diyà te paa ni Elisha. Mid-uvey si Gehazi su ebpekasen din haazà is bahi, piru migkaǥi si Elisha te, “Bey-ani nu en sikandin! Su nereǥenan sikandin, piru wazà keǥiya te Nengazen kedì ke maan.” 28 Migkaǥi haazà is bahi te, “Datù, wazà a mebuyù diyà te kenikew te anak he maama, iyan ka mismu migkaǥi he ebpekaanak a, migkaǥi e pa ganì diyà te kenikew te kenà a kenikew terterui.”

29 Ne hein nesavut ni Elisha he zuen nehitavù duen te vatà, migkeǥiyan din si Gehazì, “Pengandam ka te kedhendiyà te valey zin. Uwita nu is tuked ku ne pelelaǥuy ke en. Emun duen nu egkesinugung, ne kenè nu en lelaǥi, ne emun duen ebpekidlalag kenikew, ne kenè nu en tevaka. Ne emun ebpekeuma kad ne segugunè nu isavuk diyà te vuked duen te vatà is tuked ku.” 30 Piru migkaǥi is iney zuen te vatà te, “Ebpenangdù a ziyà te uuyag he Nengazen wey ziyà te kenikew, he kenà a ed-ulì emun kenè ka eduma kediey.” Umbe miduma si Elisha kandin.

31 Midhune en mulà si Gehazi ne insavuk din sikan is tuked diyà te vuked duen te vatà, piru wazè en mebulug med-eriǥues haazà is batà. Umbe midlikù si Gehazi te kedsinuǥung ki Elisha ne migkaǥi te, “Wazà meuyag sikan is batà.”

32 Ne hein nekeuma si Elisha ziyà te valey, neehè din sikan is batà he neketetayhad diyà te hizeǥaan din. 33 Midseled sikandin ne midlelekeb, ne mid-ampù diyà te Nengazen. 34 Ne midlengkevan din haazà is batà, ne indegkit din is bèbè din diyà te vèbà duen te vatà, is mata zin, indegkit din diyà te mata, is belad din indegkit din diyà te velad duen te vatà. Ne zutun te kedlengkevi zin duen te vatà, ne midnaneynaney mebmeinit is lawa zuen te vatà. 35 Midhitindeg si Elisha is ebpekesuǥuksuǥuk duen te ruǥu. Ne mid-umanan din lengkevi haazà is batà. Ne nekeetisà haazà is batà te kepipitu, ne migimerat sikandin.

36 Ne mid-umew ni Elisha si Gehazi ne migkeǥiyan din te, “Umawa nu is iney zin.” Umbe mid-umew zin, ne kebpekeuma zuen te vahi, migkeǥiyan ni Elisha te, “Kuwaa nu en is anak nu.” 37 Midseled haazà is bahi ne midluhud diyà te uvey te paa ni Elisha te kebpeselamat kandin. Ne migkuwa zin sikan is anak din ne impenaug din.

38 Hein midlikù si Elisha ziyà te Gilgal, ne vitil ziyà te Gilgal. Duen timpu he mibpekidlalag kandin is grupu te menge ebpeneuven, ne migkeǥiyan din is suluǥuen din te, “Iziken nu is dekelà he kuzen ne hilutù ka te supas para kayi te menge etew.” 39 Duen sevaha he ebpeneuven he midhendiyà sikandin te vevesukà su ebpekilumbey. Ne nekaahà sikandin te edlangkat he zuen din menge veǥas ne nenguwa sikandin te veǥas dutun he ereg he egkepuyut te kumbalè din. Ne hein nekeulì en sikandin, mibpengarad din haazà ne insahug din duen te edhilutuen he supas, he wazè din ganì metueni ke hengkey haazà. 40 Ne hein nelutù en haazà is supas impemeǥey en diyà te menge etew. Ne zutun te kegkaan dan, nekevensag sikandan te, “Suluǥuen te Megbevayà, kela ke ebpekehilu heini!” Ne kenè dan haazà egkehimu te egkaan. 41 Migkaǥi si Elisha te, “Kuwai a te herina.” Imbusbus din haazà is harina zuen te kuzen ne ke sikandin diyà te suluǥuen te, “Ipemeǥey nu en diyà te kandan su wey zan mekekaan en.” Ne meupiyè en human is taam kayi.

42 Duen timpu, ne zuen sevaha he etew he ebpuun diyà te Baal Shalisha ne mid-uwit sikandin diyà te ki Elisha te 20 he supas he iyan mibeelan is nehuna he neraǥun he barli, wey beǥu he neraǥun he trigu. Migkaǥi si Elisha te, “Iveǥey nu heeyan diyà te grupu te menge ebpeneuven su wey zan mekaan.” 43 Migkaǥi is suluǥuen din te, “Ebmenmenuwen ku para meketukid heini te 100 he menge etew?” Midtavak si Elisha te, “Iveǥey nu zà diyà te kandan su wey zan mekekaan. Su migkaǥi is Nengazen te ebpekekaan dan ne zuen pa egkesamà.” 44 Umbe, imbeǥey heini zuen te suluǥuen diyà te menge ebpeneuven ne nekekaan sikandan, ne zuen dan pa samà, sumalà is nekaǥi te Nengazen pinaaǥi ki Elisha.