1 Dutun he timpu, nezeruwan si Hezekia ne henduen be te ebpatey en. Midhendiyà te kandin is ebpeneuven he si Isaias he anak ni Amoz ne migkaǥi te, “Migkaǥi is Nengazen he veeli nu en is egkesuatan nu te ebaal su kenè ke en egkeulian, kekenà, ebpatey kad.” 2 Ne hein nezineg haazà ni Hezekia, midsinaru sikandin diyà te elavat ne nengemuyù diyà te Nengazen. 3 Ke sikandin te, “Nengazen, tentenuzi nu is kegkemepezumdumahan ku kenikew kayi te kebpengungubpaan ku, nenilbi a kenikew te ebpuun diyà te gehinawa ku, wey meupiya is baal ku ziyà te etuvangan nu.” Ne utew sikandin nekesineǥew.

4 Ne zutun te wazè pa mekaawà si Isaias diyà te tengàtengà he lama zuen te turuǥan, migkeǥiyan sikandin te Nengazen te, 5 “Likù ka ziyà te ki Hezekia, he pengulu te menge etew ku, ne keǥiya nu heini: ‘Iyan heini lalag te Nengazen he Megbevayà te kepuun nu he si David: Nezineg ku is pengemuyù nu wey neehè ku is menge luhè nu. Ne ebewian ku sikew. Iketelu he andew puun guntaan ne ebpekeenew ke en, ne hendiyè ka te valey ku. 6 Ed-umanan ku pa te 15 he tuig is untung nu. Edlibriyen ku sikew wey heini is inged puun te ǥehem te hadì diyà te Asiria. Edipinsahan ku heini he inged su wey a meveǥayi te zengeg wey tenged daan ki David te suluǥuen ku.’ ”

7 Migkeǥiyan ni Isaias is menge suluǥuen ni Hezekia he kepii zan te vinekbek he veǥas te higus is levag din. Midtuman dan heini ne neulian sikandin.

8 Hein wazè pa meulii si Hezekia, mid-insaan din si Isaias te, “Hengkey is tuus he tutuu he egkeulian a ne ebpekehendiyà a te valey te Nengazen te iketelu he andew puun guntaan?” 9 Midtavak si Isaias te, “Iyan heini tuus he ibpaahà te Nengazen he tutuu he edtumanen din heini is insaad din he egkeulian ka. Pilì ka kayi te zezuwa: edlaus te sepulù he sigundu is alung diyà te urasan etawa ed-endud te sepulù he sigundu?” 10 Midtavak si Hezekia te, “Layun edlaus is alung. Umbe ipeendud nu te sepulù he sigundu is alung!” 11 Umbe nengemuyù si Isaias diyà te Nengazen, ne impeendud te Nengazen te sepulù he sigundu is alung diyà te urasan he mibpeveelan ni Ahaz.

12 Dutun he timpu nezineg ni Merodac Baladan he hadì diyà te Babilonia, he anak ni Baladan he nezeruwan si Hezekia. Umbe mibpeuwit sikandin te menge surat wey gasa ziyà te ki Hezekia pinaaǥi te menge menunudtulà. 13 Mibpurungan seǥipaa ni Hezekia is menge menunudtulà, ne impeehè din kandan is langun he menge azen diyà te teleǥuey zin te ketiǥeyunan, is menge pelata, menge vulawan, menge penaket, menge meupiya he klasi te lana, is menge ǥumaan din wey zuma pa he menge ketiǥeyunan din. Wazà minsan hengkey he ziyà te turuǥan din etawa ginhedian din he wazè din ipaahà kandan.

14 Dutun he timpu, is ebpeneuven he si Isaias midhendiyà te ki Hadì Hezekia ne mid-insà te, “Hendei ebpuun heeyan he menge etew, wey hengkey is kinahanglan dan?” Midtavak si Hezekia te, “Ebpuun sikandan diyà te meziyù he lugar, he Babilonia.” 15 Mid-insè pa haazà is ebpeneuven te, “Hengkey is neehè dan diyà te turuǥan nu?” Midtavak si Hezekia te, “Neehè dan is langun he ziyà te turuǥan ku. Wazà minsan hengkey he ketiǥeyunan ku he wazè ku ipaahà kandan.” 16 Ne zutun migkaǥi si Isaias diyà te ki Hezekia te, “Pemineǥa nu heini is lalag te Nengazen: 17 Egkeuma is timpu he ed-uwiten diyà te Babilonia is langun he menge azen diyà te turuǥan nu, sikan is langun he netiǥum te menge kepuun nu he menge azen he kemulu pa taman en guntaan. Ne wazà egkesamà, migkaǥi is Nengazen. 18 Ne is duma te huziyan he menge kevuwazan nu, ebihaǥen ne egkehimu sikandan he menge suluǥuen diyà te turuǥan te hadì te Babilonia.” 19 Mid-isip ni Hezekia he kenà haazà egkehitavù dutun te kandin he timpu, kekenà, duen kelinew wey wazà kezeetan dutun te uuyag pa sikandin. Umbe migkaǥi sikandin diyà te ki Isaias te, “Meupiya heeyan is menge lalag te Nengazen he migkaǥi nu kedì.”

20 Is duma pa he ǥuǥud mehitenged te kedhadì ni Hezekia, wey is langun he nevantug he menge vaal zin wey is kebaal zin te peneng wey ebpetudaan dutun pehendiyà te inged, ne ingkesurat diyà te Libru he Midsuratan te menge Keguǥuza te menge Hadì te Juda. 21 Ne hein minatey en si Hezekia, si Manase he anak din iyan nekeilis kandin te kedhadì.