16
Si David wey si Ziba
1 Hein nekelavey en si David dutun te puntur te vuvungan, midsinuǥung sikandin ni Ziba he suluǥuen ni Mefiboshet. Duen dezuwa he asnu zin he migkergahan te 200 he vuuk he supas, 100 he akup he pasas, 100 he nengelutuan he prutas, wey vinu he ziyà itaǥù te mibeelan he teleǥuey he lundis. 2 Mid-insaan ni David si Ziba te, “Maan is mid-uwit ka keniyan?” Midtavak si Ziba te, “Heini is menge asnu, ne ebpeuntuzan te pemilya nu, is menge supas wey menge prutas para egkeenen niw te menge zuma nu, ne is binu ed-inumen niw emun egkeveley kew ziyà te sibsivayan.”
3 Mid-insà si David te, “Hendei en be si Mefiboshet, is apù te egalen nu he si Saul?” Midtavak si Ziba te, “Mibpelintetaǥak sikandin diyà te Jerusalem, tenged te mid-isip din he iyan sikandin edhimuwen he hadì te keet-etawan te Israel kayi he menge timpu te ginhedian te apù din.” 4 Migkaǥi si David te, “Emun iyan heeyan, ne ǥuntaan ibeǥey ku kenikew is langun he ǥaked ni Mefiboshet.” Midtavak si Ziba te, “Mahal he Hadì, andam a he ebpenilbi kenikew. Berakat he igkelipey a kenikew.”
Midrewakan ni Shimei si David
5 Hein nekeume en si Hadì David diyà te Bahurim, duen etew he migawas dutun he inged ne mibpenrewakan din si David. Heini he etew ne anak ni Gera he kezuzumahi ni Saul he iyan ngazan din si Shimei. 6 Mibpenuleng din te vatu si David wey is menge upisyal zin minsan te midlingutan si David te menge sakup din wey menge ebantey kandin. 7 Iyan heini menge impenrawak din ki David: “Kenè ka seled kayi he inged, sikew is memumunù wey wazè din pulus he etew! 8 Migkuwa nu is ginhedian ni Saul, ne ǥuntaan ebelesan ka te Nengazen te kedhimetayi nu ki Saul wey te pemilya zin. Mid-aǥew nu is ginhedian ni Saul, ne ǥuntaan imbeǥey heini te Nengazen te anak nu he si Absalom. Naawè ka tenged te kebpenhimatey nu.”
9 Migkaǥi ziyà te hadì si Abishai he anak ni Zeruya te, “Mahal he Hadì, maan is ebey-anan nu is kebpenulaa kenikew keniyan he etew he henduen dà daan te minatey he asu? Tuǥuti a kenikew he ebpungelan ku sikandin te ulu.” 10 Piru migkaǥi haazà is hadì te, “Sikiyu is menge anak ni Zeruya, hengkey is kelevetan niw? Emun midsuǥù sikandin te Nengazen he penrewaki e zin, ne hentei e ves is edawey kandin?” 11 Migkeǥiyan ni David si Abishai wey is langun he menge upisyal zin te, “Emun edtinguhà is anak ku te kedhimatey kedì, iyan pe be heini is kezuzumahi ni Saul? Beleǥaza niw en sikandin su Nengazen is midsuǥù kandin. 12 Kela ke meehè ded te Nengazen is kelised ku ǥuntaan ne ebelesan e zin te meupiya he ibales din te menge rawak kedì guntaan.”
13 Ne midlaus si David wey is menge sakup din he edhipanew. Ne edsunuzen sikandan ni Shimei, piru ziyè dà mebayà sikandin te kilid te vuvungan. Ne zutun te kedhipanew zin edrewakan din si David wey ebpenulengen din te vatu wey tanà. 14 Utew en neveley si David wey is menge sakup din, ne midhimeley sikandan hein nekeuma zan diyà te Wahig he Jordan.
Mibpekid-ahà si Hushai ki Absalom
15 Midhendiyà si Absalom te Jerusalem duma si Ahitofel wey is langun he keet-etawan te Israel. 16 Nekeuma zaan diyà si Hushai he Arkanhen, he emiǥu ni David, ne midhendiyà sikandin te ki Absalom ne migkeǥiyan din te, “Mebmeluǥayad is untung te hadì! Mebmeluǥayad is untung te hadì!” 17 Mid-insaan ni Absalom si Hushai te, “Hendei en is kebpekid-unung nu te emiǥu nu he si David? Maan is wazè ka meduma kandin?” 18 Midtavak si Hushai te, “Diyà a eduma te kenikew su iyan ka mibpilì te Nengazen wey te tivuuk he keet-etawan te Israel he iyan egkehimu he hadì. 19 Gawas pa keniyan, ne hentei pe be vuwa is ebpenilbiyan ku, kekenà, sikew is anak ni David? Mibpenilbi a te amey nu, ebpenilbi a zaan kenikew.”
Is Sambag ni Ahitofel ki Absalom
20 Migkeǥiyan ni Absalom si Ahitofel te, “Keǥiya nu kun kedì ke hengkey is ebeelan ta.” 21 Midtavak si Ahitofel te, “Hulizi nu is menge esawa te amey nu he intaǥak din he para ed-atur te turuǥan. Ne egketuenan te langun he menge Israilihanen he midhimu nu he mepauk is amey nu, ne tenged kayi utew ebpekevurut is menge sakup nu.” 22 Ne zutun mibaal zan te tulda he ebpeubpaan ki Absalom duen te atep te turuǥan, ne naahà te menge etew he midseled dutun sikandin he edhulid te menge esawa te amey zin.
23 Dutun he timpu mibpemineg si Absalom te menge sambag ni Ahitofel, iring ded daan dutun is mibeelan ni David hein aney. Su is menge sambag ni Ahitofel in-iring daan te ziyà ebpuun te Megbevayà.