33
Mibpenubtuvazan ni Moises is menge Tribu te Israel
1 Iyan heini menge lalag ni Moises te suluǥuen te Megbevayà hein mibpenubtuvazan din is menge Israilihanen dutun te wazè pa sikandin mebpatey. 2 Migkaǥi sikandin te,
“Nekeuma is Nengazen puun te Sinai;
midsilà sikandin diyà te kenitew puun te Buntud he Seir he iring te kedsilà ta andew.
Midsiǥa sikandin puun te Buntud he Paran.
Nekeuma sikandin duma te linibu he menge velinsuǥuen,
ne is kewanan he velad din ebitbit te edriyubriyub he hapuy.
3 Mahal utew te Nengazen is menge etew zin.
Ebpengelangan din heini is menge etew he menge pinilì din.
Umbe, edsunuzen dan sikandin ne edtumanen dan is mandù din.
4 Imbeǥey kenitew ni Moises is kesuǥuan he egkepengevilin tew te menge kevuwazan ni Jacob.
5 Nehimu he hadì te Israel is Nengazen hein midtiǥum is menge pengulu zan wey menge tribu zan.”
6 Mehitenged te tribu ni Reuben migkaǥi si Moises te,
“Berakat he kenà maawà is menge kevuwazan ni Reuben minsan pa te zeisey zà sikandan.”
7 Mehitenged te tribu ni Juda, migkaǥi si Moises te,
“He Nengazen, pemineǥa nu is hangyù te penavang te tribu ni Juda.
Iuman nu sikandan ilikù diyà te menge tribu te Israel.
Pengelangi nu wey tevangi nu sikandan kuntra te menge kuntada zan.”
8 Mehitenged te tribu ni Levi, migkaǥi si Moises te,
“He Nengazen, imbeǥey nu is beveraan he Thumim wey Urim diyà te metinumanen he menge suluǥuen nu he iyan is menge kevuwazan ni Levi.
Migezaman nu sikandan diyà te Masa ne midsawey nu ziyà te wahig te Meriba.
9 Impeehè dan is kezekelà te kebpekid-unungen dan kenikew he lavew te kebpekid-unungen te menge ginikanan dan, menge suled dan, wey menge anak dan.
Midtuman dan is lalag nu, wey midtipiǥan dan is insurat he kebpekid-uyun nu kandan.
10 Ebpenuruen dan is menge Israilihanen te mehitenged te imbeǥey nu he menge sulunuzen wey menge suǥù nu,
ne ebpemuhat sikandan te menge veyewà wey menge pemuhat he edtutungen diyà te pemuhatà he para kenikew.
11 He Nengazen, tuvazi nu sikandan, ne verakat he igkelipey nu is langun he menge vaal zan.
Dèdeeti nu is menge kuntada zan su para kenè dan en mekeenew.”
12 Mehitenged te tribu ni Benjamin, migkaǥi si Moises te,
“Pinelanggà te Nengazen is tribu ni Benjamin,
ne ibpekeziyù din sikandan te ebpekezezaat wey ebpengelangan din sikandan te tivuuk he andew.”
13 Mehitenged te tribu ni Jose, migkaǥi si Moises te,
“Berakat he edtuvazan te Nengazen is tanè dan ne layun din ebpeuzani wey ebpelepawan din te wahig he ebpuun diyà te zizalem te tanà.
14 Berakat he pinaaǥi te tavang te andew ne mebeǥas is menge pinemula zan te meupiya he menge veǥas te timpu te tipemeǥas din.
15 Berakat he is kezaan he menge vuntud dan mekeveǥey te meupiya wey zekelà he uzar.
16 Berakat he is tanè dan mekeveǥey te kineupiyahan he menge pruduktu pinaaǥi te keupiya te Megbevayà he mibpekidlalag diyà te egkeregreg he zeisey he kayu.
Berakat he kenà maawà diyà te tribu ni Jose heini he menge tuvad su lavew sikandin te menge suled din.
17 Is desen din meiring te zesen te kinekekayan he tudu he vaka.
Is gehem din meiring te ǥehem te sungey te kelesanen he vaka.
Pinaaǥi kayi edèdeetan din is menge nasyun minsan is diyà te kinemeziyuan he vahin kayi te kelibutan.
Iyan heini penuvadtuvad ku te mahabet he menge etew he egkeǥepak diyà te ki Efraim wey ki Manase.”
18 Mehitenged te tribu ni Zebulun wey ki Isacar, migkaǥi si Moises te,
“Egkelipey is tribu ni Zebulun, su ed-uswag dan pinaaǥi te kebpetiǥayun dan diyà te zuma he menge lugar.
Egkelipey is tribu ni Isacar su ed-uswag sikandan diyà te kandan he lugar.
19 Edhinggaten dan is menge etew te kedhendiyà te vuntud para te kebpemuhat te hustu he menge pemuhat diyà te Megbevayà.
Edsilibra zan tenged te zekelà he keupiyaanan he nekuwa zan diyà te zaǥat wey ziyà te veyvey.”
20 Mehitenged te tribu ni Gad, migkaǥi si Moises te, “Eedeliǥen is Megbevayà he mibpekeluag te tanà te tribu ni Gad!
Ed-ubpà sikandan kayi he tanà he andam he ed-upangis te vekelawan etawa ulu te menge kuntada zan.
21 Mibpilì dan is tanà he kineupiyahan he engayan he para te menge pengulu.
Emun edtiǥum is ebpemendumala te menge Israilihanen, edsunuzen kayi he tribu is ibpetuman kandan te Nengazen wey is menge sulunuzen para te Israel.”
22 Mehitenged te tribu ni Dan, migkaǥi si Moises te,
“Is tribu ni Dan iring te anak te erimaung he edlingketew puun te Bashan.”
23 Mehitenged te tribu ni Naftali, migkaǥi si Moises te,
“Dekelà is tuvad te Nengazen diyà te tribu ni Naftali. Berakat he maangken dan is tanà he zapit te edsenlepan wey zapit te zivavà.”
24 Mehitenged te tribu ni Asher, migkaǥi si Moises te,
“Berakat he tuvazi is tribu ni Asher lavew te langun he tribu te Israel.
Berakat he ikelipey sikandan te menge zuma zan he menge Israilihanen wey mehimu he zekelà is lana zan.
25 Berakat he is menge pultahan te menge inged dan ne putew wey brunsi is biǥer zan,
wey verakat he kenà maawà is kegkemekeǥeǥehem dan mintras uuyag dan pa.
26 Wazà iring te Megbevayà he ed-ezapen niw te menge Israilihanen.
Ed-untud sikandin te ǥapun is edtavang keniyu. Pinaaǥi te gehem din edseǥazan din is langit.
27 Iyan eputè niw is wazà pidtemanan he Megbevayà;
edlig-enan kew zin pinaaǥi te gehem din he wazà pidtemanan.
Ibpesegseg din keniyu is menge kuntada niw,
ne edsuǥuen kew zin te kedezaat kandan.
28 Umbe, ebpekepengungubpaan is menge Israilihanen he meziyù te kezeetan, dutun te tanà he uuzaran te trigu wey vinu,
wey zehemug he ebpuun diyà te langit he ebeǥey te wahig diyà te tanà.
29 Utew kew zeyzey is menge etew te Israel!
Wazà iring keniyu su iyan kew menge etew he midlibri te Nengazen.
Is Nengazen iyan ebpengalang wey edtavang keniyu,
ne iyan sikandin ebpekidtebek para keniyu.
Ebpenanap is menge kuntada niw pehendiyà te keniyu, ne edtekutakan niw is menge peka zan.”