1 Meupiya pa is meupiya he zengeg kenà te mahalen he pehemut, ne iring din ded daan meupiya pa is andew te kebpatey ta kenà te andew te ked-enaka kenita.

2 Meupiya pa is kedhendiyà te mibpetayan kenà te kedhendiyà te keemuran he zuen gastu, su kemetayen man is egkepengkusan te langun. Ne kinahanglan he edtentunuzan heini te menge uuyag pa.

3 Meupiya pa is kegkeseeng kenà te kegkelipey su is kegkeseeng ebpeketulid kenita.

4 Is metau he etew layun din ed-isipa is mehitenged te kemetayen, piru is tulebung he etew iyan din layun ed-isipa is kedlipeylipey.

5 Meupiya pa ke edsewayen ki te metau he etew kenà te edeliǥen ki te tulebung he etew.

6 Is engit te tulebung he etew ne iring te menge zuǥi he ebpenleleǥetì diyà te hapuy. Wazà kayi pulus.

7 Is metau he etew egkehimu he tulebung emun ebpenlimbung sikandin wey mekeselapì. Su emun ebpesipsip ka ne paaǥi heeyan te kedezeeti nu te ked-etew nu.

8 Meupiya pa is kedhimasad kenà te kebpuunà. Meupiya pa is kebmepelevayen kenà te kebpelavew.

9 Kenè ka melemu he mepauk, su is kegkepauk ne iyan neleyaman he ed-ul-ulahan te menge tulebung he etew.

10 Kenè ka insà te, “Maan is meupiya is nehuna he timpu kenà te ǥuntaan?” Su kenà heeyan hustu he insà.

11 Meupiya is ketau, iring heini keupiya te menge vutang he egkepengevilin ta. Ebpeketavang heini kenita kayi te ked-ubpè ta kayi te kelibutan, 12 wey eputè ta heini iring te selapì. Umbe utew ebpeketavang is keuluwanen; ebpeketavang heini wey ki luǥeyazi te untung.

13 Isipa nu ke hengkey is mibeelan te Megbevayà. Hentei is ebpeketulid te mibulegkù te Megbevayà?

14 Medlipey ka emun meupiya is kebpekesavuk nu. Piru emun edlised ka, tentenuzi nu he iyan is Megbevayà mibeǥey te meupiya he kebpekesavuk wey te kelised. Umbe kenè ta egketuenan ke hengkey is huziyan he egkehitavù.

15 Kayi te untung ku he wazè din pulus, neehè ku is langun: is menge metazeng ne nemematey zutun te metazeng he kebpengungubpaan wey is menge mezaat ne ebpengungubpaan te meluǥayad dutun te mezaat he kebpengungubpaan dan.

16 Kenè nu pesubrahi is ked-isipa nu te keugelingen nu he metazeng ka etawa metau ka. Su paaǥi heini te kedezeeti nu te keugelingen nu. 17 Kenè nu zaan pesubrahi is kegkezaat nu, wey kenè ka medtinulebung. Su emun ebeelan nu heini egkepenggevuan is umur nu. 18 Kenè nu haazà pesubrahi; kinahanglan he ziyè ke zà te liwezaan, su kenà ebpesubra is etew he edtahud te Megbevayà.

19 Dekelà is egkehimu pinaaǥi te ketau te sevaha he etew kenà te egkehimu te sepulù he pengulu te inged.

20 Wazà etew kayi te kelibutan he layun dà metazeng is menge vaal zin wey kenà egkesayep.

21 Kenè nu siǥipaa is langun he egkeǥiyen te etew, su kela ke mezineg nu he ed-rewakan ka te suluǥuen nu. 22 Su netuenan nu he sikew mismu layun nu ed-rewaki is duma.

23 Migezaman ku te edsavut is langun he nengehitavù kayi te kelibutan pinaaǥi te ketau ku. Ed-is-isipen ku he mesavut ku, piru kenè bes haazà. 24 Kenè ku egketegkad is nengehitavù; mereǥen heini he edsevuten. Ne wazà ebpekesavut kayi. 25 Piru mibpedayun a he ed-istudyu wey edsusi, su wey a mekaangken te ketau wey tavak te menge insè ku, wey para mesavut ku ke maan is tulebung is etew he ebaal te mezaat ne taleng is etew he edtinulebung.

26 Nesusi ku he is meungangen he vahi ne mepait pa te kemetayen. Is arig din ne iring te litag, wey is menge velad din he igkepkep din kenikew ne iring te kedina. Ebpekelikey kandin is ebpenunuat te Megbevayà, iyan, egkelitag din mulà is mekesesalà. 27-28 Siak is megwewali egkaǥi te, “Mibpurungan ku te ed-isip-isip is minsan hengkey te kebpen-ahà te tavak te menge insè ku. Piru wazè ku ǥihapun meturedu is menge tavak kayi. Piru nesusi ku: te 1,000 he menge maama ne zuen dà sevaha kandan he metazeng: ne te 1,000 he menge vahi ne wazà minsan sevaha zà kandan he metazeng. 29 Ne lavew te langun, nesusi ku he midlimbag te Megbevayà is etew para medtinazeng piru kezekelan te menge paaǥi te etew ne kenà metazeng.”