1 Ne mibeelan eni Bezalel is Kavan te Kebpekid-uyun he kayu he ekasya, ne haazà, 45 he vaney is keluǥayad din, 27 he vaney is keluag din, ne 27 he vaney is ketikang din. 2 Ne mid-epizan dan te lunsey he vulawan is diyà te seled wey is diyà te gawas kayi, ne midribitiyan dan te vulawan is diyà te menge kilid kayi. 3 Ne mibaal sikandin te heepat he mibpen-iring te rintì he vulawan, ne impikit heini zuen te heepat he paa kayi. Tig-dezuwa is diyà te pesikilizà kayi. 4 Ne mibaal zaan sikandan te menge tival he kayu he ekasya he mid-epizan dan te vulawan. Tig-dezuwa is diyà te kada kilid. 5 Ne in-ahuk dan haazà is tival zuen te menge mibpen-iring te rintì duen te kada kilid te Kavan para metival zan haazà is Kavan.

6 Ne mibaal zaan sikandan te Kavan he lunsey he vulawan he 45 he vaney is kelayat din wey 27 he vaney is keluag din. 7-8 Ne mibaal sikandan te zezuwa he ledawan he kirubin he vulawan duen te kada puru te tangeb duen te Kavan. In-ubpu zà heini te kebeeli zuen te tangeb te Kavan. 9 Nevekar is menge pakpak duen te menge kirubin diyà te zivavew zuen te tangeb su wey zan melembungi heini. Impedsineruwà haazà is dezuwa he zutun ipetengteng te tangeb.

10 Ne mibaal zaan sikandan te lemisahan he ekasya, he 36 he vaney is keluǥayad din, ne 18 he vaney is keluag din wey 27 he vaney is ketikang din. 11 Ne mid-epizan dan haazà te lunsey he vulawan wey midribitiyan dan daan te vulawan is peliǥuy zutun. 12 Ne midsenipahan dan is ebpekeliǥuy ziyà te zivavew zutun te lemisahan te heepat he vaney is keluag din, ne is divavew zutun te insenipa zan, midribitiyan dan te vulawan. 13 Ne mibaal sikandan te heepat he mibpen-iring te rintì he vulawan, ne impikit dan heini zuen te heepat he tukud te lemisahan 14 uvey te senipa. Kayi zan idtaud sikan is tival he idtival zuen te lemisahan. 15 Heini he menge tival, ekasya he mid-epizan te vulawan. 16 Ne mibaal sikandan te lunsey he vulawan he menge gelemiten dutun te lemisahan he iyan is: menge pinggan, menge tasa, menge yehung, wey menge tivud he egemiten para te menge pemuhat he inumen.

17 Mibaal zan daan te selevukà te sulù he lunsey he vulawan is paa zin, lawa zin, wey is dayandayan dutun he menge vulak, he is duma zuen wazè pa mebekar ne is duma mibekar en. Haazà is dayandayan idredsè dà is kebpurmaha kayi zuen te kebpurmaha te selevukà te menge sulù su teleubpu zà heini. 18 Haazà is selevukà te sulù, duen din heenem he subpang; tigtetelu is diyà te kada kilid kayi. 19 Is kada subpang dutun, duen din tetelu he zayandayan he menge vulak he mid-iring te vulak he almindru, he is duma, memetivurun pa, ne is duma nememekar en. 20 Ne is lawa zutun te selevukà te sulù, ne zuen dutun heepat he zayandayan he mid-iring te vulak he almindru he wazè pa mebekar wey mibekar en. 21 Duen sevaha he vulak diyà te zizalem te kada paris te subpang. 22 Haazà is menge zayandayan wey menge subpang, inredsè dà is kebpurmaha zuen te kebeeli zuen te lewahan te selevukà te sulù. 23 Mibaal zaan sikandan te pitu he sulù, menge lipit kayi, wey menge idtaya te egkeepus he pebilu zuen te sulù. Heini is langun lunsey he vulawan. 24 Menge 35 he kilu he lunsey he vulawan is neǥamit te kebeeli zuen te selevukà te sulù wey te langun he menge gelemiten kayi.

25 Mibaal zaan sikandan te pemuhatà he kayu he ekasya he para tutungà te veyewà. Kuwedradu heini; 18 he vaney is keluǥayad din wey keluaǥan din, 36 he vaney is ketikang din. Duen kayi menge sungeysungey ziyà te suyuk din he inredsè dà is kebpurmaha zuen te kebeeli kayi te pemuhatà. 26 Mid-epizan dan te lunsey he vulawan is dapit te zivavew kayi, is heepat he kilid kayi, wey sikan is menge sungeysungey ziyà te menge suyuk, ne midribitiyan dan te vulawan is peliǥuy kayi. 27 Midteuzan dan te zezuwa he mibpen-iring te rintì he vulawan is dizalem duen te ribiti ziyà te pesiziveluyà duen te pemuhatà, he para edteuzan te menge tival he idtival kayi. 28 Haazà is mibeelan he tival, kayu he ekasya he mid-epizan te vulawan. 29 Mibaal zaan sikandin te segradu he lana he para te idlana wey lunsey he veyewà he utew mehemut.