1 Midtahì ensi Bezalel te segradu he menge visti he para te menge memumuhat sumalà te insuǥù te Nengazen ki Moises. Is manggad he migamit dan welin he meitem is kaavuavu zin, merudtem wey kanggan. Iyan daan heini klasi te manggad he migamit dan hein mibeelan dan te visti si Aaron.

2 Midtahì dan daan te ipud. Is manggad he migamit dan linu he miburdahan te welin he meitem is kaavuavu zin, merudtem wey kanggan. 3 Mibaal sikandan te tanur he vulawan pinaaǥi te kedlumpipia zan duen te vulawan wey kebpenebtevasa zuen he mibpekenipis. Ne imburda zan heini te linu duma te welin he meitem is kaavuavu zin, merudtem wey kanggan. Utew meupiya is kegkeburdaha kayi. 4 Dezuwa he vahin heini he visti, is peka wey sineruwan, ne impedsumpul heini ziyà te tedted din diyà te pemenayen. 5 Is bakes kayi, linu zaan he miburdahan te vulawan he tanur wey welin he meitem is kaavuavu zin, merudtem, wey kanggan. Mibeelan dan heini sumalà te insuǥù te Nengazen ki Moises.

6 Intaud dan is menge vatu he uniks diyà te selevukà he vulawan. Ne in-ukir zan dutun is menge ngazan te menge anak he maama ni Jacob. Iring heini te ked-ukir te para ibmarka. 7 Ne impikit dan haazà duen te menge tedted diyà te pemenayen duen te ipud su tedeman haazà he menge vatu para te menge tribu te Israel. Mibeelan dan heini is langun sumalà te insuǥù te Nengazen ki Moises.

8 Mibaal zaan sikandan te teleǥuey ziyà te kumeng, ne utew meupiya is kegkeveeli kayi. Is manggad he migamit para kayi, ne iring ded duen te migamit dan te kebaal te visti he ipud: linu he miburdahan te vulawan he tanur wey welin he meitem is kaavuavu zin, merudtem wey kanggan. 9 Heini is teleǥuey ziyà te kumeng midubli is kedlumpìa zuen ne kuwedradu heini; siyam he vaney is keleyatan din wey keluaǥan din. 10 Ne midteuzan dan heini te heepat he linya te mahalen he menge vatu. Is nehuna he linya, rubi, tupas, wey biril; 11 is ikezuwa he linya, imirald, sapiru, wey diyemanti; 12 is iketelu he linya, hasintu, agata, wey amatista; 13 ne ikeepat he linya, krisulitu, uniks, wey haspir. Ne impikit dan heini ziyà te selevukà he vulawan. 14 Is kada sevaha zuen te sepulù wey dezuwa he menge vatu, ne in-ukir zutun is sevaha zaan he ngazan te sevaha he anak ni Jacob, su iyan haazà edriprisintar te sepulù wey zezuwa he ebpuunan te menge kevuwazan ni Israel. Is ked-ukira zutun ne iring te ked-ukir te para ibmarka.

15 Midteuzan dan daan te rantey he lunsey he vulawan sikan is teleǥuey ziyà te kumeng. 16 Mibaal zaan sikandan te dezuwa he selevukà he vulawan wey zezuwa he mibpen-iring te sising he vulawan, ne impikit dan heini is dezuwa he mibpen-iring te sising diyà te zivavew he menge suyuk duen te teleǥuey ziyà te kumeng. 17 Ne inhiket dan sikan is dezuwa he rantey he vulawan duen te zezuwa he iring te sising he zutun te apid te kumeng he teleǥuey, 18 ne sikan is dezuwa he purù duen te rantey, ne impikit dan diyà te selevukà he zuen idsanggat te menge tedted diyà te pemenayen duen te ipud.

19 Mibaal zaan sikandan te zezuwa pa he mibpen-iring te sising he vulawan. Ne impikit dan heini zuen te egkeiniyuǥan duen te zizalem he menge suyuk duen te teleǥuey ziyà te kumeng, he id-apid duen te ipud. 20 Ne mibaal pa sikandan te zezuwa pa he mibpen-iring te sising he vulawan, ne impikit dan heini zuen te ipud diyà te zivavew te vakes kayi. 21 Ne impedhiketè dan pinaaǥi te meitem is kaavuavu zin he hiket sikan is dapit te zizalem he iring te sising duen te apid te kumeng he teleǥuey wey sikan is mibpen-iring te sising duen te ipud. Pinaaǥi kayi ebpekepurung ebpekepikit sikan is apid te kumeng he teleǥuey zuen te ipud. Mibeelan dan heini is langun sumalà te insuǥù te Nengazen ki Moises.

22 Mibaal zaan sikandan te visti he pendivavew he visti te memumuhat. Heini he visti ed-epizan duen te ipud. Is manggad he migamit dan te kedtahì kayi welin he lunsey he meitem is kaavuavu zin. 23 Heini he visti duen din liab he mid-epuruwan su wey kenà mevindas. 24 Mibpemikitan dan is peliǥuy te sidsid kayi he visti te mibpen-iring te prutas he pumigranata, he iyan mibeelan is linu he miburdahan te welin he meitem is kaavuavu zin, merudtem wey kanggan. 25-26 Mibel-etan dan sikan is menge zayandayan te menge seriyew he lunsey he vulawan. Heini he visti ibivisti ni Aaron emun ebpenilbi sikandin te Nengazen. Mibeelan dan heini is langun sumalà te insuǥù te Nengazen ki Moises.

27 Mibaal zan daan te menge pendizalem he visti he para ki Aaron wey para zuen te menge anak din he maama; iyan migamit dan is manggad he linu. 28 Iyan ded daan haazà klasi te manggad he migamit dan te kebaal te menge tengkulu, menge kalù wey menge pendizalem he visti. 29 Is menge vakes, linu zaan he miburdahan te welin he meitem is kaavuavu zin, merudtem wey kanggan. Ne utew heini mibpurungi te eburda. Midhimu zan heini is langun sumalà te insuǥù te Nengazen ki Moises.

30 Mibaal sikandan te midalya he lunsey he vulawan ne mibpe-ukiran dan heini te iring te ked-ukir te para te ibmarka. Ne iyan heini lalag he in-ukir zuen: “Insivey para te Nengazen.” 31 Ne impikit dan heini ziyà te egkesineruwan te tengkulu ni Aaron pinaaǥi te meitem is kaavuavu zin he hiket. Mibeelan dan heini is langun sumalà te insuǥù te Nengazen ki Moises.

32 Nepasad is langun he terebahu zuen te Tulda he Ed-zapan, he egngezanan daan he Tulda he Edtelevukaayan. Mibeelan te menge Israilihanen is langun he insuǥù te Nengazen diyà te ki Moises. 33 Ne impeehè dan diyà te ki Moises haazà is Tulda he Ed-ezapan wey is langun he menge gelemiten dutun: is menge kaw-it, menge elavat, menge marku, menge tukud, menge pundasyun, 34 is tambun he lundis te meemahan he kerehidu he midtinà te meriǥà, is tambun he meupiya he kelasi he lundis, is menge kurtina; 35 is Kavan te Kebpekid-uyun wey is tambun din wey is menge tival kayi; 36 is lemisahan wey is langun he gelemiten kayi, wey is supas he ibpemuhat diyà te etuvangan te Megbevayà; 37 is lunsey he vulawan he selevukà te menge sulù, is ebpekelinya kayi he menge sulù, wey menge gelemiten dutun; wey is lana he idtubil te sulù; 38 is bulawan he pemuhatà; is lana he para te idlana; is mehemut he veyewà; is kurtina he para te gemawan duen te Tulda; 39 is brunsi he pemuhatà wey is tuuǥà he brunsi kayi, is menge tival zuen, wey is langun he menge gelemiten kayi; is bisin wey te selevukè din; 40 is menge kurtina he ibpeliǥuy zuen te lama wey is menge tukud kayi wey menge pundasyun; is kurtina te pultahan dutun te lama; is menge hiket wey menge palpal para te kurtina te lama; is langun he gelemiten dutun te Tulda he Ed-ezapan, he migngezanan daan te Tulda he Edtelevukaayan; 41 wey is mekempet wey segradu he menge visti he para te memumuhat he si Aaron wey te menge anak din he menge maama, he ibivisti zan emun ebpemuhat dan duen te Segradu he Lugar.

42 Mibeelan te menge Israilihanen is langun he terebahu he insuǥù te Nengazen diyà te ki Moises. 43 Ne mibpurungan susiya ni Moises is minsan hengkey zutun, ne neehè din he sungkad is kegkeveeli te langun dutun te insuǥù te Nengazen. Umbe mibpenubtuvazan sikandan ni Moises.