1 Hein diyè e pa te Jerusalem, migkaǥi is Nengazen kayi te kedì te, 2 “Sikew is etew, nengungubpaan ka zuma te mesinupaken he menge etew. Duen dan menge mata piru kenè dan ebpekaahà, duen dan menge telinga piru kenè dan ebpekezineg, su menge mesinupaken sikandan he menge etew. 3 Umbe, sikew is etew, peehè ka he iring te vinihag ka. Penines ka te menge azen nu ne hendiyè ka te selakew en he lugar. Ne veeli nu heini zutun te andew te edtengtengan ke zan. Su kela ke pinaaǥi kayi egkeisip-isip dan he menge mesinupaken dan. 4 Dutun te maandew pa, tinesa nu is ed-uwiten nu para meehè dan. Ne kebmezukilem, dutun te edtengtengan ke zan, hipanew ka he iring te vinihag ka. 5 Busluwa nu is elavat te valey nu zutun te edtengtengan ke zan, ne zutun ka vayà he ed-uwit te uwiten nu. 6 Ne zutun te edtengteng sikandan, bevaa nu is uwiten nu ne ǥenat ka zutun te egkesakep en. Tembuni nu is buked nu su wey nu kenà maahà is tanà. Heini is ebeelan nu ebpezayag te sevaha he petizaan diyà te menge etew te Israel.”

7 Ne midtuman ku haazà is insuǥù din. Maandew pa ne nenines ad te uwiten ku, ne hein mezukilem en, mibuslu ku is elavat ku pinaaǥi te menge velad ku. Ne zutun te edtengteng sikandan, mibava ku is uwiten ku ne migenat a zutun te merusirem en.

8 Ne hein meselem en migkaǥi is Nengazen kayi te kedì te, 9 “Sikew is etew, emun ed-insà is mesinupaken he menge etew te Israel mehitenged te mibeelan nu, 10 keǥiyi nu sikandan he siak, is Nengazen he MEGBEVAYÀ duen menge lalag ku para te pengulu te Jerusalem wey te langun he menge etew te Israel. 11 Keǥiyi nu sikandan he sikan is mibeelan nu sevaha he petizaan diyà te kandan he egkevihag sikandan. 12 Minsan is pengulu zan, diyà ebpekevayà te vudsi te elavat he ebava te uwiten din is egenat dutun te merusirem he kezukileman. Edtembunan din is buked din su wey zin kenà maahà is tanà. 13 Edhingutelen ku sikandin ne ed-uwiten ku ziyà te Babilonia he tanà te menge Kaldiyanhen. Piru kenè din heini egkaahà, ne ebpatey sikandin dutun. 14 Ibpeyapat ku ziyà te minsan hendei is langun he menge etew zin, ragkes is menge suluǥuen din wey menge vantey zin, ne minsan hendei zan ebpevayà ebpehimetayan ku sikandan. 15 Ne emun igkepeyapat ku en sikandan diyà te menge nasyun, ne egketuenan dan human he iyan a Nengazen. 16 Piru edtuǥutan ku is egkepipira kandan he mekelingkawas te tebek, bitil, wey zaru su wey zan metudtul ziyà te menge nasyun he egkepeveyaan dan is utew mezaat he menge vaal zan. Ne zutun egketuenan dan he iyan a Nengazen.”

17 Migkaǥi pa is Nengazen kayi te kedì te, 18 “Sikew is etew, pekekerker ka tenged te kegkahandek dutun te egkaan ka wey ed-inum ka. 19 Ne keǥiyi nu is menge meǥinged diyà te Jerusalem wey te tivuuk he Israel he siak, is Nengazen he MEGBEVAYÀ, migkaǥi a he egkengeseeng sikandan wey ebpengerkeren tenged te kegkahandek dutun te egkaan sikandan wey ed-inum, su ed-eǥawen is menge azen diyà te nasyun dan tenged te kegkemesipala zan. 20 Edèdeetan is menge inged dan ne egkehimu heini he mekevulungbulung. Ne egketuenan dan dutun he iyan a kes Nengazen.”

21 Migkaǥi en maan is Nengazen kayi te kedì te, 22 “Sikew is etew, maan is duen erubasa ziyà te Israel he edhenduen te, ‘Mahabet en is midlavey he menge timpu, piru wazè man metuman is menge tagnà.’? 23 Keǥiyi nu sikandan he, iyan a, is Nengazen he MEGBEVAYÀ edtapus kayi he erubasa, ne kenè dan en heini egkeumanan egkehisguti ziyà te Israel. Keǥiya nu ziyà te kandan he hapit en egketuman is menge tagnà. 24 Su egkaawè en diyà te Israel is tarù he egkengelewasan wey menge tagnà he kenà tutuu. 25 Su emun iyan a, is Nengazen egkaǥi, ne segugunà heini egketuman. Egketuman en is migkaǥi ku he ebpekesuǥat diyà te keniyu te menge mesinupaken he menge etew. Egkehitavù heini ziyà te keniyu he timpu. Iyan a, is Nengazen he MEGBEVAYÀ, migkaǥi kayi.”

26 Ne migkaǥi is Nengazen kayi te kedì te, 27 “Sikew is etew, egkaǥi is menge etew te Israel te, ‘Is menge mibpelewasan din wey menge tagnè din ne egkeuǥet pa egkehitavù.’ 28 Umbe, keǥiya nu heini ziyà te kandan: ‘Iyan a, is Nengazen he MEGBEVAYÀ, migkaǥi a te hapit en egketuman is migkaǥi ku. Uya, egkeulaula en heini.’ ”