1 Migkaǥi is Nengazen kayi te kedì te, 2 “Sikew is etew, kanta ka te kentahan para te kebpenhulùhulù mehitenged te Tyre, 3 kes inged he dungguanan te menge varku wey sintru te nigusyu te menge meǥinged diyà te veyvey te zaǥat. Keǥiyi nu he iyan a, is Nengazen he MEGBEVAYÀ migkaǥi te, ‘He Tyre, mibpehivantug ka he utew ka mekempet. 4 Impemeluag nu is lugar nu ziyà te zaǥat. Mibpurung ka pekekempeta te menge mibangun kenikew. 5 Neiring ka te zekelà he varku he kayu he abitu he ebpuun diyà te Senir. Ne menge kayu he sidru he ebpuun diyà te Lebanon is palu nu. 6 Ne menge kayu he ulayan he ebpuun diyà te Bashan is menge vegsey nu. Ne menge kayu he sipris he ebpuun diyà te balet he Kitim is saag nu, ne mibpekeplaan heini te dayandayan he ungal te ilipanti. 7 Is layag nu binurdahan he linu he ebpuun te Ehipto. Ne henduen te bendirà is ked-ahaa kayi. Is terapal nu maavuavu is keitem din wey merudtem he ebpuun diyà te isla te Elisha. 8 Tig-Sidon wey tig-Arvad is menge perevegsey nu, ne iyan mismu is menge meǥinged diyà te kenikew menge terebahanti nu. 9 Ne menge metau he menge pandey he ebpuun diyà te Gebal is ebpurung te egkengezeetan diyà te kenikew. Ed-uvey kenikew is langun he menge terebahanti te zuma he menge untuzà ne ebpetiǥayun dan diyà te kenikew. 10 Ne menge tig-Persia, tig-Lydia, wey tig-Put is menge sundaru nu. Insanggat dan is menge kelasag dan wey menge hilmit dan diyà te elavat nu, ne nekeveǥey heini kenikew te zengeg. 11 Menge tig-Arvad wey menge tig-Helec is menge sundaru nu he ebantey ziyà te peliǥuy te menge verengbeng nu, ne menge tig-Gamad is ebantey te menge turi nu. Insanggat dan diyà te elavat nu is menge kelasag dan ne nekeveǥey heini kenikew te zekelà he zengeg.

12 “ ‘Mibpetiǥayun diyà te kenikew is Tarshish su mahabet is ketiǥeyunan nu. Midliwaan dan is menge velegyè nu te pelata, putew, lata, wey timeǥà. 13 Mibpetiǥayun daan diyà te kenikew is Grecia, Tubal, wey Meshec. Midliwaan dan is menge velegyè nu te menge uripen wey menge brunsi he mibeelan he menge gelemiten. 14 Ne is inliwà te menge tig-Bet Togarma te menge velegyè nu ne menge kudà he para te idterebahu wey para te tebek, wey menge mulà.

15 “ ‘Mibpetiǥayun daan diyà te kenikew is menge tig-Dedan, ne mahabet is menge sukì nu ziyà te menge lugar he ziyà te veyvey te zaǥat. Is imbayad dan kenikew menge ungal te ilipanti wey menge mezesen wey meitem he menge kayu.

16 “ ‘Mibpetiǥayun daan diyà te kenikew is Aram su mahabet is menge pruduktu nu. Is inliwè dan te menge velegyè nu menge ismiralda, menge manggad he merudtem, menge binurdahan, menge mahalen he linu, paǥang, wey menge rubi.

17 “ ‘Mibpetiǥayun daan diyà te kenikew is Juda wey Israel. Midliwaan dan is menge velegyè nu te trigu he ebpuun diyà te Minnit, higus, teneb, wey haplas.

18 “ ‘Mibpetiǥayun daan diyà te kenikew is tig-Damascus su mahabet is ketiǥeyunan nu wey menge pruduktu. Is inliwè dan te velegyè nu binu he ebpuun diyà te Helbon wey welin he ebpuun diyà te Zahar. 19 Is menge tig-Dan wey tig-Javan he ebpuun diyà te Uzal mibpetiǥayun daan diyà te kenikew. Is inliwè dan te menge velegyè nu, iyan is menge putew wey menge penaket.

20 “ ‘Is inliwà te menge tig-Dedan te menge velegyè nu iyan is menge manggad he ebeelan he valhen.

21 “ ‘Mibpetiǥayun daan diyà te kenikew is menge tig-Arabia wey is langun he pengulu ziyà te Kedar. Is inliwè dan te menge velegyè nu menge kerehidu wey menge kambing.

22 “ ‘Mibpetiǥayun daan diyà te kenikew is menge nigusyanti ziyà te Sheba wey Raama. Is imbayad dan te menge velegyè nu iyan is langun he kelasi te meupiya he menge penaket, mahalen he menge vatu, wey menge vulawan.

23 “ ‘Mibpetiǥayun daan diyà te kenikew is menge tig-Haran, tig-Cane, tig-Eden, wey is menge nigusyanti ziyà te Sheba, Ashur, wey Kilmad. 24 Is inliwè dan te menge velegyè nu iyan is mahalen he menge visti, menge manggad he maavuavu is keitem din, menge manggad he binurdahan, wey menge carpet wey nekedseselekawà is barek din he mibperibitiyan te nepurungan is kedtehia zuen.

25 “ ‘Sikew is inged he Tyre, is menge barku ziyà te Tarshish iyan egkarga te menge velegyè nu. Neiring ka te varku he nepenù te karga zutun te kedlayag din diyà te zaǥat. 26 Piru te ed-uwiten ka te menge perevegsey nu ziyà te lawed, ebengkaǥen ka te mevendes he keramag he ebpuun diyà te edsilaan. 27 Ne egkengelened is langun he mid-untud wey in-untud diyà te kenikew: menge ketiǥeyunan nu, menge velegyè nu, menge terebahanti nu, menge meriniru nu, menge pandey nu, menge nigusyanti wey is langun he menge sundaru nu. Egkengelened heini is langun dutun te andew he egkevengkag ka.

28 “ ‘Egkerkeren tenged te kegkahandek is menge meǥinged diyà te veyvey te zaǥat emun egkezineg dan is kebpetavang te menge terebahanti. 29 Ed-ewaan te menge perevegsey is menge untuzè dan ne ebpemenhitindeg dan diyà te veyvey duma te menge meriniru wey menge terebahanti, 30 ne edsineǥawan ke zan. Ebukbukan dan te eliyavuk is ulu zan ne edtelulid sikandan diyà te avu su ibpeehè dan is kedlalew zan. 31 Egkiskisan dan is ulu zan wey ebivisti sikandan te saku zutun te edsineǥew sikandan is egkeseeng. 32 Ne zutun te kedlalew zan ibpenhulùhulù dan heini: “He Tyre, wazè en ebpekerepeng te kegkezeeti kenikew pinaaǥi te kegkelened nu ziyà te lawed! 33 Midlayag ka is ed-uwit te menge velegyè nu, ne mahabet he menge etew is nelipey tenged te kezekelà te ketiǥeyunan nu. Midsepian is menge hadì kayi te kelibutan tenged te menge velegyè nu. 34 Piru ǥuntaan nevengkag ke en ne nekezuma te kegkelened nu ziyà te zizalem te zaǥat is menge velegyè nu wey is langun he menge terebahanti. 35 Ne utew ingkahandek te langun he menge meǥinged diyà te veyvey te zaǥat is nehitavù kenikew. Is menge hadì dan mibpengerker te kegkahandek, ne egketuusan heini ziyà te dagwey zan. 36 Henduen be te kenà ebpeketuu is menge nigusyanti ziyà te menge nasyun te nehitavù kenikew. Mekahandekhandek is ketepusan nu, ne egkahanew ka taman te taman.” ’ ”