1 Migkaǥi is Nengazen te, “Sikew is etew, keǥiyi nu is menge vuvungan te Israel te, ‘He menge vuvungan te Israel, pemineǥa nu is menge lalag te Nengazen. 2 Iyan heini migkaǥi te Nengazen he MEGBEVAYÀ: migkaǥi is menge kuntada niw he egkaangken dan en is menge vuvungan niw.’

3 “Umbe, sikew is etew, keǥiyi nu is menge vuntud te Israel he siak, is Nengazen he MEGBEVAYÀ, migkaǥi a te, ‘Midsurung kew te menge nasyun he diyà te minsan hendei renged, ne ǥuntaan gaked kew zan en. Midsudì kew zan wey mibpeel-elezan. 4-5 Umbe, sikiyu is menge vuvungan, menge zal-ug, menge suǥud, menge lugar he nengevengkag, pemineǥa niw is egkeǥiyen ku. Siak, is Nengazen he MEGBEVAYÀ, migkaǥi a he utew ku egkepeuki heeyan he menge nasyun lavew en is Edom, su mid-aǥew zan is tanè ku zuma te utew kegkelipey wey kedsudì, su egkesuat dan he maangken dan is menge penebtavà kayi.’

6-7 “Umbe, sikew is etew, keǥiyi nu is tanà he Israel. Keǥiyi nu is menge vuvungan, menge zal-ug, menge suǥud, he iyan a, is Nengazen he MEGBEVAYÀ migkaǥi te, ‘Naantus niw is kebpeel-elezi keniyu te nekepeliǥuy he menge nasyun. Umbe tenged te utew ku kegkepauk, ne siak, is Nengazen he MEGBEVAYÀ ebpenangdù he egkepeel-elezan daan heeyan he menge nasyun. 8 Piru sikiyu is menge vuvungan te Israel, edtuvù diyà te keniyu is menge kayu, ne ebpemeǥas heini para te menge etew ku he Israilihanen, su hapit dan en ed-ulì. 9 Pemineg kew! Ed-etimanen ku sikiyu. Ed-ereduwen ku is tanè niw ne ebpemulaan ku. 10 Ibpemezakel ku is menge meǥinged kayi he iyan is tivuuk he menge etew te Israel. Ed-umanan ku ebenguna is nezeetan he menge inged niw, ne ed-ubpaan heini te menge etew ku. 11 Ibpemahabet ku is menge etew wey menge uyaǥen diyà te keniyu. Ebpeumanan ku sikiyu ebpeubpai te menge etew iring te zengan, ne ibpeuswag ku sikiyu te lavew pa te zengan. Ne egketuenan niw he iyan a Nengazen. 12 Idlikù ku ziyà te keniyu is menge etew ku he Israilihanen. Ed-engkenen kew zan ne kenè niw en id-uman ibpen-awà is menge anak dan.’ ”

13 Mibpedayun megkaǥi is Nengazen he MEGBEVAYÀ te, “Migkaǥi is menge etew ziyà te keniyu te ebpenhimetayan niw is menge meǥinged diyà te keniyu, ne ibpen-awè niw is menge vatà diyà te nasyun niw. 14 Piru puun guntaan kenè niw en ebpenhimetayan is menge meǥinged diyà te keniyu. Ne kenè niw en daan ibpen-awà is menge vatà diyà te nasyun niw. Iyan a, is Nengazen he MEGBEVAYÀ, is migkaǥi kayi. 15 Kenè ku en idtuǥut he sudia kew wey peel-elezi te zuma he menge nasyun. Wey kenè ku en idtuǥut he mezeeti is nasyun niw. Iyan a, is Nengazen he MEGBEVAYÀ, is migkaǥi kayi.”

16 Migkeǥiyan e pa te Nengazen te, 17 “Sikew is etew, hein ed-ubpè pa is menge Israilihanen diyà te tanè dan, midremerikan dan heini pinaaǥi te mezaat he menge vaal zan. Is baal zan iring keremerik te vahi he midlengesahan. 18 Umbe, mibpeǥezaman ku kandan is pauk ku tenged te kebpenhimatey zan keniyan te tanà he Israel, wey tenged te ked-azap dan te zuma he menge ed-ezapen he nekeremerik kayi he tanà. 19 Impeyapat ku sikandan diyà te zuma he menge nasyun. Mibeelan ku ziyà te kandan is ereg he ibales te menge vetasan dan wey menge ulaula zan. 20 Minsan hendei he nasyun is egkepeveyaan dan, egkependezeisey zan is waǥas he ngazan ku. Su egkaǥi is menge etew te, ‘Menge etew sikandan te Nengazen, piru midsegseg din sikandan puun te tanè dan.’ 21 Ingkeseeng ku is kebpendezeisaya te menge etew te Israel te waǥas he ngazan ku ziyà te minsan hendei he nasyun he egkeveyaan dan. 22 Umbe, keǥiyi nu is menge etew te Israel he siak, is Nengazen he MEGBEVAYÀ migkaǥi te: He menge etew te Israel, ibpelikù ku sikiyu ziyà te tanè niw kenà tenged te engayan kew he edawat kayi. Ebeelan ku heini tenged te waǥas he ngazan ku he ebpendezeisayen niw ziyà te minsan hendei he nasyun he egkeveyaan niw. 23 Iyan a, is Nengazen he MEGBEVAYÀ, migkaǥi te ibpeehè ku ke sengemenu is kegkewaǥas te zengeg te ngazan ku ziyà te menge nasyun he zutun niw pendezeisaya heini. Ne egketuenan te menge etew keniyan he menge nasyun he iyan a Nengazen emun igkepeehè ku en kandan is kegkewaǥas ku pinaaǥi te ebeelan ku ziyà te keniyu. 24 Su egkuwaan ku sikiyu puun diyà te nekedseselekawà he menge nasyun ne ed-uwiten ku sikiyu ziyà te keugelingen niw he tanà. 25 Ed-itisan ku sikiyu te lumpiyu he wahig para maawà diyà te keniyu is langun he meremerik, ne kenè kew en ed-uman ed-azap te zuma he menge ed-ezapen. 26 Ebeǥayan ku sikiyu te veǥu he ǥehinawa wey beǥu he mulin-ulin. Is mesinupaken he ǥehinawa niw edhimuwen ku he metinumanen he ǥehinawa. 27 Ebeǥayan ku zaan sikiyu te kediey he Mulin-ulin su wey niw mepurung mesunud is menge suǥù ku wey menge sulunuzen. 28 Ed-ubpè kew ziyà te tanà he ibeǥey ku te menge kepuun niw. Egkehimu kew he menge etew ku, ne egkehimu a he Megbevayè niw. 29 Edlumpiyuwan ku sikiyu te langun he keremerik niw. Ebeǥayan ku sikiyu te zekelà he trigu ne kenè kew en ebitilen. 30 Ibpeveǥas ku te mahabet is menge kayu niw wey ibpezekelè ku is menge abut niw, su wey kew kenè en mepeel-elezi ziyà te zuma he menge nasyun tenged te kebitila niw. 31 Ne egketenuzan niw is mezaat he menge ulaula wey menge vaal niw, ne igkelimezangi niw is keugelingen niw tenged te menge salè niw wey utew mezaat he menge vaal niw. 32 Piru egkesuatan ku he metueni niw te menge etew te Israel he ebeelan ku heini kenà tenged keniyu. Umbe ereg he igkeeled niw is menge ulaula niw. Iyan a, is Nengazen he MEGBEVAYÀ, is migkaǥi kayi.”

33 Mibpedayun megkaǥi is Nengazen he MEGBEVAYÀ te, “Emun egkelumpiyuwan ku en sikiyu te langun he menge salè niw, ibpeuman ku sikiyu ibpeubpà diyà te menge inged niw, ne ebengunen ku is nezeetan he menge lugar. 34 Ne sikan is tanà he mekevulungbulung dengan, ne ed-ereduwen en, ne is langun he ebpekaahà kayi, 35 egkaǥi te, ‘Is tanà he wazè din pulus dengan, neiring en te pemuleey he Eden. Is menge inged he nengevengkag wey nengehimu he mekevulungbulung dengan ne zuen din en menge verengbeng wey ed-ubpaan en!’ 36 Ne is menge etew ziyà te egkesamà he menge nasyun diyà te peliǥuy niw egketuenan dan he iyan a, is Nengazen mibangun te nengevengkag wey nemula ziyà te menge tanà he nengehimu he mekevulungbulung. Iyan a, is Nengazen, is migkaǥi kayi, ne ebeelan ku heini.”

37-38 Mibpedayun megkaǥi is Nengazen he MEGBEVAYÀ te, “Ed-umanan ku ebpemineǥa is kebpehizuhizu te menge etew te Israel, ne iyan ebeelan ku ziyà te kandan is: Edhimuwen ku sikandan he iring kahabet te menge kerehidu he ibpemuhat diyà te Jerusalem emun timpu te pista. Umbe is nengevengkag he menge inged egkeuman egkepenù te mahabet he menge etew. Ne egketuenan dan he iyan a Nengazen.”