1-2 Dutun te ikesepulù he andew te nehuna he vulan, dutun te ike-25 he tuig te kegkevihaǥa kenami–he iyan ike-14 he tuig te kegkezeeti te Jerusalem–midumala a te Nengazen, ne zuen mibpelewasan din kediey. Dutun te kebpekelawas ku, mid-uwit e zin diyà te utew metikang he vuvungan te Israel. Ne kebpantew ku ziyà te egkezivavà, duen neehè ku he menge bilding he henduen be te inged. 3 Ne mid-uwit a te Nengazen dutun, ne zuen neehè ku he etew he is ked-ahaa ta zuen, iring te ed-ilak-ilak he brunsi. Midhitindeg sikandin diyà te ǥemawan is egawed te zezuwa he sukud: is sevaha linu he hiket, ne is sevaha pa kayu. 4 Migkaǥi haazà is etew kayi te kedì te, “Sikew is etew, pemineg ka, ne purungi nu tengtengi is langun he ibpeehè ku kenikew su iyan heini hinungdan te ked-uwita kenikew kayi. Ne tudtula nu ziyà te menge etew te Israel is langun he egkengeehè nu.”

5 Neehè ku is baley te Nengazen he neliǥuy te verengbeng. Ne migkuwa zuen te etew is kayu he sukud din, he sepulù he ǥiek is kelayatan din, sumalà te upisyal he sukud, ne midsukud din kes berengbeng. Sepulù he ǥiek is ketikang kayi wey is kekepal zin. 6 Ne midhendiyà sikan is etew te veyeey zuen te valey te Nengazen he ebpekesinaru ziyà te edsilaan. Mibpemenahik sikandin diyà te heǥezan ne midsukud din is idselang kayi te veyeey, ne sepulù he ǥiek is kelayatan din. 7 Is diyà te kada kilid kayi te veyeey ne zuen dutun tetelu he ruǥu he zutun ebantey is menge vantey. Heini he menge ruǥu, sepulù he ǥiek he kwedradu, ne is kekepal te imberengbeng diyà te mid-elangan dan, walu he ǥiek. Is sunud kayi te menge ruǥu, ne zuen en maan dutun idselang pehendiyà te varkun he ebpekesinaru zuen te valey te Nengazen. Heini he idselang, sepulù he ǥiek is keleyatan din.

8 Ne midsukud daan dutun te etew haazà is barkun, 9 ne 14 he ǥiek is keleyatan kayi. Ne is nekedtimbang he verengbeng dutun te veyeey ne tetelu he ǥiek is kekepal zan.

10 Haazà is tetelu he menge ruǥu he zutun ebantey is menge vantey, neked-iiring is kezekelè dan, ne is menge verengbeng diyà te mid-elangan te kada sevaha he ruǥu, neked-iiring daan is kekepal. 11 Midsukud daan duen te etew is keluag duen te veyeey pehendiyà te lama zuen te valey te Nengazen, ne 22 he ǥiek is keluag din. Is keluag te ǥemawan kayi 17 zà he ǥiek. 12 Diyà te egkesineruwan te kada ruǥu he zutun ebantey is menge vantey, zuen berengbeng he 20 he vaney is ketikang din ne 20 he vaney is kekepal zin. Heini he menge ruǥu, tig sepulù he ǥiek kuwedradu.

13 Ne midsukud duen te etew is tivuuk he keluag te veyeey pehendiyà te lama zuen te valey te Nengazen, ne 42 heini he ǥiek. Is kedsukuza kayi, ne impepuun diyà te egkeiniyuǥan he verengbeng te ruǥu he zutun ebantey is menge vantey ne pehendiyà daan te egkeiniyuǥan te verengbeng te zivaluy zin he ruǥu. 14 Midsukud din is berengbeng puun te ǥemawan pehendiyà te varkun he ebpekesinaru te lama, ne 100 he ǥiek is keluǥayad kayi. 15 Is keluǥayad duen te veyeey puun te ǥemawan kayi pehendiyà te purù te varkun ne 85 he ǥiek. 16 Duen dezeisey he menge sulawà duen te verengbeng duen te menge ruǥu he zutun ebantey is menge vantey wey zuen te verengbeng he nekepetug-elang duen te menge ruǥu. Ne in-ukir zutun te menge verengbeng is menge palma.

17 Ne mid-uwit a zuen te etew ziyà te ǥawas he lama. Dutun duen ku naahà he 30 he menge ruǥu he nekezalandalan diyà te veyeey he simintadu he nekepeliǥuy zuen te lama. 18 Heini is egkezizalem he simintadu he veyeey, nekeuma ziyà te kilid duen te menge veyeey he ibpenhindiyà te seled te lama. Is keluag dutun te simintadu he veyeey ne repeng te keluǥayad duen te menge beyeey. 19 Ne midsukud duen te etew is keziyù puun te veyeey he ibpendendiyà te seled duen te lama ziyà te gawas taman te veyeey he ibpehendiyà te lama he ziyà te seled, ne 170 he ǥiek is keziyù kayi.

20 Ne midsukud duen te etew is keluǥayad wey keluag duen te veyeey he ebpekesinaru ziyà te zizaya. Heini he veyeey ibpehendiyà te ǥawas he lama. 21 Ne is kada kilid duen te veyeey ne zuen duen tetelu he menge ruǥu he zutun ebantey is menge vantey. Is kezekelà kayi he menge ruǥu wey sikan is menge verengbeng he nekepetug-elang kayi, ragkes is barkun kayi, iring te sukud duen te veyeey he ziyà te edsilaan. Is keluǥayad duen te veyeey ziyà te zizaya 85 he ǥiek ne is keluag din 42 wey tengà he ǥiek. 22 Is menge sulawà kayi, is barkun, wey is in-ukir he menge palma ne iring daan te veyeey he ziyà te edsilaan. Pitu he ang-ang is heǥezan pehendutun te veyeey, ne zuen barkun diyà te purù kayi. 23 Is diyà te seled he lama he ebpekesinaru ziyà te zapit te zizaya iring te veyeey he zapit te edsilaan. Midsukud daan duen te etew is kebpekediyuey zuen te zezuwa he veyeey, ne 170 heini he ǥiek.

24 Ne miduma a zuen te etew ziyà te zivavà, ne zutun duen ku naahà he veyeey. Midsukud din is barkun wey is menge verengbeng diyà te seled kayi, ne iring ded is sukud kayi te sukud duen te zuma. 25 Duen daan menge sulawà diyà te peliǥuy zuen te veyeey wey is barkun iring duen te zuma. Is keluǥayad dutun te veyeey, 85 he ǥiek ne is keluag din 42 wey tengà he ǥiek. 26 Pitu he ang-ang is heǥezan kayi he ibpehendutun te veyeey wey duen barkun diyà te purù kayi. Is menge verengbeng diyà te kilid dutun te veyeey zuen duen dayandayan he in-ukir he menge palma. 27 Duen daan beyeey ziyà te seled he lama, he ebpekesinaru ziyà te zivavà. Midsukud duen te etew is keziyù puun kayi he veyeey pehendiyà te veyeey he ziyà te ǥawas he zapit te zivavà, ne 170 he ǥiek.

28 Ne miduma a zuen te etew ziyà te seled he lama ne zuen key mebayà te veyeey ziyà te zivavà. Ne midsukud din is beyeey zutun, ne iring ded is kezekelà duen te zuma. 29 Duen daan kayi menge ruǥu, he zutun ebantey is menge vantey. Is kezekelà kayi he menge ruǥu wey is menge verengbeng diyà te pid-elangan kayi, wey ragkes is barkun kayi, iring daan kezekelà te zuma. Duen daan menge sulawà diyà te peliǥuy zutun te veyeey wey ziyà te varkun. Is keluǥayad dutun te veyeey 85, he ǥiek ne is keluag din 42 wey tengà he ǥiek. 30 (Is menge barkun kayi he menge veyeey he ebpekeliǥuy zuen te seled he lama ne walu he ǥiek is keluǥayad din ne 42 wey tengà he ǥiek is keluag din.) 31 Is barkun te veyeey ziyà te zivavà, ebpekesinaru ziyà te ǥawas he lama, ne in-ukir ziyà te nekedtimbang he verengbeng kayi is menge palma. Walu he ang-ang is heǥezan he ibpehengkayi te veyeey.

32 Ne mid-umanan a zumaha zuen te etew ziyà te seled he lama. Diyè key mebayà te veyeey he zapit te edsilaan. Midsukud din is beyeey ne iring ded is kezekelè din te kezekelà duen te zuma. 33 Duen daan kayi menge ruǥu, he zutun ebantey is menge vantey. Is kezekelà kayi he menge ruǥu wey is menge verengbeng diyà te pid-elangan kayi, wey ragkes is barkun kayi, iring daan kezekelà te zuma. Duen daan menge sulawà diyà te peliǥuy zutun te veyeey wey ziyà te varkun. Is keluǥayad dutun te veyeey 85 he ǥiek ne is keluag din 42 wey tengà he ǥiek. 34 Is barkun kayi, ziyà ebpekesinaru te ǥawas he lama, ne zuen kayi zayandayan he menge palma he in-ukir zuen te nekedtimbang he verengbeng ne zuen walu he ang-ang te heǥezan kayi he ibpehengkayi te veyeey.

35 Ne miduma a zuen te etew ziyà te veyeey he zapit te edsilaan. Midsukud din heini he veyeey ne iring ded heini kezekelà duen te zuma. 36 Duen daan kayi menge ruǥu he zutun ebantey is menge vantey. Is kezekalà kayi he menge ruǥu wey is menge verengbeng diyà te pid-elangan dan, wey ragkes is menge barkun kayi, ne iring ded is kezekelè din duen te zuma. Duen daan menge sulawà diyà te peliǥuy zutun te veyeey. Is keluǥayad dutun te veyeey ne 85 he ǥiek ne is keluag din 42 wey tengà he ǥiek. 37 Is barkun kayi, ziyà ebpekesinaru te ǥawas he lama, ne zuen kayi zayandayan he menge palma he in-ukir zuen te nekedtimbang he verengbeng. Walu he ang-ang is heǥezan he ibpehengkayi te veyeey.

38 Ne zuen ku naahà he ruǥu he zuen din gemawan, he avey te varkun te veyeey he zapit te zizaya. Dutun edlùlùi is menge pemuhat he edtutungen. 39 Is kada kilid dutun te varkun duen dutun dezuwa he lemisahan he zutun edlepaa is menge uyaǥen he pemuhat he edtutungen, pemuhat he idlumpiyu, wey pemuhat he vayad te salà. 40 Duen pa zezuwa he lemisahan diyà te kada kilid duen te heǥezan he ibpehendiyà te veyeey he zapit te edsilaan. 41 Umbe, walu pudu he lemisahan is lepeey te menge pemuhat; heepat is diyà te varkun ne heepat daan is diyà te kilid duen te veyeey. 42 Duen daan dutun heepat he lemisahan he iyan mibeelan is binesbasan he vatu, he zutun idsavuk is menge gelemiten para te kedlapà te menge pemuhat he edtutungen wey zuma pa he menge pemuhat. Heini he menge lemisahan 30 he vaney kuwedradu ne 20 he vaney is ketikang din. 43 Ne ziyà te peliǥuy he verengbeng duen te varkun ne zuen selenggatà he tetelu he vaney is kelayat din. Ne neehè ku ziyà te menge lemisahan is menge usa he ibpemuhat.

44 Duen dezuwa he ruǥu zuen te lama ziyà te seled. Is sevaha ziyà te kilid duen te veyeey he zapit te zizaya he ebpekesinaru ziyà te zivavà, ne is sevaha ziyà te kilid duen te veyeey he zapit te zivavà ne ebpekesinaru heini ziyà te zizaya. 45 Migkaǥi sikan is etew kayi te kedì te, “Is ruǥu he nekesinaru ziyà te zivavà ne para te menge memumuhat he edumala ziyà te valey te Nengazen. 46 Ne is ruǥu he ebpekesinaru ziyà te zizaya ne para te menge memumuhat he edumala te pemuhatà. Heini sikandan menge kevuwazan ni Zadok, ne iyan dà sikandan kevuwazan ni Levi he midtuǥutan te ked-uvey ziyà te etuvangan te Nengazen te ebpenilbi kandin. 47 Ne zutun midsukud duen te etew sikan is lama ziyà te seled, ne 170 he ǥiek he kuwedradu. Is pemuhatà ne ziyà te egkesineruwan duen te valey te Nengazen.”

48 Ne miduma a zuen te etew ziyà te varkun duen te valey te Nengazen. Ne midsukud din is nekedtimbang he verengbeng ne walu he ǥiek is keluag din ne lelima he ǥiek is kekepal zin. Is keluǥayad te veyeey ziyà te varkun, ne 24 he ǥiek. 49 Ne is barkun 34 he ǥiek is keluǥayad din ne 20 he ǥiek is keluag din. Ne sepulù he ang-ang is heǥezan he ibpehedutun te varkun, ne zuen tukud diyà te kada kilid kayi.