1 Migkaǥi pa is Nengazen te, “Emun ebehinen niw en is tanà diyà te kada tribu te Israel, sivayi a keniyu te kedì he vahin he ispisyal he gasa he is keleyatan din 12 he kilumitru ne sepulù he kilumitru is keluaǥan din. Heini he tanà ed-isipen he segradu. 2 Sivey kew kayi he tanà te 875 he ǥiek kuwedradu, he ebpehitindeǥan te valey ku, is peliǥuy kayi te valey ku edhimuwen he bekanti is 87 he ǥiek is keluag din. 3-4 Is ketengà te tanà he para kediey, ne 12 he kilumitru is keleyatan din ne lelima he kilumitru is keluaǥan din, idsivey heini he para te menge memumuhat he ebpenilbi kediey ziyà te valey ku. Ebengunan heini te menge valey zan wey te valey ku he iyan kes Utew Segradu he Lugar. 5 Is ketengà kayi he tanà ne 12 he kilumitru is keleyatan din ne lelima he kilumitru is keluaǥan din gaked te menge Levihanen he umuuǥup te menge memumuhat diyà te valey ku. Ed-engkenen dan heini su para zuen dan menge inged he egkeubpaan.

6 “Ne ziyà te avey te tanà he para kediey, sivey kew te tanà he 12 he kilumitru is keleyatan din ne zezuwa wey tengà he kilumitru is keluaǥan din. Ebeelan heini he inged he zutun egkehimu he ebpekeubpà is minsan hentei he Israilihanen. 7 Edsivayan daan te zezuwa he vahin te tanà is pengulu te Israel. Is senge vahin, diyà ibpepuun te zapit te edsenlepan he zulunà duen te tanà he para kediey wey te tanà he ebeelan he inged pehendiyà te Zaǥat he Mediteraneo, ne is senge vahin pa ibpepuun diyà te zapit te edsilaan he zulunà pehendiyà te Wahig he Jordan. Is dulunà kayi zapit te edsilaan wey edsenlepan ne repeng te zulunà te tanà he mibahin te menge tribu te Israel. 8 Heini he tanà, iyan egkehimu he vahin te pengulu te Israel.

“Kenè en maan luplupiǥa te menge pengulu ku is menge etew ku. Tuǥuti zan is menge etew te Israel te ked-angken te tanà he imbahin kandan te kada tribu zan. 9 Su iyan a is Nengazen he MEGBEVAYÀ, migkaǥi: Sikiyu is menge pengulu te Israel, subre en is mibeelan niw! Engkezi niw en is kebpenggulpi niw wey kebpendaagdaag, ne veeli niw is metazeng wey hustu. Kenè niw en eǥawi te tanà is menge etew ku. 10 Gemita niw is hustu he timbangan, tekesà, etawa sukuzà. 11 Is ‘homer’ iyan ereg he ebesiyan te kedtakes te kezakel. Is senge ‘homer’ sepulù he ‘ipa’ etawa sepulù he ‘bat’. 12 Is ‘shekel’ iyan ereg he ebesiyan te kedsukud te keveǥat. Is senge ‘shekel’ 20 he ‘giras’ wey 60 he ‘shekel’ ne senge ‘mina’.

13-14 “Iyan heini menge pemuhat he ereg he ibeǥey niw ziyà te menge pengulu te Israel: Ike-60 he vahin te sebpet niw he trigu wey barli, ike-100 he vahin te lana niw he ulibu (Is ebesiyan te kedtekesa kayi iyan is ‘bat’ is sepulù he ‘bat’ senge ‘homer’ etawa senge ‘cor’,) 15 wey sevaha he kerehidu ziyà te kada 200 he ebpuun diyà te menge uyaǥen niw. Menge pemuhat heini he gasa, menge pemuhat he edtutungen, wey menge pemuhat he para te meupiya he kedepità su wey kew mevelukasi tenged te menge salè niw. Iyan a, is Nengazen he MEGBEVAYÀ, is migkaǥi kayi. 16 Is langun he menge Israilihanen med-uwit keniyan he menge pemuhat su wey meǥamit te pengulu te Israel. 17 Ketengdanan te pengulu is kebeǥey te menge pemuhat he edtutungen, pemuhat he para gasa, pemuhat he inumen, pemuhat he para idlumpiyu, wey pemuhat he para te meupiya he kedepità dutun te timpu te menge pista iring te Pista te Kebpuun te Hayag, menge Andew te Kedhimeley, wey zuma pa he menge pista he edsilibrahan te menge Israilihanen. Ibpemuhat heini he menge pemuhat su wey mevelukasi is menge Israilihanen tenged te menge salè dan.”

18 Migkaǥi pa is Nengazen he MEGBEVAYÀ te, “Te egkehuna he andew te egkehuna he vulan pemuhat kew te turiti he vaka he wazè din sazir su wey melumpiyuwi is baley ku. 19 Ne egkuwa is memumuhat te lengesa kayi he pemuhat he para idlumpiyu ne ebpelisan din is marku te ǥemawan te valey ku, is heepat he suyuk duen te pemuhatà, wey marku te pultahan duen te seled he lama. 20 Iyan ded heini veeli niw zutun te ikepitu he andew te iyan ded gihapun he vulan he para te minsan hentei he nekesalà he wazè din tivevaa etawa nekesalà he wazè din metueni. Pinaaǥi kayi egkelumpiyuwan is baley ku.

21 “Dutun te ike-14 he andew te egkehuna he vulan, silibraha niw is Pista te Kedlavey te Belinsuǥuen. Silibraha niw heini seled te pitu he andew, ne kaan kew zà te supas he wazè din tapey. 22 Dutun te egkehuna he andew te kedsilibra niw, mebpemuhat is pengulu te turiti he vaka te pemuhat he para idlumpiyu kandan wey te langun he menge Israilihanen. 23 Kada andew seled te pitu he andew zutun te kedsilibra niw, ne mebpemuhat kayi te kedì is pengulu te pitu he turiti he vaka wey pitu he meemahan he kerehidu he wazè din sazir he pemuhat he edtutungen. Mebpemuhat daan sikandin te sevaha he meemahan he kambing he pemuhat he para idlumpiyu. 24 Is kada turiti he vaka wey kada meemahan he kerehidu he ibpemuhat, duen idlapik kayi he pemuhat he gasa, he menge liwazà te saku he herina is kezekelè din wey sengegelun he lana te ulibu. 25 Mebpemuhat daan is pengulu zutun te Pista te Kebaal te menge Lawig, he ebpuunan te ike-15 he andew te ikepitu he vulan. Ne seled daan te pitu he andew, ebpemuhat is pengulu te iring ded te menge pemuhat he ibpemuhat din emun Pista te Kedlavey te Belinsuǥuen: menge pemuhat he para idlumpiyu, menge pemuhat he edtutungen, menge pemuhat he para gasa, wey lana.”