8
Is menge Mid-ulì Puun te Kegkevihag he Miduma ki Ezra
1 Migkaǥi si Ezra te: Iyan heini pengulu te menge pemilya he miduma kediey pehendiyà te Jerusalem he ebpuun diyà te Babilonia, dutun te timpu te kedhadì ni Artaserkses:
2 si Gershom, he ebpuun diyà te pemilya ni Finehas
si Daniel, he ebpuun diyà te pemilya ni Itamar
3 si Hatush he anak ni Shecania he ebpuun diyà te pemilya ni David
si Zacarias wey is menge zuma zin he 150 he menge maama, he ebpuun diyà te pemilya ni Parosh. (Duen listahan te menge kepuun dan.)
4 Si Eliehoenai he anak ni Zerahia wey is menge zuma zin he 200 he menge maama, he ebpuun diyà te pemilya ni Pahat Moab
5 si Shecania he anak ni Jahaziel wey is menge zuma zin he 300 he menge maama, he ebpuun diyà te pemilya ni Zatu;
6 si Ebed he anak ni Jonatan wey is menge zuma zin he 50 he menge maama, he ebpuun diyà te pemilya ni Adin
7 si Jeshaya he anak ni Atalia wey is menge zuma zin he 70 he menge maama, he ebpuun diyà te pemilya ni Elam
8 si Zebadia he anak ni Micael wey is menge zuma zin he 80 he menge maama, he ebpuun diyà te pemilya ni Shefatia
9 si Obadias he anak ni Jehiel wey is menge zuma zin he 218 he menge maama, he ebpuun diyà te pemilya ni Joab
10 si Shelomit he anak ni Josifia wey is menge zuma zin he 160 he menge maama, he ebpuun diyà te pemilya ni Bani
11 si Zacarias he anak ni Bebai wey is menge zuma zin he 28 he menge maama, he ebpuun diyà te pemilya ni Bebai
12 si Johanan he anak ni Hakatan wey is menge zuma zin he 110 he menge maama, he ebpuun diyà te pemilya ni Azgad
13 si Elifelet, si Jeuel, wey si Shemaya wey is menge zuma zan he 60 he menge maama, he iyan nesamà diyà te Babilonia he ebpuun diyà te pemilya ni Adonikam
14 si Utai wey si Zacur wey is menge zuma zan he 70 he menge maama, he ebpuun diyà te pemilya ni Bigvai.
Is Kedlikù Eni Ezra ziyà te Jerusalem
15 Midtiǥum ku ziyà te wahig he edtudà pehendiyà te lugar he Ahava is menge eduma kedì pehendiyà te Jerusalem. Migkampu key zutun seled te tetelu he andew. Hein mid-ehè ku is listahan te menge etew he eduma kedì, ragkes en is menge memumuhat, nesusi ku he wazà dutun is menge Levihanen. 16 Umbe, impetawag ku is menge pengulu te grupu he iyan ensi Eliezer, Ariel, Shemaya, Elnatan, Jarib, Elnatan, Natan, Zacarias, wey Meshulam, wey dezuwa he metau he etew he iyan si Joyarib wey si Elnatan. 17 Impehendiyè ku sikandan te ki Iddo he pengulu ziyà te lugar he Casifia su wey zan mehengyui sikandin wey menge kezuzumahi zin he menge suluǥuen diyà te valey te Megbevayà he medsuǥù dan te menge etew he ebpekepenilbi ziyà te valey te Megbevayà. 18 Ne tenged te edtevangan key te Megbevayà, impehendiyè dan te kenami si Sherebia, duma zin is menge anak din wey menge suled din he 18 he menge maama. Si Sherebia egkeseriǥan he etew ne kevuwazan sikandin ni Mali te kevuwazan ni Levi. Si Levi anak ni Israel. 19 Midsuǥù dan daan diyà te kenami si Hashabia wey is menge suled din wey is 20 he menge enaken din, elin duma zan si Jeshaya he ebpuun te pemilya ni Merari. 20 Midsuǥù dan daan pehendiyà te kenami is 220 he menge suluǥuen diyà te valey te Megbevayà. Heini is menge suluǥuen diyà te valey te Megbevayà mibpilì dengan ni Hadì David wey te menge upisyal zin he ibpeuǥup te menge Levihanen. Pudu nekelista is menge ngazan dan.
Mibpuasa wey Nengemuyù Ensi Ezra
21 Hein diyè key te veyvey te Wahig he Ahava, migkeǥiyan ku is menge zuma ku zutun te grupu zey te ebpuasa key wey ebpekevevaan dey is keugelingen dey ziyà te etuvangan te Megbevayè dey su edhangyù key ziyà te kandin he ventayi key zin dutun te hipenawan dey, ragkes is menge anak dey wey menge azen dey. 22 Su egkeeled a he edhangyù diyà te hadì te menge sundaru wey menge pereuntud te kudà he ebpekevantey kenami wey key kenà mekevut te menge kuntada zutun te kedhipanew zey, su nekeǥiyan dey en is hadì he edtevangan te Megbevayè dey is langun he edsarig diyà te kandin. Piru egkepeukan te Megbevayà is edselikwey kandin. 23 Umbe, mibpuasa key wey nengemuyù key ziyà te Megbevayè dey he ventayi key zin, ne midtavak din is pengemuyù dey.
Is menge Pemuhat para ziyà te Baley te Megbevayà
24 Mibpilì a te 12 he menge etew he ebpuun diyà te pengulu he menge memumuhat, kenà ragkes si Sherebia, si Hashabia, wey sepulù he menge kezuzumahi zan. 25 Ne hein nepasad ne insarig ku ziyà te kandan he wazà kurang sikan is menge pelata wey vulawan, wey is menge gelemiten he imbeǥey te hadì, wey te menge sumesambag din, te menge upisyal zin, wey te mahabet he menge Israilihanen he tavang para te valey te Megbevayè dey. 26-27 Iyan heini insarig ku kandan:
22,000 he kilu he pelata
3,000 he kilu he pelata he mibeelan en he menge gelemiten
3,000 he kilu he vulawan
20 he vulawan he yehung he walu wey tengà he kilu
2 he brunsi he yehung he impesinew, he is bali zin iring te vali te menge yehung he vulawan.
28 Migkeǥiyan ku is menge memumuhat te, “Sikiyu wey heini is menge gelemiten impehinungud diyà te Nengazen. Is menge pelata wey menge vulawan inhalad diyà te Nengazen, he Megbevayà te menge kepuun niw he ebpuun diyà te keugelingen he suat. 29 Pekeventayi niw heini taman te egkeuwit niw ziyà te budiga ziyà te valey te Nengazen diyà te Jerusalem he kena egketerinan, he egkeseksiyan te nengulu he menge memumuhat, menge Levihanen, wey te menge pengulu te menge pemilya te menge Israilihanen.”
30 “Umbe migkuwa te menge memumuhat wey menge Levihanen sikan is menge pelata, menge vulawan, wey is menge gelemiten, su wey zan meuwit diyà te valey te Megbevayè dey ziyà te Jerusalem. Ne pudu haazà wazè din kurang.”
Is Ked-ulì diyà te Jerusalem
31 Mibpuun key ziyà te Wahig he Ahava ne midhipanew key pehendiyà te Jerusalem dutun te ike12 he andew te nehuna he vulan. Midtevangan key te Megbevayè dey wey mibpengelangan key zin te menge kuntada wey menge tulisan dutun te kedhipanew zey. 32 Ne hein nekeuma key ziyà te Jerusalem ne midhimeley key zep-a seled te tetelu he andew.
33 Ne hein ikeepat he andew, midhendiyè key te valey te Megbevayè dey ne indata zey sikan is menge pelata, menge vulawan, wey menge gelemiten he pudu wazà mengeterini ziyà te ki Meremot he memumuhat he anak ni Uria. Duma zin si Eleazar he anak ni Finehas wey zezuwa he Levihanen he si Jozabad he anak ni Jeshua wey si Noadia he anak ni Binui. 34 Mibilang wey midtimbang haazà is langun, ne inlista.
35 Ne zutun, is langun he nemen-ulì puun te kegkevihag nemuhat diyà te Megbevayà te Israel te menge pemuhat he edtutungen: 12 he tudu he vaka he para te tivuuk he Israel, 96 he meemahan he memeǥurang en he menge kerehidu, 77 he meemahan he nati he menge kerehidu. Nemuhat daan sikandan te 12 he meemahan he menge kambing he pemuhat he para idlumpiyu. Heini is langun, menge pemuhat he edtutungen para te Nengazen. 36 Imbeǥey zan daan diyà te menge gubirnedur wey menge upisyal te prubinsya zini layun te Eufrates is dukumintu he midsuratan te mandù te hadì. Heini he menge pengulu mid-uǥup te menge etew te Israel wey te vuluhaten diyà te valey te Megbevayà.