10
Is Kedtug-an te menge Israilihanen te menge Salè Dan
1 Dutun te edluhud si Ezra ziyà te egkesineruwan duen te valey te Megbevayà, wey edsineǥew he ed-ampù wey edtug-an te menge salà te menge Israilihanen, mahabet he menge Israilihanen he menge maama, menge vahi, wey menge vatà is midtiǥum diyà te peliǥuy zin. Heini sikandan kenà daan alang-alang is kedsineǥew zan. 2 Ne zutun migkeǥiyan si Ezra ni Shecania he anak ni Jehiel, he kevuwazan ni Elam te, “Kenè key mepezumdumahan te Megbevayè tew su nengesawa key te menge vahi he kena Israilihanen he ebpuun diyà te menge etew he nekeliǥuy kenitew. Piru minsan pa te iyan heeyan ebpekeperateng kiw ǥihapun is menge etew te Israel. 3 Umbe, ǥuntaan ebpezumdumahan dey is sambag nu wey is sambag te zuma he edtahud te menge suǥù te Megbevayè tew. Ebpenangdù key ziyà te Megbevayè tew he edsegseǥen dey heini he menge vahi ragkes en is menge anak dan. Edtumanen dey is nekaǥi te Kesuǥuan. 4 Hitindeg ka su kenikew he vuluhaten is kegiya kenami mehitenged kayi. Mebpekelig-en ka ne veeli nu is ereg he ebeelan. Ed-uǥup key kenikew.”
5 Umbe, midhitindeg si Ezra ne impepenangdù din is nengulu he menge memumuhat, is menge Levihanen, wey is langun he menge Israilihanen, he veeli zan is migkaǥi ni Shecania. Ne nenangdù sikandan. 6 Ne mid-awà si Ezra ziyà te egkesineruwan duen te valey te Megbevayà ne midhendiyà te ruǥu ni Jehohanan te anak ni Eliashib. Ne hein dutun en sikandin ne wazà sikandin megkaan wey med-inum, su midlalew sikandin tenged te kenà metinumanen is menge Israilihanen he nemen-ulì puun te kegkevihag.
7-8 Mibpehibelu is menge pengulu wey menge edumala te menge Israilihanen diyà te tivuuk he Juda wey Jerusalem he is langun he mid-ulì puun te kegkevihag ne midtiǥum diyà te Jerusalem. Ne is minsan hentei he kenà edtelavuk seled te tetelu he andew ne egkuwaan diyà te kandin is langun he menge azen din ne kenè en sikandin ed-isipen he zuma te menge etew he nemen-ulì puun te kegkevihag.
9 Umbe, seled te tetelu he andew midtiǥum is langun he menge etew te Juda wey Benjamin, ne mibpinuu zan diyà te pelasa te valey te Megbevayà diyà te Jerusalem. Neulaula heini hein ike-20 he andew te ike-9 he vulan. Ebpengerkeren is menge etew zutun su utew meheǥet is ketuyuan te ketiǥuman dan wey tenged te mereǥes he uzan.
10 Ne zutun midhitindeg si Ezra he memumuhat ne migkeǥiyan din sikandan te, “Nekesalè kew tenged te mibpengesawa kew te kenà menge Israilihanen. Ne tenged kayi mid-umanan niw pa is salà te Israel. 11 Ne ǥuntaan itug-an niw is menge salè niw ziyà te Nengazen, he Megbevayà te menge kepuun niw, ne veeli niw is egkesuatan din. Isivey niw is keugelingen niw ziyà te kenà menge Israilihanen he nekeliǥuy keniyu, wey suwayi niw is menge esawa niw he kenà menge Israilihanen.”
12 Mibpekezaǥing medtavak is tivuuk he keet-etawan dutun te, “Benar heeyan! Ne ebeelan dey is egkeǥiyen nu. 13 Piru is kebeeli kayi, ne kenà egkepasad seled dà te senga andew etawa zezuwa he andew, su mezakel kenami is nekevaal keniyan he salà. Ed-uzan guntaan, ne kenè key ebpeketigker he ebpeuzan kayi te ǥawas. 14 Is menge upisyal tew zà is ibpepelintetaǥak kayi para te ked-atur te tivuuk he menge etew. Ibpehengkayi zà is nemengesawa te kenà menge Israilihanen te edteilen he timpu duma te menge edumala wey menge meghuhukum diyà te inged dan. Ebeelan tew heini su wey maawà is utew kegkepeuki kenitew te Megbevayè tew tenged te neveelan tew.” 15 Wazà duma he midsupak kayi he pelanu gawas ki Jonatan he anak ni Asahel wey si Jazea he anak ni Tikva. Ne midlavan kandan si Meshulam wey si Shabetai he Levihanen.
16-17 Midtuman duen te nemen-ulì puun te kegkevihag haazà he pelanu. Umbe mibpilì si Ezra he memumuhat te menge maama he pengulu te menge pemilya, ne inlista is menge ngazan dan. Ne hein nehuna he andew te ikesepulù he vulan, mibpinuu sikandan ne mibpuunan dan is ked-imbistiga bahin te kebpengesawa te menge Israilihanen te menge vahi he kenà menge Israilihanen. Nepasad dan is ked-imbistiga te langun he kasu hein nehuna he andew te nehuna he vulan te nekesunud he tuig.
Is menge Maama he Nemengesawa te Kenà menge Israilihanen
18-19 Iyan heini menge maama he nemengesawa te kena menge Israilihanen, ne midsaad sikandan he edsuwayan dan is menge esawa zan: (Nemuhat is kada sevaha kandan te meemahan he kerehidu he vayad te salè dan.)
Diyà te menge memumuhat:
si Maasea, Eliezer, Jarib, wey si Gedalia, he ebpuun diyà te pemilya ni Jeshua he anak ni Jozadak wey is menge suled din;
20 Si Hanani wey si Zebadia, he ebpuun diyà te pemilya ni Imer;
21 si Maasea, Elias, Shemaya, Jehiel, wey si Uzia, he ebpuun diyà te pemilya ni Harim;
22 si Elioenai, Maasea, Ishmael, Netanel, Jozabad, wey si Elasa, he ebpuun diyà te pemilya ni Pashur.
23 Diyà te menge Levihanen:
si Jozabad, Shimei, Kelaya (he egngezanan daan te Kelita), Petahia, Juda, wey si Eliezer.
24 Diyà te menge musikiru:
si Eliashib.
Diyà te menge vantey te menge ǥemawan te valey te Megbevayà:
si Shalum, Telem, wey si Uri.
25 Diyà te zuma pa he menge Israilihanen:
si Ramia, Izia, Malkia, Miamin, Eleazar, Hashabia, wey si Benaya, he ebpuun diyà te pemilya ni Parosh;
26 si Matania, Zacarias, Jehiel, Abdi, Jeremot, wey si Elias, he ebpuun diyà te pemilya ni Elam;
27 si Elioenai, Eliashib, Matania, Jeremot, Zabad, wey si Aziza, he ebpuun diyà te pemilya ni Zatu;
28 si Jehohanan, Hanania, Zabai, wey si Atlai, he ebpuun diyà te pemilya ni Bebai;
29 si Meshulam, Maluc, Adaya, Jashub, Sheal, wey si Jeremot, he ebpuun diyà te pemilya ni Bani;
30 si Adna, Kelal, Benaya, Maasea, Matania, Bezalel, Binui, wey Manase, he ebpuun diyà te pemilya ni Pahat Moab;
31-32 si Eliezer, Ishia, Malkia, Shemaya, Shimeon, Benjamin, Maluc, wey si Shemaria, he ebpuun diyà te pemilya ni Harim;
33 si Matenai, Matata, Zabad, Elifelet, Jeremai, Manase, wey si Shimei, he ebpuun diyà te pemilya ni Hashum;
34-37 si Maadai, Amram, Uel, Benaya, Bedea, Keluhi, Bania, Meremot, Eliashib, Matania, Matenai, wey si Jaasu, he ebpuun diyà te pemilya ni Bani;
38-42 si Shimei, Shelemia, Natan, Adaya, Macnadebai, Shashai, Sharai, Azarel, Shelemia, Shemaria, Shalum, Amaria, wey si Jose, he ebpuun diyà te pemilya ni Binui;
43 si Jiel, Matitia, Zabad, Zebina, Jadai, Joel, wey si Benaya, he ebpuun diyà te pemilya ni Nebo.
44 Heini sikandan is langun, nemengesawa te menge vahi he kenà menge Israilihanen, ne is duma kandan duen dan en menge anak dutun he menge vahi.