1 Ne zutun midlingketawan ni Jose is amey zin ne midsineǥawan din wey midhezekan din. 2 Ne midsuǥù din dutun is menge perebelsamar he belsemara zan is lawa te amey zin. Umbe mibelsamar zan dutun is lawa ni Jacob. 3 Ne 40 he andew is keluǥayad te kebelsemara zan su iyan haazà hustu he keluǥayad te kebelsemar te minatey. Ne 70 he andew is kedlalew te menge Ehiptohanen tenged ki Jacob.

4 Ne hein netapus haazà is timpu te kedlalew zan, midlelaǥan ni Jose is menge upisyal te hadì te Ehipto, ke sikandin te, “Emun egkehimu ne lelaǥi niw is hadì 5 he tuǥuti e zin te kedleveng te amey ku ziyà te Canaan. Su zuen intelaan kediey te amey ku, ne impepenangdù e zin he ke sikandin te, ‘Emun ebpatey a kinahanglan he ziyà a kenikew ileveng te penlevengà he zaan he mid-andam ku ziyà te tanà he Canaan.’ Ne emun egkepasad is kedlevenga kandin, ne edlikù e zed dini.” 6 Ne hein netuenan duen te hadì, ne midtavak sikandin te, “Tumana nu is impenangdù nu ziyà te amey nu. Ne ǥenat kad ne ileveng nu en sikandin.”

7 Ne zutun migenat si Jose, ne miduma kandin is mezakel he menge upisyal te hadì te Ehipto, wey is menge lavew he menge sineriǥan din wey is langun he menge ebmeǥurangen te tivuuk he tanà te Ehipto. 8 Ne miduma zaan is langun he menge sakup ni Jose, is menge suled din wey is menge sakup te amey zin. Ne iyan dà nesamà diyà te Goshen is menge anak dan wey is menge uyaǥen dan. 9 Duen daan mibpemen-untud te kudà wey kerwahi he mibpemenduma, ne utew zan mezakel is midhendiyà.

10 Ne hein nekeuma sikandan diyà te ǥunasà diyà te Atad he uvey te Wahig he Jordan, ne midlalew sikandan para ki Jacob, ne utew subra is kedlelendag dan. Ne midlalew si Jose seled te pitu he andew. 11 Ne is menge tig-Canaan he meǥinged dutun, hein neehè dan is ebpemenlelendag dutun te gunasà diyà te Atad, ne migkaǥi zan te, “Utew neseeng is menge Ehiptohanen.” Ne tenged dutun haazà is inged he uvey te Wahig he Jordan ne migngezanan te Abel Mizraim, he ke và dà egkeǥiya, midlelendaǥan te menge Ehiptohanen.

12 Midtuman te menge anak ni Jacob is intelaan din kandan. 13 Ne mid-uwit dan is lawa zin diyà te Canaan ne inleveng dan diyà te surung he ziyà te vevesukà te Macpela, diyà te edsilaan te Mamre. Heini he vevesukà mibpemasa ni Abraham diyà te ki Efron he Hitihanen, su ebeelan din he penlevengà. 14 Ne si Jose, hein nepasad en haazà is kedlevenga te amey zin, mid-ulì sikandin diyà te Ehipto zuma te menge suled din wey is langun he menge etew he miduma kandin te kedleveng te amey zin.

15 Ne haazà is menge suled ni Jose, dutun te minatey en is amey zan, pesikaǥi zan te, “Kela ke ebelesan kiw en ni Jose tenged te mezaat he mid-ulaula tew zengan kandin.” 16 Ne tenged dutun duen surat he impeuwit dan diyà te ki Jose he edhenduen te, “Is amey tew, te wazè pa sikandin mebpatey intelaan din kenami 17 he megkaǥi key ziyan te kenikew te egkeǥiyen din kenikew he iyan is: ‘Edhengyuan ku sikew, mama, he peseyluwa nu is salà wey mezaat he mid-ulaula kenikew te menge kakey nu su mibpesipelahan ke zan,’ ke sikandin. Ne sikami zaan is menge suluǥuen te Megbevayà te amey tew, edhengyuan dey sikew he peseyluwa nu is salè dey kenikew.” Ne hein nekeuma heini is surat diyà te ki Jose, mibpenluluhaan sikandin su nerurunù.

18 Ne zutun nemekeuma is menge suled din ne midlangkeb dan diyà te etuvangan din. Ke sikandan te, “Menge uripen key en kenikew.”

19 Piru midtavak si Jose ziyà te kandan te, “Kenè kew mahandek. Kenè ku sikiyu ebelesan su kenà egkehimu he iyan a ed-ilis te Megbevayà! 20 Su minsan pa te mezaat is tuyù niw kediey, mibpengelinteuwan te Megbevayà he meupiya is pangkus din. Su impelavew e zin su wey kiw is mezakel melibri ne kenà meumes. 21 Umbe kenè kew mahandek su ed-elimahan ku sikiyu wey is menge anak niw.” Iyan heini menge lalag din kandan he menayù su wey mekesarig dan kandin.

22 Ne si Jose wey is langun he menge sakup wey kevuwazan te amey zin, diyè dan med-ubpà te Ehipto. Is keluǥayad te untung ni Jose 110 he tuig. 23 Neseutan pa sikandin te menge apù din te veul he menge kevuwazan ni Efraim. Ne neseutan pa zaan sikandin te menge apù din he menge anak ni Makir he anak ni Manase.

24 Duen timpu he migkaǥi si Jose ziyà te menge suled din te, “Meǥaan en is kebpatey ku, piru kenà egkehimu he kenè kew en edtevangan te Megbevayà. Ne ibpaawè kew zin ded kayi he tanà, ne ibpeulì kew zin diyà te tanà he impesarig din te menge kepuun tew he si Abraham, si Isaac, wey si Jacob.” 25 Ne zutun, impepenangdù ni Jose is menge Israilihanen. Ke sikandin te, “Ipenangdù niw he emun ibpeawè kew en te Megbevayà kayi he lugar ne uwita niw is menge tulan ku.”

26 Ne hein 110 en is penuiǥen ni Jose ne minatey sikandin. Mibelsamar zan is lawa zin ne insavuk dan diyà te lungun diyà te Ehipto.