1 Emun ebpatey is sevaha he etew he metazeng, wazà ed-insà ke maan. Wazà utew ebpekesavut he egkuwaan te Megbevayà is menge etew he edsunud kandin su wey zan mekelikey te kezeetan. 2 Emun ebpatey is etew he metazeng, ebpekehimeley en sikandin wey ebmelinawen en.

3 Piru sikiyu, iring kew te menge veyilan, menge mengungumpadi, wey menge vahi he ebelegyà te zengeg dan, uvey kew su wey kew mehukumi. 4 Ed-un-undahan niw is menge metazeng; ebingiǥan niw wey edyewyawan sikandan. Menge kevuwazan kew te menge mesinupaken wey menge teruen. 5 Ed-ezapen niw is menge ed-ezapen pinaaǥi te kebpekidhilavet diyà te sihung te kada merapung he kayu. Ibpemuhat niw pa is menge anak niw ziyà te zal-ug he alug te menge kelendiǥan. 6 Is metilak he menge vatu ziyà te menge zal-ug, iyan menge megbevayè niw. Ed-ezapen niw heini pinaaǥi te kebpemuhat te menge pemuhat he inumen wey pemuhat he para gasa. Kenè ku igkelipey heini is baal niw. 7 Edtekezeg kew ziyà te metikang he menge vuvungan ne ebpemuhat kew zutun wey ebpekidhilavet. 8 Idsavuk niw pa is menge ledawan te menge ed-ezapen niw ziyà te zivaluy te ǥemawan te menge valey niw. Idselikwey a keniyu. Iring kew te vahi he mengungumpadi he nemenahik diyà te meluag he katri zin he nekidsebutà te kumpadi zin he ebpehulizè dan. Egkelipey sikandin he ebpekidhilavet te kumpadi zin. Ebpezumdumahan din is arig din.

9 Midhendiyè kew te ed-ezapen niw he si Molec is ed-uwit te lana wey mahabet he menge pehemut. Midsuǥù niw pa is menge etew te kebpengahà te menge ed-ezapen diyà te meziyù he menge lugar su wey niw maazap. Ne ibpehendiyè niw is edsuǥuen niw minsan diyà te lugar te menge minatey. 10 Minsan egkeveley kew en he ebpen-ahà te menge ed-ezapen, wazà gihapun maawà is perateng niw he ebpeketuredu kew. Edlig-enan niw is keugelingen niw, umbe wazè kew luyahi.

11 Migkaǥi is Nengazen te, “Hentei ves heini is menge ed-ezapen he utew niw igkahandek ne midterteruan a keniyu? Midlipatan ad keniyu ne wazà ad keniyu seǥipaa. Hengkey ves is hinungdan maan is wazè kew en medtahud kedì? Tenged be te mibpereremek e zà seled te meluǥayad he timpu? 12 Ed-isipen niw he metazeng en is ebeelan niw, piru ibpeehè ku ke hengkey kew he kelasi te menge etew. Ne kenà ebpeketavang keniyu is menge ed-ezapen niw. 13 Uya, kenà ebpeketavang is menge ed-ezapen niw emun ebuyù kew te tavang diyà te kandan. Id-amin sikandan idlayap te keramag; idlayap dan te sengehiyup dà. Piru is menge midsarig kediey ebpekeubpà diyà te tanà ne ed-ezapen e zin diyà te segradu he vuvungan. 14 Egkaǥi a te, ‘Purungi is dalan. Iawà is nemekevelavag diyà te veyeey te menge etew ku.’ ”

15 Iyan daan heini egkeǥiyen te Utew Lavew he Megbevayà, kes Waǥas he Megbevayà he wazà pidtemanan te untung din: “Diyà a ed-ubpà te metikang wey segradu he lugar, piru ed-ubpa a zaan duma te menge etew he kenà ebpelavew wey mid-iniyug te mezaat he ulaula su wey ku sikandan melig-eni. 16 Benar iyan, kenà a ebpekigkuntada wey kenà taman te taman is kegkepauk ku su emun ebeelan ku heini, ebpematey is menge etew he linimbag ku. 17 Nepauk a tenged te salà wey keleleǥed te menge tig-Israel, umbe midsilutan ku sikandan wey mid-iniyuǥan. Piru mibpedayun dan gihapun te kebaal te salà. 18 Neehè ku is mezaat he menge vaal zan, piru ebewian ku sikandan wey zan meulii. Egiyahan ku sikandan, wey edlipayen ku is egkengeseeng kandan. 19 Ne zutun ebpekezalig dan kedì. Ebeǥayan ku sikandan te meupiya he kebpekesavuk, ke ziyè dan man te meziyù etawa ziyè dà te uvey. Ebewian ku sikandan wey zan meulii. Iyan a, is Nengazen, is migkaǥi kayi. 20 Piru is menge lalung, ne wazè dan kelinew; iring sikandan te ebpemaǥel he zaǥat he edtampil te menge sagbet wey menge meremerik diyà te veyvey. 21 Kenà ebpekaangken te meupiya he kebpekesavuk is menge lalung.” Iyan heini egkeǥiyen te Megbevayè ku.