1 Hein minatey en si Ehud, mid-uman en maan mebaal is menge Israilihanen te mezaat diyà te etuvangan te Nengazen. 2 Umbe, impesakup en maan sikandan te Nengazen ki Hadì Jabin he Canaanhen, he midhadì diyà te inged he Hazor. Is pengulu te menge sundaru ni Jabin iyan si Sisera he meǥinged diyà te Haroshet Hagoyim. 3 Si Jabin duen din 900 he kerwahi he menge putew. Ne utew zin midlisedlised is menge Israilihanen seled te 20 he tuig. Umbe mibuyù en maan te tavang is menge Israilihanen diyà te Nengazen.

4 Dutun he timpu iyan pengulu te Israel si Debora. Ebpeneuven sikandin te Megbevayà ne esawa sikandin ni Lapidot. 5 Emun ebpehusey is menge Israilihanen te samuk dan diyà te ki Debora, edhendiyè dan te sihung te Palma ni Debora, ziyà te pid-elangan te Rama wey Betel he ziyà te vuvungan te Efraim.

6 Ne sevaha he andew, impetawag ni Debora si Barak he anak ni Abinoam te tig-Kedesh he sakup te tribu ni Naftali. Kebpekeuma ni Barak, migkaǥi si Debora te, “Is Nengazen he Megbevayà te Israel, edsuǥuen ke zin. Ke sikandin te, ‘Kuwa ke en te 10,000 he menge maama puun diyà te menge tribu ni Naftali wey ni Zebulun ne zumaha nu sikandan diyà te Buntud he Tabor. 7 Ne ed-iniyaten ku si Sisera, sikan is pengulu te menge sundaru ni Jabin te kedhendiyà te zal-ug he Kishon duma te menge sundaru zin wey menge kerwahi zin. Ne edhimuwen ku he mezaag niw sikandan.’ ”

8 Ne migkaǥi si Barak diyà te ki Debora te, “Egenat a emun eduma ka; piru emun kenè ka eduma ne kenà a egenat.” 9 Midtavak si Debora te, “Uya, eduma a kenikew; iyan, kenà kenikew is dengeg su vahi is ebpengelinteuwan te Nengazen he ebpekezaag ki Sisera.” Ne miduma si Debora ki Barak ne midhendiyè dan te Kedesh. 10 Ne zutun impehendiyà ni Barak te Kedesh is menge tribu ni Naftali wey ni Zebulun, ne 10,000 kandan is miduma kandin. Elin daan miduma si Debora.

11 Dutun he timpu, si Heber he Kinhanen, midsuwayan din is duma he menge Kinhanen he menge kevuwazan ni Hobab te uyang ni Moises. Ne mibpekeziyù sikandin wey midtukud te tulda zin uvey te puun te zekelà he kayu he ziyà te Zaananim, uvey te Kedesh.

12 Ne zuen neketudtul ki Sisera he midhendiyà si Barak te Buntud he Tabor. 13 Umbe, midtiǥum ni Sisera sikan is 900 he menge kerwahi zin he menge putew, wey is langun he menge sundaru zin. Ne migenat dan puun te Haroshet Hagoyim pehendiyà te zal-ug te Kishon.

14 Ne migkeǥiyan ni Debora si Barak te, “Genat ke en, su iyan heini andew he ebpengelinteuwan te Nengazen he mezaag nu si Sisera. Ebpetelihuna kenikew is Nengazen.” Umbe midtupang si Barak dutun te Buntud he Tabor zuma sikan is 10,000 he menge sundaru zin. 15 Hein edsurung en si Barak, midliveg te Nengazen si Sisera wey is langun he perekerwahi wey is langun he menge sundaru zin. Ne mid-umpak si Sisera puun te kerwahi zin ne mibpelaǥuy. 16 Midal-as ni Barak is menge sundaru ni Sisera wey sikan is menge perekerwahi zin taman te Haroshet Hagoyim ne migerè dan. Ne wazà minsan sevaha he nesamà.

17 Ne si Sisera mulà mibpelaǥuy pehendiyà te tulda ni Jael te esawa ni Heber, su geina te emiǥu ni Hadì Jabin he hadì te Hazor is pemilya ni Heber he Kinhanen. 18 Midsinuǥung ni Jael si Sisera ne migkeǥiyan din te, “Laus ka, datù, seled ka kayi te tulda ku, ne kenè ka mahandek.” Umbe midseled si Sisera ne midtembunan ni Jael te mekepal he malung su wey mekeeles. 19 Ne migkaǥi si Sisera ziyà te ki Jael te, “Betbetai a kenikew veǥayi te wahig. Su utew ed egkemezahi.” Umbe mid-ebriyan ni Jael is lundis he teleǥuey te ǥatas ne impeinum din si Sisera, ne hein nekepasad mid-umanan din tembuni. 20 Migkeǥiyan ni Sisera si Jael te, “Hithitindeg ke zà keniyan te ǥemawan te tulda ne emun duen ebpekeuma he ed-insà ke zuen duma he etew ne kaǥi ka te wazà.”

21 Ne tenged te utew kegkeveley ni Sisera ne nehurep sikandin. Migkuwa si Jael te mertilyu wey palpal te tulda ne midnaney sikandin med-uvey ziyà te ki Sisera. Ne mibpelpalan din is titingkazan ni Sisera taman te midlambas diyà te tanà, ne minatey si Sisera.

22 Ne hein nekeuma si Barak is ebpen-ahà ki Sisera, midsinuǥung sikandin ni Jael ne migkeǥiyan din te, “Laus ka, su ibpeehè ku kenikew is etew he ebpen-ahaan nu.” Umbe miduma si Barak ki Jael ziyà te seled duen te tulda. Ne zutun neehè din si Sisera is nekehidhizeǥà he minatey en he midlembasan te palpal is titingkazan din. 23 Dutun he andew, mibpengelinteuwan te Megbevayà he mezaag te menge Israilihanen si Hadì Jabin he Canaanhen. 24 Mibpedayun med-iseg is kelig-en te menge Israilihanen taman te nezaag dan si Jabin.