1 Meselem pa, ne migenat si Jerubaal (he iyan si Gideon) duma te menge etew zin. Migkampu sikandan diyà te uvey te serebseb diyà te Harod. Is menge Midianhen diyà megkampu te divavè dan he ziyà te menge suǥud he uvey te Buntud he More. 2 Ne migkeǥiyan te Nengazen si Gideon te, “Utew mezakel is duma nu. Emun ebpekezaag dan en ne kela ke meisip dan he iyan ingkezeeǥa zan te menge Midianhen is pinaaǥi te kandan he nehimu ne kenà pinaaǥi te kedì he nehimu. 3 Umbe, keǥiyi nu sikandan he ke hentei kandan is egkahandek ne med-awè en kayi te Buntud he Gilead ne med-ulì en.” Ne hein migkaǥi haazà ni Gideon, ne mid-ulì is 22,000 ne 10,000 zà is nesamà.

4 Piru migkaǥi is Nengazen diyà te ki Gideon te, “Mahabet pa ǥihapun is nesamà. Dumaha nu sikandan diyà te wahig su idsivey ku is ibpezuma ku kenikew. Is minsan hentei he egkeǥiyen ku he ibpezuma, ne zumaha nu. Is minsan hentei he egkeǥiyen ku he kenà ibpezuma, ne kenè nu zumaha.”

5 Umbe, miduma sikandan ni Gideon diyà te wahig. Ne zutun migkaǥi is Nengazen te, “Isivey nu is langun he mid-akup te wahig he mid-iring te asu su midèdè dan haazà, wey isivey nu zaan sikan is midluhud su wey mekeinum.” 6 Ne 300 kandan is diyà med-inum te menge palad dan, is duma mid-inum he midluhud. 7 Ne migkeǥiyan te Nengazen si Gideon te, “Pinaaǥi kayi te 300 he etew edlibriyen ku sikew ne ibpezaag ku kenikew is menge Midianhen. Is nesamà he menge etew ipeulì nu en diyà te menge ed-ubpaan dan.” 8 Umbe, impeulì sikandan ni Gideon hein ingketaǥak dan en is menge lutù dan wey menge vudyung dan. Ne wazè din mulà ipeulì sikan is 300 he menge etew.

Is kampu te menge Midianhen ne ziyà te menge suǥud, ne egkaalug dà eni Gideon.

9 Dutun he kezukileman migkaǥi is Nengazen diyà te ki Gideon te, “Pengandam kew en! Surunga niw en is menge Midianhen ne ibpezaag ku keniyu sikandan. 10 Iyan, emun egkahandek ka he edsurung guntaan, ne zumaha nu is suluǥuen nu he si Pura, ne hendiyè kew te kampu te menge Midianhen. 11 Pemineǥa niw ke hengkey is egkeǥiyen dan ne siguradu ebmevurut ka he edsurung pinaaǥi te egkezineg nu.” Umbe migenat sikandan is dezuwa pehendiyà te dulunà te kampu te menge Midianhen, he zuen duen ebantey he menge sundaru. 12 Is menge Midianhen, menge Amalikanhen, wey zuma pa he menge etew he ebpuun diyà te edsilaan, migkampu ziyà te menge suǥud he henduen be te kahabet te terapan is kahabet dan. Is menge kemilyu zan henduen be te kahabet te pantad diyà te veyvey te zaǥat he kenà egkevilang.

13 Ne hein dutun en ensi Gideon, duen nezineg dan he zezuwa he etew he ebpelelaǥà. Migkaǥi is sevaha te, “Neketeǥeinep a he zuen sevaha he supas he barli he metivurun he midlilid diyà te kampu tew ne neigù din is sevaha he tulda te menge Midianhen. Ne nepiley heini wey newaǥey.” 14 Midtavak is sevaha te, “Wazè en duma he ibpesavut keniyan, kekenà, iyan is ispada ni Gideon te Israilihanen he anak ni Joash. Ibpezaag kandin te Megbevayà is menge Midianhen, wey sikitew en is langun.”

15 Ne hein nezineg ni Gideon haazà is teǥeinep wey is kehuluǥan din, ne midalig din is Nengazen. Ne midlikù sikandin diyà te kampu te menge Israilihanen ne migkeǥiyan din is menge zuma zin te, “Gaanggaan kew en, su ibpezaag kenitew te Nengazen is menge Midianhen.” 16 Mibahin din te tetelu he grupu sikan is 300 he menge etew zin, ne mibeǥayan din is kada sevaha kandan te vudyung wey tivud he zuen sulù diyà te seled din. 17 Ne migkeǥiyan din sikandan te, “Emun diyè key en te dulunà te kampu te kuntada tew, bentayi a keniyu ne iringi niw is ebeelan ku. 18 Emun ibpezaǥing ku wey te menge zuma ku is menge vudyung dey, sikiyu is duma he ziyà daan te peliǥuy te kampu ne iyan haazà beeli niw, ne habet kew pengulahì is egkaǥi te, ‘Para te Nengazen wey ki Gideon!’ ”

19 Liwazè en te kezukileman hein nekeuma si Gideon wey sikan is 100 he menge zuma zin diyà te dulunà te kampu te kuntada zan. Wazè pa meuǥet is kegkeilisi te ebantey zutun. Impezaǥing eni Gideon is menge vudyung dan wey mibpenrupet dan is menge tivud dan. 20 Ne iyan daan haazà mibeelan duen te tetelu he grupu. Ne zutun te egewezan dan te ǥivang dan sikan is sulù ne egewazan dan daan te kewanan dan sikan is budyung ingkulahì dan is lalag he edhenduen te, “Ebpekidtebek kiw para te Nengazen wey para ki Gideon.” 21 Is kada sevaha kandan mibpelastar ziyà te peliǥuy zuen te kampu, piru sikan is menge kuntada zan, ne erang dan dà te ebpemelaǥuy. 22 Ne zutun te kebpezeǥinga zuen te 300 he menge Israilihanen te menge vudyung dan, mibpengelinteuwan te Nengazen he med-uney medtebek is menge etew zutun te kampu te menge Midianhen. Is duma kandan mibpelaǥuy pehendiyà te Bet Shita he uvey te Zerera pelaus diyà te dulunà te Abel Menola he uvey te Tabat.

23 Ne impetawag ni Gideon is menge Israilihanen he sakup te tribu ni Naftali wey ni Asher, wey sakup te tivuuk he tribu ni Manase, ne impezal-as kandan is menge Midianhen. 24 Midsuǥù daan si Gideon te menge menunudtulà diyà te menge meǥinged diyà te vuvungan te Efraim wey zan mekeǥiyi he ventayi zan is Wahig he Jordan taman te wahig he Bet Bara su para kenà mekelayun is menge Midianhen. Ne midtuman heini te langun he maama he kevuwazan ni Efraim ne mibentayan dan haazà he menge lugar. 25 Nevihag dan is dezuwa he pengulu te menge Midianhen he si Oreb wey si Zeeb. Ne midhimetayan dan si Oreb diyà te vatu he migngezanan te huziyan he Batu ni Oreb, ne si Zeeb midhimetayan dan diyà te keresà te paras he migngezanan te huziyan he Keresà te Paras ni Zeeb. Ne midsiguduwan dan del-asa is menge Midianhen. Ne hein nepasad, mid-uwit dan is ulu ni Oreb wey ulu ni Zeeb diyà te ki Gideon diyà te Wahig he Jordan.