1 “Pelaǥuy kew wey med-eles is menge kevuwazan ni Benjamin! Gawas kew ziyà te Jerusalem! Ipezaǥing niw is budyung diyà te Tekoa ne uyawi niw is Bet Hakerem. Su ebpekeuma is dekelà he kezeetan he ebpuun diyà te zizaya. 2 Egevaan ku is mekempet he inged he Jerusalem. 3 Edliǥuyan heini te menge peremandar wey menge sundaru zan. Idlelawig dan is menge tulda zan diyà te peliǥuy kayi ne zutun dan ebpelastar. 4 Ne egkaǥi sikandan te, ‘Ebpengandam kiw te kedsurung te Jerusalem. Edsurungen tew pezem sikandan te meudtu. Iyan, ǥuntaan hapit en edsanlep is andew ne ebpehendiyè en te kebmerusirem. 5 Umbe, nasì tew en sikandan edsurunga kengkuwan te mezukilem ne ebengkaǥen tew is melig-en he menge vahin kayi he inged dan.’ ”

6 Iyan heini migkaǥi te Nengazen he Mekeǥeǥehem: “Penamped kew te menge kayu he egkeǥamit niw te kebengkag te verengbeng te Jerusalem, ne tambù kew te tanà diyà te kilid te verengbeng he iyan egkepemenehikan niw. Heini he inged ereg en he edezeetan, su midelandap en kayi he lugar is kebpendaagdaag. 7 Iring heini te serebseb he kenà ed-engked he edtuda, su kenà daan egkeengked is kebaal te mezaat kayi. Layun egkezineg kayi he inged is kebpaantus wey kebpendezaat. Is daru wey palì kayi iyan layun ku egkaahà. 8 Ebpetizeenan ku sikew is Jerusalem: emun kenè ka ebpemineg, ed-iniyuǥan ku sikew; ne edhimuwen ku he mekevulungbulung is tanè nu su para wazè en ed-ubpè kayi.”

9 Ne heini pa is migkaǥi te Nengazen he Mekeǥeǥehem: “Is egkesamà he uuyag diyà te Jerusalem ibpepenginrarew ku te menge kuntada, iring te kebpekirarew te ebpenrupù te paras he midliku su edsusiyen din is menge subpang ne midrarew zin is nesamà he menge veǥas kayi.”

10 Midtavak a te, “Piru hentei man is ebpetizeenan ku? Hentei man is ebpemineg kedì? Midampè dan is menge telinga zan para kenà sikandan mekezineg. Wazè dan kedtahud te lalag te Nengazen, ne kenè dan igkelipey is kebpemineg kayi. 11 Neǥezam ku zaan is dekelà he pauk he iyan is pauk te Nengazen, ne kenè ku heini egkeeǥen.”

Migkaǥi is Nengazen te, “Ibpeǥezaman ku is pauk ku ziyà te menge vatà he eguǥusà diyà te zalan, diyà te menge vetan-en he menge maama he edtitiǥum, diyà te menge telteleesawa, wey ragkes en is utew en memeǥurang. 12 Is menge valey zan ibeǥey ziyà te zuma, ragkes en is menge pemuleey zan wey menge esawa zan. Egkehitavù heini emun edsilutan ku en is menge etew he ed-ubpà kayi he tanà. Iyan a, is Nengazen, is migkaǥi kayi.

13 “Puun te kinemevevaan pehendiyà te kinetikangan is ked-etew zin, ne ebpenlimbung su para mekeselapì. Minsan is menge ebpeneuven wey is menge memumuhat ne ebpengilad daan. 14 Wazè dan seǥipaa is palì te menge etew ku he iyan is uvag dà he kedtuu. Minsan gerabi heini, egkaǥi zan te ‘melinawen kiw’ minsan pa te iyan tutuu is duen tebek. 15 Neeled dan be tenged te utew mezaat he vetasan dan? Wazà! Su wazè dan en keelezan, minsan deisek! Umbe egkezeetan daan sikandan iring te kezekelan. Egkezeetan sikandan dutun te timpu te kedsiluti ku kandan. Iyan a, is Nengazen, is migkaǥi kayi.”

16 Ne heini pa is migkaǥi te Nengazen: “Hitindeg kew ziyà te lembaǥan te menge zalan ne purung kew pekisusi. Insè kew ke hendei is kezaan wey meupiya he zalan he meupiya he ed-ikulen, ne zutun kew ikul. Emun ed-ul-ulahan niw heini ne ebpekaangken kew te kelinew. Piru migkaǥi kew te, ‘Kenè key mulà keniyan ed-ikul.’ 17 Mibpilì a te vantey he ibpekaǥi ku keniyu te, ‘Pemineǥa niw is kebpezaǥing te vudyung su wey kew mekepengandam.’ Piru migkaǥi kew te, ‘Kenè key mulà ebpemineg.’

18 “Umbe pemineg kew is menge nasyun. Ahàa niw ke hengkey is egkehitavù te menge etew ku. 19 Pemineg ka, is kelibutan! Ebpeuwitan ku te kezeetan heini he menge etew he idsilut ku kandan tenged te mezaat he menge planu zan. Su wazè dan pemineǥa is menge lalag ku wey inselikwey zan is kesuǥuan ku. 20 Kenè ku ebeliyen is edtutungen dan he veyewà he ebpuun pa te Sheba, wey is menge pehemut he ebpuun pa ziyà te meziyù he lugar. Kenè ku egkezawat is menge pemuhat dan he edtutungen. Is menge pemuhat dan kenà ebpekelipey kedì. 21 Umbe siak, is Nengazen, migkaǥi a te, ‘Edsavuk a te ebpekeseligkat kayi he menge etew. Ne tenged kayi egkezeetan is menge ginikanan wey is menge anak dan, ragkes en is telteleemiǥu wey teltelesiringan.’ ”

22 Mid-uman pa megkaǥi is Nengazen te: “Tengteng kew! Duen menge sundaru he ebpekeuma he ebpemuun diyà te tanà he zizaya. Ebpuun sikandan diyà te sevaha he nasyun he mekeǥeǥehem he ziyà te meziyù he lugar he andam en te kedsurung. 23 Neǥumeenan sikandan te menge panà wey menge vangkew. Mesipala sikandan wey wazè dan hizu. Is keǥurub dan henduen be te keǥurub te zezekelà he menge vaǥel dutun te ked-untud dan te menge kudè dan. Ebpekeuma zan su edsurungen kew zan, is menge tig-Jerusalem.”

24 Mahabet is nezineg dey he tudtul mehitenged kandan ne midluyahan key. Kegkehandek wey kesakit te gehinawa is neǥezam dey iring te kegkesekiti te vahi he ebeliliten. 25 Kenè kew hendiyà te menge vevesukà wey kenè kew hiphipanew ziyà te menge zalan, su zuen menge kuntada he andam he edhimatey kenitew. Mekahandekhandek is minsan hendei he nekeelingkus kenitew. 26 Sikiyu is menge emurè ku te inged, bivisti kew te saku wey telilid kew te avu he tuus te kedlalew niw. Purung kew seengseeng he iring te minatey is budtung he anak niw he maama. Su kenè en egkeuǥet edsurungen kiw en te kuntada tew.

27 Migkaǥi is Nengazen kayi te kedì te, “Midhimu ku sikew he iring te pereǥezam te mital su wey nu meǥezami is menge vetasan te menge etew ku. 28 Pudu sikandan mesinupaken wey kenà ebpezumazuma; iring sikandan te kenà egkepekù he brunsi wey putew. Wazà duma he vaal zan, kekenà, iyan dà is kebutangbutang wey kedtuntu te zuma. 29 Is hapuy ebpurungan edregreǥa su wey metunew pezem is timeǥà he nekesahug te pelata, piru kenà egketunew. Ne iring keniyan is menge etew ku, wazà pulus te kedhimuwa kandan he lunsey, su is menge kelelalung wazà gihapun maawà diyà te kandan. 30 Egkengezanan sikandan te, ‘Inselikwey he Pelata,’ su inselikwey ku sikandan.”