1 Midpedayun megkaǥi is Nengazen te, “Dutun he timpu ibpen-awà diyà te menge leveng is menge tulan te menge hadì wey menge upisyal ziyà te Juda, wey is menge tulan te menge memumuhat, menge ebpeneuven, wey menge etew ziyà te Jerusalem. 2 Ne ebpekepeyapat heini ziyà te tanà he egkesilaan te andew, bulan wey menge vituen he mibmahal zan, midsunud dan, midengepan dan, wey mid-azap dan. Kenè en edtiǥumen is menge tulan dan wey ikeleveng, kekenà, ebpekepeyapat dà heini ziyà te tanà he henduen be te menge tai. 3 Is egkesamà he uuyag kayi te mezaat he nasyun ibpeyapat ku ziyà te zuma he menge nasyun, ne zutun edtumuen dan is kebpatey kenà te kegkeuyag. Iyan a, is Nengazen he Mekeǥeǥehem, is migkaǥi kayi.”

4 Migkeǥiyan a te Nengazen he keǥiya ku heini he menge lalag diyà te menge etew: “Emun egkepiley is etew, kenè be ed-enew man sikandin? Emun egketazin sikandin, kenè be edlikù sikandin diyà te mibeyaan din? 5 Maan is sikiyu is menge tig-Jerusalem mibpedayun kew med-iniyug kedì? Maan is kenè niw egkehimu te ed-awà is menge ed-ezapen niw he edtuntu keniyu. Maan is kenè kew edlikù kayi te kediey? 6 Mibpurungan ku pemineǥa is menge lalag niw ne wazà nekaǥi niw he hustu. Wazà minsan sevaha keniyu he mid-engked te kelelalung din. Wazà nekekaǥi keniyu te, ‘Utew mezaat is neveelan ku?’ Is kada sevaha keniyu elistu he ebaal te salà, iring te kudà he ed-untuzan te edhendiyà te tebek. 7 Is tagbis he tulabung, is merepatik, is selimbatang wey is dugwak, netuenan dan ke keenu zan edlayang pehendiyà te zuma he lugar wey keenu zan edlikù, piru sikiyu is menge etew ku wazè niw mulà metueni is menge velaud ku. 8 Maan is egkaǥi kew he uluwanen kew su ziyà te keniyu is kesuǥuan te Nengazen? He iyan man tutuu is, midhalin heini te menge teruen he menunudlù niw. 9 Egkepeel-elezan is migkilala zan is keugelingen dan he uluwanen sikandan. Utew sikandan egkengahandek su ebihaǥen man sikandan, tenged te kedselikwaya zan te menge lalag ku. Tutuu ve he metau sikandan? 10 Umbe, ibeǥey ku ziyà te zuma he menge etew is menge esawa zan wey menge vevesukè dan. Su ǥeina te puun te kinemevevaan pehendiyà te kinetikangan is ked-etew zin, ne ebpenlimbung dan su para mekeselapì. Minsan is menge ebpeneuven wey is menge memumuhat edpenlimbung daan. 11 Wazè dan seǥipaa is palì te menge etew ku minsan pa te grabi en heini. Kesikandan te meupiya zed is langun minsan pa te kenà haazà tutuu. 12 Ingkeeled dan be haazà is utew mezaat he vaal zan? Wazà! Su wazè dan en keelezan! Umbe ebpematey sikandan iring te zuma he menge etew. Ebpematey sikandan dutun te timpu te kedsiluti ku kandan. Iyan a, is Nengazen, is migkaǥi kayi. 13 Egkuwaan ku is menge sebpet dan te paras wey higus. Minsan is menge zahun kayi egkengeǥangu. Is menge imbeǥey ku kandan edhewien ku ziyà te kandan.

14 “Ne zutun egkaǥi sikandan te, ‘Na, hengkey pa is edteǥazan tew? Kuwa kew en su edhendiyè kiw te menge inged he vinerengbeng, ne zutun kiw ebpekimatey. Su iyan en hukum te Nengazen he Megbevayè tew is edhimetayan kiw. Iring te mibeǥayan kiw zin te wahig he zuen duen hilu he egkeinum tew, su ǥeina te nekesalè kiw ziyà te kandin. 15 Ngenaan tew he mebmelinew piru wazà mebmelinew. Edtaǥad kiw te keupiyaanan piru kegkahandek is nekeuma ziyà te kenitew. 16 Is mezaǥing he herìhian te menge kudà te menge kuntada tew iyan nezineg tew ziyà te Dan. Minsan herìhian dà dutun te menge kudè dan egkahandek kiw en is langun he meǥinged kayi he tanà. Nekeuma zan su edezeetan dan heini he tanà wey is menge netaǥù kayi–is menge inged wey is langun he menge meǥinged kayi.’ ” 17 Migkaǥi is Nengazen te, “Pemineg kew! Edsuǥuen ku ziyà te keniyu is menge kuntada he iring te menge uled he edhereg he kenà egketawaran, ne ebpengeǥaten kew zan.”

18 Ne migkaǥi si Jeremias te: Kenà egkaawà is kegkeseeng ku. Utew mesakit is gehinawa ku. 19 Pemineǥa is kebpekitavang te menge emurè ku te inged; egkezineg heini kayi te tivuuk he tanà. Ke sikandan te, “Wazè en be ziyà te Jerusalem is Nengazen? Wazè en be kayi is Megbevayà he Hadì te Jerusalem?” Midtavak is Nengazen te, “Maan is midhimu niw he mepauk a pinaaǥi te ked-azap niw te zuma he menge ed-ezapen he wazà menge pulus?” 20 Midriklamu is menge etew he ke sikandan te, “Nepasad en man is tiraǥun, piru wazè key ǥihapun melibri.”

21 Migkaǥi si Jeremias te, “Utew mesakit is gehinawa ku. Ingkesekiti ku is utew kegkerasey te menge emurè ku te inged. Midlalew a wey utew a neseeng. 22 Wazè be bawì diyà te Gilead? Wazè be ebpemawì diyà? Maan is wazà meulii is palì te menge emurè ku te inged?